2 Samuel 18 (YAPE)
1 Me kunuy David ni Pilung urngin e tirok e salthaw, me yuraba’nagrad ni yad yu biyu’ nge yu raay, me tayrad nga tan pa’ e pi tolang ko salthaw. 2 Me pi’rad ngranod ni yad dalip ulung, ma ke tay Joab nge Abishai ni walagen Joab, nge Ittai ni be’ u Gath nra bagayad ma ke mil fan baraba’ e salthaw ngak. Me ga’ar David ni Pilung ngak e salthaw rok, “Bay gu un ngomed ngdarod.” 3 Me lungurad, “Thingar dab mu’un ngomad ngdarod. Ya dariy rogon u wan’ e pi’in ni kar togopluwgad ngom ni fa’an gamad ra pig i cheal nggu milgad fa nli’ baley ko girdi’ rodad; me gur e susun e ragag bbiyu’ i gamad. Kabfel’ ni ga ra par u roy u lan binaw ngu’um pi’ e ayuw nge yib ngomad.” 4 Me ga’ar David ni Pilung, “Tin kam leam niged ni bfel’ e ir e nggu rin’.” Ma aram me sak’iy David u to’oben langan e garog ko binaw me yib e salthaw rok ngranod ni kan yuraba’nagrad ni yad yu biyu’ nge yu ra’ay. 5 Me ga’ar ngak Joab nge Abishai nge Ittai, “Mu leam niged gag nge dab mu maad’adgad ngak fachi cha’ i Absalom.” Urngin e salthaw ni rung’ag e re bugithin ney ni yog David ngak urngin e pi tolang ko salthaw. 6 Me yan e salthaw rok David nga daken e ted ni ngar chamgad piyu Israel, miyad cham u fithik’ e gerger u Efraim. 7 Me gel e salthaw rok David ngak piyu Israel; nrib gel e gafgow nra tiyed, ya 20,000 e salthaw ni yim’ e rofen nem. 8 Me wer fare cham u daken e ted i yan, ma pire’ e girdi’ ni yim’ u fithik’ e gerger ko tin nli’rad u fithik’ e cham. 9 Me gin Absalom ma kar mada’gad boch e salthaw rok David. Ma bay Absalom u daken ba gamanman ni mule, ma nap’an ni mil fare mule u tan ba ke gek’iy ni oak ni ba ga’ ken, me mit piyan lolugen Absalom nga fithik’ i papa’ngin. Me mil fare mule u tanggin nge yan me par Absalom nike tagafgaf. 10 Me changar reb e salthaw rok David me guy Absalom, me yog ngak Joab ni ga’ar, “Kug guy Absalom nike tagafgaf u pa’ngin ba ke gek’iy ni oak!” 11 Me ga’ar Joab, “Riyul’ ni kam guy? Ere mangfan da mu li’ u rom ngem’? Fa’an mang e mrin’ ma kug pi’ ngom ragag e salpiy ni silber nge bangi leed.” 12 Me fulweg fare salthaw ni ga’ar, “Mus ni ga ra pi’ ngog bbiyu’ i salpiy ni silber ma dab gu k’iyag ta’ab bugul i pa’ag nib togopluw ngak e en ni fak e pilung. Gamad gubin ni kug rung’aged e thin ni yog David ni Pilung ngom nge Abishai nge Ittai ni ga’ar, ‘Mu leam niged gag nge dab mu maad’adgad ngak fachi cha’ i Absalom’. 13 Machane fa’an mang e da gu fol rok nggu li’ Absalom ngem’, mra rung’ag David ni Pilung, ya urngin ban’en nma rung’ag murung’agen! Ma mmudugil ni gathi ga ra yib mu n’ufegeg.” 14 Me ga’ar Joab, “Dab ku gu adbey e tayim rog ngom.” Me fek dalip e sarey nge yan i pag nga ngorongoren Absalom ni kabfos, nike gafgaf u pa’ngin fare ke gek’iy ni oak. 15 Me yib ragag e salthaw rok Joab ra li’ed Absalom ngari yim’. 16 Me yog Joab ni ngan thoy e rappa nge tal e cham, me sul e pi salthaw rok ndakur lol’iged piyu Israel. 17 Miyad fek Absalom nga ron’ed ngalan ba low nib to’ar u fithik’ e gerger, miyad mun malang nga daken nge yan i par nib to’ulung i malang ni ba ga’ nike tharey Absalom. Me mil urngin piyu Israel ngar sulod mra be’ me yan nga tafen. 18 Nap’an ni kabfos Absalom me ubung ban’en nib tolang ni ngi i puguran Absalom ngak e girdi’, ni ubung u lan fare loway ni Loway ko Pilung fithingan, ya dariy fak ni pumo’on nra par nge mang puguran rok ngak e girdi’. Me tunguy fithingan ngay, ere ke mada’ ko bin daba’ e rran ma yima pining fithingan ni Puguran rok Absalom. 19 Ahimaaz, ni be’ nib mo’on ni Zadok e chitamngin e ga’ar ngak Joab, “Mol’ogeg nggu mil nggu wan ngak David ni Pilung nggu weliy ngak ni SOMOL e ke ayuweg ko pi to’ogor rok.” 20 Me ga’ar Joab, “Dangay, dab mman mog bbugithin ngak e daba’. Bay fini reb e rran ma ga rin’, ma gathi daba’, ya ke yim’ e en ni fak e pilung.” 21 Me ga’ar Joab ngak e sib rok ni be’ u Ethiopia, “Mman ngamog ngak e en ni pilung e tin ni kam guy.” Me siro’ fare sib, me mil nge yan. 22 Ma de m’ing fen Ahimaaz ya ga’ar, “Wenig ngom, demturug rogon, machane ngam pageg ngku gu fek e re bugithin ney i yan ngak.”Me fith Joab ni ga’ar, “Fakag, mangfan ni gab adag ni ngam rin’? Ya gathi yira pi’ puluwon ngom.” 23 Me ga’ar Ahimaaz, “Demturug rogon, machane gub adag ni nggu wan.”Me ga’ar Joab ngak, “Ere mman.” Me mil i yan nga p’ening ngalan e loway nu Jordan, nge yan i thiliyeg fa’anem nu Ethiopia. 24 Ma bay David nike par nga but’ ko gin ba’aram ni bay u thilin e bin wuru’ nge bin langin e garog ko binaw. Me yan e en ni be matanag nga daken fare yoror ko binaw nge yan i sak’iy nga daken e chigiy ko garog; me changar me guy be’ nib mo’on ni be mil i yib ni go ir. 25 Me non u lang nga but’ ngak David ni Pilung, me ga’ar David, “Fa’anra go ir me ere thin ni bfel’ e be fek i yib.” Ma be munmun ma be chugur i yib fa’anem ni be mil. 26 Mi ki guy fa’anem ni be matanag yugu be’ ni go ir ni be mil i yib, me non u lang ngak e en ni be matanagiy e garog ni ga’ar, “Mu sap, ku ba’aram be’ ni be mil i yib!”Me ga’ar David ni Pilung, “Ku er rogon e cha’nem ni thin ni bfel’ e be fek i yib.” 27 Me ga’ar fa’anem ni be matanag, “Cha’ ni ba’aram nib m’on e be mil ni bod rogon e mil rok Ahimaaz.”Me ga’ar David ni Pilung, “I ir be’ ni bfel’, ma thin ni bfel’ e be fek i yib.” 28 Me non Ahimaaz ni ba ga’ laman ni ga’ar ngak e en ni pilung, “Kabfel’ rogon urngin ban’en!” Me paraw nga but’ u p’eowchen David ni Pilung me ga’ar, “Ke sorok SOMOL ni Got rom, ya ke gagiyegnag kam gel ngak e pi’in ni kar togopluwgad ngom!” 29 Me fith David ni Pilung ngak ni ga’ar, “A mog, de buch ban’en rok fachi cha’ i Absalom?”Me ga’ar Ahimaaz, “Nap’an ni l’ugeg Joab ni ir reb e tolang ko salthaw rom, mu gguy e girdi’ ni kar milgad i yan, machane da gu nang ko mangfan ni ka ni mil i yan.” 30 Me ga’ar David ni Pilung ngak, “Mman mu sak’iy aram,” me yan i sak’iy ko fa gin’em. 31 Me taw fa’anem nu Ethiopia me ga’ar ngak David ni Pilung, “Thin ni bfel’ e kug fek i yib ngom! Daba’ e ke gagiyegnag SOMOL kam gel ngak urngin e pi’in ni kar togopluwgad ngom!” 32 Me fith David ni Pilung ngak ni ga’ar, “A mog, de buch ban’en rok fachi cha’ i Absalom?”Me ga’ar fa’anem ni be’ u Ethiopia, “Gu be athpeg ni tin ke buch rok e manga yigi buch rok urngin e pi to’ogor rom, nge urngin e pi’in yad be togopluw ngom.” 33 Me ri kireban’ David ni Pilung. Me yan ngalang ko fare senggil ni bay u daken e chigiy ko garog nge yor. Ma nap’an ni be yan ngalang ma be yor ni be ga’ar, “Absalom ni fakag! Absalom ni fakag! Fa’an mang e gu wan nga luwam nggum’ ma kabfel’! Absalom ni fakag! Absalom ni fakag!”