Genesis 26 (YAPE)
1 I yib reb e uyngol ko re binaw nem nga tomuren e bin ni yib nsom’on nnap’an Abraham. Me yan Isak ngak Abimelek, ni pilung ko Filistine, u Gerar. 2 Me yib i m’ug SOMOL ngak Isak me ga’ar, “Dabman’ nga Egypt; mu par ko gi but’ ney, ko gin bay gog ngom ni ngam par riy. 3 Mu par u roy ni ga ba milekag, ma bay gupar rom, mug fal’eg wa’atham. Nggu pi’ ngom nge pi’in ni bayib ni owchem ga’ngin e re gi but’ ney. Bay gu tay u gil’ e n’en ni kug michegew Abraham ni chitamam. 4 Bay gu yo’ornag e pi’in bayib ni owchem ni bod rogon e t’uf u lanelang, mug pi’ ngorad ga’ngin e gi but’ ney. Ma urngin e nam nu fayleng ni bay ra ninged ngog ninggu fal’eg wa’athrad ni bod ni kug fal’eg wa’athan e pi’in owchem. 5 Gu ra tow’ath nigem ni bochan e fol Abraham rog, ma i tay e mtochiyel rog nge thin rog u gil’. 6 Ma aram me par Isak u Gerar. 7 Ma nap’an ni fith e pi pumo’on nu rom murung’agen e bpin rok, me yog ni re bpin nem e walagen. De yog ni iraram le’engin ya be rus nri cheal e pi pumo’on nem ngar li’ed ngar feked Rebekah, ni le’engin nrib pidorang. 8 Nap’an nike par Isak u rom ke n’uw nap’an boch, me reb e rran me sap Abimelek ni Pilung u winda rok nga but’ me guy Isak nge Rebekah ni yow be ngongol ni rogon e mabgol. 9 Me mulwol Abimelek ni nge yan Isak i guy me ga’ar ngak, “Ere iraram le’engim! Mangfan ni mog ni ireram walagem?”Me fulweg Isak ni ga’ar, “Gu leamnag ni yira thang e fan rog ni fa’anra gog ni ir le’engig.” 10 Me ga’ar Abimelek, “Fin mang e kam rin’ ngodad? Fa’an mang e par reb e pi pumo’on ney nge le’engim, mari gur tapgin e kireb nra aw nga dakenmad.” 11 Me non Abimelek ngak urngin e girdi’ ni ga’ar, “Cha’ nra math pa’ ko re pumo’on ney ara le’engin e ran thang e fan rok.” 12 Me woldug Isak ko fare binaw, ma ka re duw nem me t’ar wom’ngin e woldug rok ni ra’ay yay ni bo’or nga urngin ni yung ni bochan e SOMOL e be tow’athnag. 13 Ma aram me ifel’ rogon i yan, nge yan i mang rebe madangdang nib yo’or ban’en rok. 14 I awan’ epi Filistine ngak ni bochan e ba yo’or yu ulung i saf, garbaw, nge tapigpig rok. 15 Me’ere rsuguyed ko but’ lan gubin e luwed ni fa’ani ker e tapigpig rok Abraham nnap’an ni kabfos. 16 Me ga’ar Abimelek ngak Isak, “Muchuw ko nam romad. Ya ke gal gelngim ngomad.” 17 Ma aram me chuw Isak nge yan i n’uf e tent rok ngalane loway u Gerar, ni aram e gin ni i par riy bochngiyal’. 18 Me tabab bayay i ker fapi luwed ni ba’ram nu’un ker nnap’an Abraham, ni fa’an ni suguy e Filistine langgin ko but’ u tomuren ni yim’ Abraham. Isak e tunguy fithingan fapi luwed ni wod rogon fithingan ni fa’ani tunguy e chitmangin. 19 Pi tapigpig rok Isak era kired ba luwed u lan e re loway nem miyad pat ko ran riy. 20 Pi tagafal saf u Gerar e ra malu’agthin gad e girdi ni magfaliy e saf rok Isak ni murung’agen fare luwed ni yad be ga’ar, “Re ran ney e fanmad.” Ma aram me tunguy Isak fithingan fare luwed ni “Malu’agthin.” 21 Miki fu’og e pi tapigpig rok Isak reb e luwed. Mukun tugthin ni bochan e binem e luwed, miki tunguy Isak fithngan ni “Togopluw.” 22 Me chuw u rom nge yan i ker reb e luwed. Madakun malu’agthin ni bochan e binem, ere tunguy fithngan ni “Pufmat’won.” Me ga’ar, “Chiney e ke pi’ SOMOL mat’awdad ni ngad pired ko giney, ni irera’ e re gi binaw ni bayi fel’ rogdad riy i yan. 23 Me chuw Isak u rom nge yan nga Beersheba. 24 Ma fa’ani nep’ riy me yib i m’ug SOMOL ngak me ga’ar, “I Gag e Got rok e chitmam i Abraham. Dab mu tamdag; ya gu bay rom. Bay ug tow’ath nigem mug yo’ornag e pi’in bayib ni owchem, ni bochan e arrogon ni gumcheg ngak Abraham ni tapigpig rog.” 25 Me toy Isak ba altar u rom ngi i liyor ngak SOMOL riy. Me n’uf e pi tent rok u rom, miki ker e pi tapigpig rok reb e luwed. 26 Ma aram me yib Abimelek u Gerar ni yad Ahuzzath ni en nma fanownag, nge Fikol ni en ga’ ko solthaw rok ni ngar guyed Isak. 27 Me ere fithrad Isak, “Mang ni kafin mubad ni ngam guyedgag, ya som’on faram ma dubmedgag, me gimed chuwegeg?” 28 Miyad fulweg, “Chiney e kug nanged ni bay SOMOL rom, me ere kug leam niged ni nge fel’ thildad. Gamad ba’adag ni ngam micheg 29 ni dab mu chamgad ngomad ni bod gamad ni da gurin’ed ban’en ngomed nib kireb. Ya gamad ba gol ngom mug paged gur ngam man u fithik’ e gapas. Rib gagiyal e chiney ni SOMOL e ke fal’eg wa’atham.” 30 Me fal’eg Isak bochi abich ni fan ngorad, miyad abich ma yad be garbad’. 31 Bin migid e rran nri kakadbul mra reb fapi pumo’on me michmicheg ngak bagyad ni nge fel’ thilrad. Ma aram me fangichiyrad Isak miyad yan u fithik’ e gapas. 32 Kre rran nem me yib e pi tapigpig rok Isak nga rogned ngak murung’agen fare luwed ni kar kired. Ra ga’argad ngak, “Kug patgad ko ran.” 33 Me tunguy fithingan fare luwed ni “Mow.” Irera’ e n’en ni rin’ fare binaw nu Beersheba min tunguy fithingan ni arrogon. 34 Nap’an aningeg i ragag e duw rok Esau, me leengiy l’agruw e ppin nu Hittite, ni aram e Judith ni fak Beeri nge Basemath ni fak Elon. 35 Miyow gathay lanyan’ Isak nge Rebekah ndaki ayal e par rorow.