Numbers 4 (YAPE)
1 Me yog SOMOL ngak Moses 2 ni nge the’eg e pi Levite ko fare ke girdi’ rok Kohath ni yuke girdi’ nge tabnaw, 3 min fal’eg babyoren fithingan urngin e pumo’on ni guyey nge yan i mada’ ko wugem e duw yangarrad ni ngar maruwelgad u lan fare Tent u p’eowchen SOMOL. 4 Muruwel rorad e ba l’ag rogon ko pin’en nib thothup. 5 Ra taw nga nap’an ni ngan n’ag gil’iy ni aram e ngan pug e Tent, me Aron nge pi pumo’on ni pifak e yad ra yan ngalan fare Tent, ngar pilged nga but’ fare gi kateng ni kan tining ngalang ni be rungrunguy fare Kahol ko M’ag, mra upunguyed fare Kahol ko rengi kateng nem. 6 Ma ku yad ra upunguy nga bangi keru’ e gamanman ni bfel’, min pithig bang i mad nib polo’ i ra’en mak’ef nga daken, ngemu’ miyad yip’ e mat’ riy ngay. 7 Ma fare tebel ni yima tay fare flowa ni kan pi’ ni maligach ngak SOMOL ngay e ngan pithig bang e mad nib ra’en mak’ef nga daken, min tay fa yu raba’ i plet nga daken, nge fa yu raba’ i dabiy ko incense, nge yu raba’ i dabiy ni fen e maligach, nge fapi rume’ ni fen e wayin ni maligach. Thangri gubin ngiyal’ ma bay e flowa u daken fare tebel. 8 Mra upunguyed e pin’ey nga bang i mad nib row, mu ku ra upunguyed ngabang i keru’ e gamanman ni bfel’, nge mu’ miyad yip’ e mat’ riy ngay. 9 Mar feked bang i mad nib ra’en mak’ef ngar upunguyed ko fare tagil’ e magal, nge fapi magal, nge fa pin’en ni fen e mthang nifiy ko fapi magal, nge yu raba’ i plet riy, nge urngin fapi tafen e gapgep ni olive. 10 Miyad ing nge gubin tatalin e maruwel riy nga bang i keru’ e gamanman ni bfel’ ngar ted nga daken tagil’ e fek chugom. 11 Me migid miyad pithig bang i mad nib ra’en mak’ef nga daken fare altar ni gol, ngar upunguyed ngabang i keru’ e gamanman ni bfel’, ma aram miyad yip’ e mat’ riy ngay. 12 Miyad fek urngin e pi tatalin e maruwel riy ni yima fanay u lane Gin nib Thothup ko fare Tent, ngar inged bang i mad nib ra’en mak’ef ko fa pin’em, min upunguy ngabang i keru’ e gamanman ni bfel’, ngar ted nga daken tagil’ e fek chugom. 13 Yad ra chuweg e awat ko fare altar mar pithiged bang i mad nga daken nib purple. 14 Miyad tay nga daken fare altar urngin e tatalin e maruwel riy: yu raba’ i fen e fek nifiy, nge bogi lam, nge bogi sebel, nge yu raba’ i taray. Ma aram miyad upunguy nga bang i keru’ e gamanman ni bfel’, miyad yip’ e mat’ riy ngay. 15 Ma nap’an ra pig ni ngkur n’iged tagil’rad, ma fare ke girdi’ rok Kohath e ngarbad ni ngar feked fa pin’em nib thothup u tomuren nike mu’ Aron nge pi pumo’on ni fak i upunguy e pin’em nge gubin talin e maruwel riy. Fare ke girdi’ rok Kohath e thingar dabi math bagyad nga reb e pin’em nib thothup, ya ra yim’.Gubin ngiyal’ ni ngan mithmitheg fare Tent ma irera’ e pi maruwel ko fare ke girdi’ rok Kohath. 16 Me Eleazar nib mo’on ni fak Aron ni prist e maruwel rok fare Tent ni ga’ngin nge gapgep ni fen fapi magal, nge incense, nge fapi grain ni maligach, nge fare gapgep ni fen e mathiy, nge tin kabay u lan fare Tent ni kan tabgulnag ni fan ngak SOMOL. 17 Me ga’ar SOMOL ngak Moses nge Aron, 18 “Dab mpagew fare ke girdi’ rok Kohath 19 ngan li’rad ni bochan e kar chugurgad ko pin’ey nib th’abi thothup. N’en nra rin’ ma dabi buch ban’en rok e pi cha’ney e nge yan Aron nge fapi pumo’on ni pifak ngalan fare Tent nge bagyad fapi girdi’ rok Kohath minog ngak e tin nge rin’ nge tin nge fek. 20 Ya fa’anra yan fare ke girdi’ rok Kohath ngalan fare Tent nra guyed fapi prist ni yad be fal’eg rogon fa pin’em nib thothup ni ngan fek, ma yad ra yim.” 21 Me yog SOMOL ngak Moses 22 ni nge the’eg fare ke girdi’ rok Gershon ni yib ko Levi, ni yu ke girdi’ nge tabnaw, 23 me ngongliy babiyoren fithingan urngin e pumo’on ni bay e duw rorad ko guyey nge mada’ ko wugem nrayag rorad ni ngar maruwelgad u lan fare Tent u p’eowchen SOMOL. 24 Maruwel rorad e pin’en ni ba’aray ni ngu’ur feked: 25 fare Tent, upong riy u langgin, upong riy u wuru’, nge fare gi keru’ e gamanman ni bfel’ ni kan upunguy nga daken, nge kateng ni fen langan e mab riy, 26 nge kateng nge gufan e yoror ni ba liyeg fare Tent nge fare altar, nge kateng ko langan e garog, nge urngin e pi ayal riy ni yima fanay ko ngiyal’ ni ngan n’uf e pin’ey. Gubin e pi maruwel nib l’ag rogon ko pin’ey ma yad e yad ra ngongliy. 27 Thangri guy Moses nge Aron fare ke girdi’ rok Gershon ni dabisiy ni kar rin’ed urngin fapi maruwel ma kar feked urngin e pin’en nike yog Aron nge pifak ni pumo’on ngorad. 28 Irera’ e maruwel rok fare ke girdi’ rok Gershon u lan fare Tent; yad ra rin’ e pi maruwel ney ni bod nike pow’iyrad Ithamar ni be’ ni mo’on ni fak Aron ni prist. 29 Me yog SOMOL ngak Moses ni nge the’eg fare ke girdi’ rok Merari ni yib ko Levi, ni yuke girdi’ nge tabnaw, 30 me fal’eg babyoren fithingan gubin e pumo’on ni bay e duw rorad ko guyey nge mada’ ko wugem nrayag ni ngar maruwelgad u lan fare Tent u p’eowchen SOMOL. 31 Yad e maruwel rorad ni ngu’ur feked fapi chayam riy, nge likeng, 32 nge rumog, nge ta’ ko fare Tent, nge pi yuluy riy nge gufan fare yoror nib liyeg fare Tent, nge gubin e pi ayal riy ni yima fanay ni ngan n’uf fare yoror ngalang. Ra bagyad fapi pumo’on ma maruwel rok reb e pin’em ni nge fek. 33 Irera’ e pi maruwel ko fare ke girdi’ rok Merari ni aram e pigpig rorad u lan fare Tent; yad ra rin’ e pi maruwel ney ni bod nike pow’iyrad Ithamar ni be’ nib mo’on ni fak Aron ni prist. 34 34-48 I Moses nge Aron nge pi tayugang’ nu Israel e ra folgad rok SOMOL ngar the’eged e girdi’ ko fa dalip ke girdi’ ni bay u lan fare ganong ko Levite, ni fare ke girdi’ rok Kohath, nge Gershon, nge Merari. Ra the’eged e yuke girdi’ nge tabnaw, mar fal’eged babyoren fithingan urngin e pumo’on ni guyey e duw yangren nge mada’ ko wugem nrayag ni ngar maruwelgad u lan fare Tent u p’eowchen SOMOL, ni bod ni ba’aray: 49 Ra bagyad fapi pumo’on ma kan yoloy fithingan nga babyor ni bod nike yog SOMOL ngak Moses; ni bod rogon ni motochiyelnag SOMOL nge pi’ u daken Moses nra bagyad fapi pumo’on ma kan duwgiliy rogon e maruwel rok ko pigpig ara fek ni ngi i tay.