Hebrews 2 (BBT1E)

1 Ji-è gethek shii ne ruang afen yi pha ji pha chiang shii gethek è yoijong pha izai shii chuh è khoh chid. 2 Gethek blangthek shii hamangkhliiethek è miyaogam phi pha ji ne zai shii doh yi, chiih-è hanyie è arekgieng, anuii pho ithek shii ne lago mua ro. 3 Gethek è Bajobo giawo shii isiie arek arone khi-è-rek ne, yoh ne khia magey phlei? Ithong awai igobi giawo hì yao bi, chiih-è hanyie è aishii hì yoi gathek ne izai rone khagi rek phi. 4 Ji pha ishak shii buangthek nane wiengthek pha zab ichuathek rek pha ji è chiih-è awai è yang pha Ragung So pha lasen ji thang pha ji è Hamangkhung-aphuii awai ro khagi shii de lao phi. 5 Hamangkhung-aphuii è hamangkhliiethek shii gethek è nyie yao ramuii pha sohjambling ji shii iwo sohjambling thog ramuii pha ji shii kho pha aphi ro. 6 Ji pha chiang shii, jigi shii yao pha duiine:“Hamangkhung-aphuii wo, bran ne nyie ga, na ne ithek shii now bo;Ai ne bran bie ro, na ne ithek shii gayiig chid habey? 7 Na è aishii ne ìujia ishak pha hamangkhliiethek è ìu rab;na ne aishii ilab nane biisiie rog shii rago khak phi; 8 chiih-è aishii ne zab manathek shii bohkhophothek rab phi.”Hì è yao ji ne Hamangkhung-aphuii è aishii “Zab manathek shii bohkhophothek rab phi” Ji pha miyao è ne zab ne sang è lua ro, jimagunde Gethek ne thuh de bran ne zab manathek shii bohkhopho pha adoh ba ro. 9 Jishii Isu shii doh. Hanyie shii ai de ìujia ishak hamangkhliiethek è ìu rab ro, ji è Hamangkhung-aphuii ro bushun è ai ne zab chiang iy dun. Airo iy pha diig chiang ji è ai ne thuh rago rog pha biisiie nane ilab mua pha aishii doh muii ro. 10 Bajo aniphiing shii noh srane airo biisiie ji thang pha diig ji è Isu ne isiie rab chid. Hì pha blia rek pha ne Hamangkhung-aphuii shii rangsua um bie ro, nyieliieshii ai ne rab pha nane zab shii ruii ro. Ithek shii giawo hà noh pha ne Isu jia bie ro. 11 Ai ne branthek shii awaithek layogthek è sud phi, chiih-è nyimanyi ai nane hanyie shii igang rabjong pho ne ò Aphuii ro. Ji è Isu ne ithek shii awai ro haliingpho rone ho pha ji shii ne awo ruii phro. 12 Ai è Hamangkhung-aphuii shii yao,“Gune gui khuiinothek shii na è nyie rekjong phi pha ji yao phi pha ro;Gu ne na shii ithek ro male shii chiong phi pha ro.” 13 Ai è de yao, “Gune guiro migi Hamangkhung-aphuii shii ruii pha ro.” Chiih-è ai è de yao, “Ichiih shii gu ne Hamangkhung-aphuii è phi pha aniphiing rog shii ro.” 14 Ai è ithek shii aniphiing rone ho phane, ibey nane ifai bran ro, Isu awai de ithek duiine rey dun ne ithek tharohthamang ziig ji shii thang. Ai è ji rek pha ji ne nyieliieshii airo iy pha ji è hanyie shii iy pha blu um pha ibuii shii ai ne srobro rek mua pha ji rek, 15 nyieliieshii iy pha ji è rum ne hanyie yi awaithek ro chai khiaothek rek pha ji è ichad phi. 16 Hì ne sang ai è nong phi pha ji ne hamangkhliiethek asi ro. Ji phachiang ai è, Abraham riingthek shii ne nong phi. 17 Hì pha miyaosiu è airo Hamangkhung-aphuii blia shii branthek ro layogthek ne khung mua phi pha ithek ro migithek nane bushunthek pha kho Phabi rey pha zab pha lumuii shii airo khuiinothek duiine rey dun. 18 Chiih-è thuh ai ne hanyie chuajan ithek shii nong mua phi, nyieliieshii ai awai de chuajan nane diig rekjong.

Hebrews 2 (BBT1E)

In Other Versions