Luke 7 (BBT1E)

1 Isu è branthek shii jithek zab yao ched maruii shii, awai ne Khaphernaum hà wuii dun. 2 Roman dumuii è bajo bushun rek pha airo khiao jia um; ji pha bran ye rad ne iy sha pha rek. 3 Dumuii è Isu ro mua ji yoi mage ne, ai è Jewish dukhothek shii ai khiao jishii gang phi pha ho pha thoh ge. 4 Ithek è Isu shii wuii srane wie khung ne yao, “Ji pha bran ne izai naro nong chid pha um ro. 5 Ai ne gathek bran shii miie chiih-è ai awai è gathek shii Jewthek misiahò de rung phi phro.” 6 Ji-è Isu de ithek rog shii wuii gieng. Ai ji pha hò è ruang asi ba shii dumuii ji awai ijakthek shii thoh ne aishii yao yi, “Masdo, nawai shii diig arek chid rabo, Na gu hò shii wuii mua pha ne gu shii ne chua oi ro. 7 Ji è gu de na shii wuii mua sapho asi ro, nane yao bie mage bo, ji arone guro khiao ji ne gang dun phro. 8 Gu, è de dumuiithek boh iliing shii ro, chiih-è gu iliing shii de sandrithek um ro. Gu è jia shii ‘Wuii’ bo è yung ani, ai de wuii dun phro! Chiih-è gai shii, ‘Thawuii!’ bo è yao arone ai de thawuii phro; chiih-è gu gui khiao, ‘Shii hì rek!’ bo è yao arone ai ne rek phi.” 9 Isu è ai miyao ji nuii srane wiengphleg ne idoh rei srane ai rog shii lua pha iphiingthek shii yao, “Gu nathek shii yao, hì duiine pha migi ne thiih de adoh ba ro, chiih-è Israel shii magunde adoh ba ro!” 10 Muapho idoh dumuii hò hà dun shii airo khiao yi gang iang pha doh. 11 Achiadang pha idoh shii Isu ne samoythek nane bran ibrog dog srane ithek shii gang rek yi ne Nain beng pha thiig hà wuii dun. 12 Ai ne thiig pha gak hà nyathog dang shii, ithek bran iy jia han srane fuang hà noh ne wuiiramuii pha doh. Ji pha bran iy yi misiungmuii ro dufuii ji jia ji ro, chiih-è thiig pha bran ibrog de ji pha hò-amuii rog shii wuii gieng. 13 Ithong è hò-amuii shii ji è rey ramuii pha ji riig srane, ai lubu yi ji pha hò-amuii shii bajo bushun now dun, Ji è ai è hò-amuii shii yao, “Acho rabo.” 14 Chiihphado ai è wuii srane bran iy han pha ji shii khoh mage, ji è han pha branthek de thung dun. Jishii Isu è yao, gu na shii yaodang phro, “Filiao bufuii! Sieng mage bo.” 15 Iyjong pha bran ji è siangfad ne dug srane miyao jao ne yao, chiih-è ji pha bran shii Isu è imuii shii idoh phi din. 16 Ji è rek pha ji riig srane zab branthek yi rum ne Hamangkhung-aphuii shii chiong, “Ithek è yao; gethek duchoi shii chaigphuii boh jia khia thog ro! Hamangkhung-aphuii ne awai bran shii ragia rek pha wuii thog ro!” 17 Hì pha Isu pha mua ji yi zab pha soh pha ithua iring hà de zab yoi dun. 18 Jishii Jon ro samoythek è jithek pha miyao aishii yao ched shii, ai è bijiu nyi shii ho, 19 Chiih-è Ithong shii sai pha isa shii thoh ge, “Chiih-è Jon è wuiiramuii ro è yao pha ji bey? Asi pha gathek ne gai shii luthong chid habey?” 20 Ai è Isu shii wuii thog mage shii, isa è yao, “Jon Khowo è gathek shii hì è yao ne sai pha thoh ge ro, Nane Jon è wuiiramuii ro è yao pha ji na bey? Asi pha gathek ne gai shii luthong habey.” 21 Ji pha ishak shii Isu è branthek ro rad pha, miiriie thek nane awie pha ragungthek shii gang phi, chiih-è miegthi pha branthek shii de doh din yi. 22 Ai è Jon ro muapho shii chang, “Nasa nyie doh nyie yoi pha ji ne, idoh dun srane ne Jon shii yao bo: Miegthi pho de doh dun ro, chiih-è lai khi-èg lua ge ro, chiih-è hanyie yi awie pha diig rek ne hìa rad pha bran de so rab ge ro, chiih-è khohphang pho de yoi ge ro, chiih-è iy pho de hòi dinro, chiih-è Mua Wie ne dushothek shii yao dun ro. 23 Gu shii khlam rone anow pho ne bajo sang dun ro!” 24 Chiihphado Jon ro muaphothek è thoh marui srane dun din shii, Isu è bran ibrog shii ai chiang ji jao ne yao: “Nathek è balimuang shii Jon hà wuii shii, nyie shii luthong ne wuii phlei? Nathek yi hasam è saing rab yi thenia thania pha ji riig wuii ne bey? 25 Nathek fuang hà nyie riig pha wuii phlei? Bran yi wie yung guii pha ji riig wuii ne bey? Bran hanyie è ji duiine ne guii ne sang ne rai pho ne saja hò hà doh ruii phro! 26 Gu shii yao riig bo, nathek fuang hà wuii srane nyie riig wuii phlei? Chaigthek shii riig wuii ne bey? Ji ne izai chak ro, jimagunde ithek ne chaig è de bajo boh jia doh yi. 27 Jigigam shii yao pha ji ne Jon ji chak ro, ‘Hamangkhung-aphuii è yao, gu ne gui mua pho shii naro lumuii hong yi pha na ibi thoh ge phro.’ 28 Isu è yao,” Gu è nathek shii izai yaodang phro, “Jishii idang rai pha bran è de Jon boh ba ro. Jishii de Hamangkhung-aphuii pha Sajathua shii ìu um ne de ai ne Jon è de boh ba phro.” 29 Zab pha branthek è aishii yoi, ithek nane mijin thanphothek dungdang ne Hamangkhung-aphuii ro giang nak ne, ithek de Jon ro khowo yie. 30 Jishii Pharisithek nane Iphey yua pha masdothek è Hamangkhung-aphuii munow pha miyao ji snai srane Jon ro khowo de ayie. 31 Isu è yao din, “Chiihphado duchung pha branthek shii, khi-èrek ne chua ne yao sha phlei? Ithek ne khi-èrek pha duiine lei? 32 Ithek ne bajarai pha ithua shii dug ne rai pha aniphiing duiine ne ro. Gai ibrog è gai shii ziak srane yao, ‘Gathek ne phiyiy pha ben nathek shii gang phi, jishii nathek è asiu! Gathek è bi-iy ibai bai shii ithek è achoh phi!’ 33 Jon Khowo phi pha ji wuii thog ne, chiih-è ai ne minyie nyi srane phuii de aniing shii, chiih-è ithek è yao, ‘Ai iliing shii ne ibuii um ro!’ 34 Bran Dufuii yi wuii thog mage ne, chiih-è chie niing shii, ithek è yao, ‘Hì pha bran shii riig bo! Ai ne sugow ne chie niing pha jia ara, chiih-è ai ne mijin than phothek nane layogthek pha ijak ro è yao!’ 35 Hamangkhung-aphuii pha khani è, hanyie è nuii lei ne ji ne izai chak rone doh yi phro.” 36 Pharisi jia è Isu shii ai hò hà michie chie pha ho, ji è Isu yi ji pha Pharisi hò hà wuii srane michie chie sha pha dug. 37 Ji pha thawun shii layog rek ne sieng pha hò-amuii de jia rai. Ai è Isu ne Pharisithek hò hà michie chieramuii pha yoi, ji è ai ne rem no pha (alabasther) sumaro ley jariie yie ne wuii thog ne, 38 Isu idoh shii riu srane, cho ne awai mieg kho è ai lai shii sad phi. Chiihphado è awai khaziang è ai lai shii go rek phi ne, ai lai shii khichiug ne, chiih-è sumaro rek ne aishii shun phi. 39 Pharisithek è ji doh srane, awai shii yao, “Hì pha bran ne izai chaigphuii arone, aishii kho pha hò-amuii ji ne hanyie ga ai ne nyathieg mua phro, chiih-è hì pha hò-amuii yi khi-èrek ne layog è sieng ne rai ji de ai nyathieg mua phro!” 40 Isu gang è aishii yao, “Simon, gu na shii nyie magunde yao pha um ro.” “Simon è chang, Masdo, Yao mage bo.” 41 Isu è jao ne yao, “Buyo buyo shii bran nyi è bang chai pho è bang chai phi, jia è aishii luman pha sikhi wem guii chai, chiih-è bran yoh jia ji è saguii chai. 42 Jishii isa è hanyie de idoh arang mua, jimagunde ai è isa ro muruii shii alia pha thoh muii, ji arone, aishii hanyie è bajo miie ruii phlei?” 43 “Simon è chang,” “Gu munow arone, hanyie shii bajo bang yi pha um shii idoh alia pha thoh muii pha ji è bajo wie now phro.”Isu è yao, “Na miyao ji ne izai chak ro.” 44 Jishii ai è hò-amuii jishii rei srane riig ne Simon shii yao, “Na hì pha hò-amuii shii doh ramuii bey? Gu ne na hò hà wuii shii, na è gu lai sud pha kho de aphi, Jishii ai è awai miegkho è gu lai sud phi srane awai khaziang rek ne sad ne go phi. 45 Na è gu shii ne khichiug srane wie aho ro, jimagunde gu nyawuii thog dang ne ai gu lai shii athodang pha khichiug bamuii ro. 46 Na è gu khrug shii sumaro yow è ashun phi, jimagunde ai è gu lai shii wie now pha thiiliie è shun phi. 47 Ji è, gu na shii yao, airo bajo miie pha ji è airo layogthek ne khungjong ge ro è doh yi ro. Jishii layog ìujia khung bie pha ne, airo miie pha de ìujia bie rone doh yi phro.” 48 Chiihphado Isu hò-amuii shii yao, “Na layog khungjong phi ro.” 49 Gaithek thiibliie shii dug pho è awaithek chung yao rai, “Layog shii rang de khung phi pha hì ne hanyie ga?” 50 Jishii Isu è hò-amuii shii yao, “Naro migi è na shii ragia rek ge ro; na ne liijiing è dun bo.”

Luke 7 (BBT1E)

In Other Versions