Numbers 15 (BONCB)
1 UTHIXO wathi kuMosi, 2 “Tshela abako-Israyeli uthi kubo: ‘Ngemva kokungena kwenu elizweni engilinika lona ukuba libe likhaya lenu, 3 kumele lethule iminikelo yenu eyenziwa ngomlilo KUTHIXO, kusukela emihlambini yenkomo leyezimvu, kube liphunga elimnandi KUTHIXO, kungakhathalekile ukuthi ngumnikelo wokutshiswa kumbe ngumhlatshelo, kungokwezifungo eziqakathekileyo loba iminikelo yokuzithandela loba eyemikhosi emisiweyo, 4 ngakho lowo oletha umnikelo wakhe uzakwethula KUTHIXO umnikelo wamabele oyingxenye eyodwa etshumini lehefa lefulawa ecolekileyo exutshaniswe lamafutha ayingxenye eyodwa kokune kwehini. 5 Lungisa lewundlu ngalinye elomnikelo wokutshiswa loba umhlatshelo ingxenye eyodwa kokune yehini yewayini njengomnikelo wokunathwayo. 6 Kuthi ngenqama ulungise umnikelo wamabele ube yisilinganiso sokubili kokulitshumi kwehefa lefulawa ecolekileyo exutshaniswe lamafutha ayisilinganiso esisodwa kokuthathu kwehini, 7 lewayini eliyisilinganiso sehini esisodwa kokuthathu kube ngumnikelo wokunathwayo. Kunikele kube liphunga elimnandi KUTHIXO. 8 Nxa ulungisa inkunzi eliguqa njengomnikelo wokutshiswa loba umhlatshelo, kusenzelwa isifungo esiqakathekileyo loba umnikelo wobudlelwano KUTHIXO, 9 letha ndawonye lenkunzi umnikelo wamabele acholiweyo aba yifulawa ecolekileyo eyisilinganiso sehefa sokuthathu etshumini exutshaniswe lamafutha ayingxenye yehini. 10 Letha njalo lewayini eliyizilinganiso zengxenye yehini kube ngumnikelo wokunathwayo. Lokhu kuzakuba ngumhlatshelo wokudla, iphunga elimnandi KUTHIXO. 11 Ngakho inkunzi inye ngayinye loba inqama, iwundlu linye ngalinye loba izinyane lembuzi, akulungiswe ngale indlela. 12 Lokhu kwenze emnikelweni ngamunye loba ulungise emingaki. 13 Wonke ozalwa lapha kumele enze lezizinto ngale indlela lapho eletha umnikelo wakhe owenziwe ngomlilo njengephunga elimnandi KUTHIXO. 14 Ezizukulwaneni ezilandelayo, owezizweni loba ngubani ohlezi lani nxa esethula umnikelo owenziwa ngomlilo njengoqhatshi olumnandi KUTHIXO, kumele enze khona lokho elikwenzayo. 15 Imithetho le kumele uyilandele wena labantu bonke kanye labezizweni abahlala phakathi kwenu; lesi yisimiso esimi njalo lakuzizukulwane ezilandelayo. Lina kanye labezizweni lizafanana phambi KUKATHIXO: 16 Lizabuswa ngemithetho lemilayo efananayo lina kanye labezizwe abahlala phakathi kwenu.’ ” 17 UTHIXO wathi kuMosi, 18 “Tshela abako-Israyeli uthi: ‘Ekungeneni kwenu elizweni engilisa kulo 19 lingadla ukudla kwalelolizwe, yethulani ingxenye yakho ibe ngumnikelo KUTHIXO. 20 Lethani isinkwa esenziwe ngempuphu yakuqala lisethule njengomnikelo ovela esizeni. 21 Kuzozonke izizukulwane ezilandelayo lizakwethula umnikelo KUTHIXO uthethwe emputshini yenu yakuqala.’ ” 22 “ ‘Kungakho nxa wehlulekile ukugcina loba yiphi imilayo UTHIXO ayinika uMosi ungananzelelanga, 23 loba yiphi imilayo KATHIXO alitshele yona ngoMosi, kusukela ngosuku UTHIXO amupha yona kuqhubekela ezizukulwaneni ezilandelayo, 24 kanti njalo lokhu kwenzakele ngephutha abantu bengakunanzelele, kutsho ukuthi abantu bonke bakuleyondawo bazanikela ngenkunzi eliguqa kube ngumnikelo wokutshiswa olephunga elimnandi KUTHIXO, ndawonye lomnikelo wamabele lowokunathwayo, kanye lempongo yomnikelo wesono njengokumisiweyo. 25 Umphristi uzakwenzela isizwe sonke sako-Israyeli indlela yokubuyisana, ngakho bazathethelelwa, ngoba bekungayisingabomo njalo banikele KUTHIXO ngokona kwabo umhlatshelo wokudla kanye lomnikelo wesono. 26 Abantu bonke bako-Israyeli kanye labezizwe abahlala labo bazathethelelwa, ngoba bonke lababantu babengonanga ngabomo. 27 Kodwa nxa kungumuntu oyedwa owonayo kungesikho ngabomo, kumele alethe imbuzi ensikazi elomnyaka owodwa ibe ngumnikelo wesono. 28 Umphristi uzamenzela lowo owone ngokwenza isono kungesikho ngabomo indlela yokubuyisana phambi KUKATHIXO, kuthi ngemva kokuba indlela yokubuyisana isiyenziwe, uzathethelelwa. 29 Wonalo umthetho ngowomuntu wonke owonayo kungesikho ngabomo, kungakhathalekile ukuthi ungowako-Israyeli ozalelwe khonapha kumbe ngowezizweni. 30 Kodwa loba ngubani owenza isono ngabomo, kungaba ngowakini loba owezizweni, athuke UTHIXO, lowomuntu uzaxotshwa ebantwini bakibo. 31 Ngenxa yokweyisa ilizwi LIKATHIXO lokwephula imilayo yakhe, lowomuntu ngempela kaxotshwe kwabakibo; uhlala elokhu elalo icala.’ ” 32 Ngesikhathi abako-Israyeli besenkangala, indoda ethile yatholakala itheza inkuni ngosuku lweSabatha. 33 Kwathi labo abamficayo etheza bamusa kuMosi lo-Aroni kanye lakubo bonke abantu, 34 ngoba kungakazakali ukuthi kumele enziweni; wavalelwa entolongweni. 35 UTHIXO wasesithi kuMosi, “Indoda leyo kumele ife. Abantu bonke kumele bamkhande ngamatshe ngaphandle kwezihonqo.” 36 Ngakho abantu bamusa ngaphandle kwezihonqo bamkhanda ngamatshe waze wafa, njengokulaywa kukaMosi NGUTHIXO. 37 UTHIXO wathi kuMosi, 38 “Tshela abako-Israyeli uthi kubo: ‘Kuzozonke izizukulwane ezizayo, kumele lithungele izixha zentshaka emiphethweni yezembatho zenu, isixha ngasinye sibe lentambo eluhlaza. 39 Lizakhumbula imilayo yonke KATHIXO njalo liyilalele izikhathi zonke nxa likhangela intshaka lezi ukuze lingazibhixi ngokulandela izinkanuko zezinhliziyo zenu kanye lamehlo enu liduhe. 40 Ngakho lizakhumbula ukuyilandela yonke imilayo yami ukuze lehlukaniselwe uNkulunkulu wenu. 41 Mina NGINGUTHIXO uNkulunkulu wenu, owalikhupha eGibhithe ukuze ngibe nguNkulunkulu wenu. NGINGUTHIXO uNkulunkulu wenu.’ ”