Leviticus 8 (MAAL)
1 ናንጊና ናንጋ ጎዳ ሙሴም፦ 2 «ዓኣሮኔንታ ዒዛኮ ዓቲንቆ ናኣቶንታ ዓፒሎና ማዢንቴ፥ ታኣኒ ዴሮና ካኣማ ማኣሮ ካሮ ዔኪ ዓኣዼ፤ ዒማና ቄኤሳ ማይንታ ዓፒላ፥ ቲዦ ዛይታ፥ ጎሜ ጌኤሻኒ ዒንጎ ጌሜ፥ ላምዖ ዓዶ ማራታ፥ ሙኑቆ ፃኣዛ ጌሊባኣ ላኣዳ ዓኣ ሌኤማቶዋ ዔኪ ሺኢሼ። 3 ሃሣ ዒስራዔኤሌ ዴሮ ቢያ ፔቴይዳ ዔኤሊ ዒኢካ ቡኩሴ» ጌዔኔ። 4 ናንጊና ናንጋ ጎዳ ዓይሤ ጎይፆ ሙሴ ማዼኔ፤ ዴራኣ ሙኪ ቡካዛ፥ 5 ዒዚ ዔያቶም፦ «ሃሢ ታ ዒንሢኮ ቤርታ ማዻንቴ ዒንሢ ዛጋንዳሢ ናንጊና ናንጋ ጎዳ ታና ዓይሤ ባኮኬ» ጌዔኔ። 6 ሙሴ ዓኣሮኔንታ ዒዛኮ ዓቲንቆ ናኣቶንታ ዓሶ ቤርቶ ሺኢሺ፥ ዋኣፆና ማስቲፆ ዳምቦ ኩንሣኒ ማስኬኔ። 7 ዬያይዴስካፓ ቄኤሳ ማኣዓ ዖዶዞ ቃሚሾ ዓኣሮኔ ማይሲ፥ ዼኤፒ ኮኦቴያ ማይሲ፥ ኬርና ቱኮ ባኮዋ ቱኡሲ፥ ዔፑዴ ጌይንታ ባቃና ዓጎ ባኮዋ ዓጊ፥ ዱማ ጎይሢና ሚዛጲሲ ኮሾና ቃልሾና ዬያ ዔፑዶ ዓይሢ ኬርና ቱኬኔ፤ 8 ዔፑዶኮ ጊዳ፦ ዳዶ ቡራሾ ሲኪ፥ ዑሪሜና ቱሚሜ ጌይንታ ባኮንሢ ጋራ ዓጌኔ፤ 9 ሃሣ ቶኦኮይዳ ዓፒላ ማሬኔ፤ ዬያኮ ባሊቶ ዛሎይዳ ናንጊና ናንጋ ጎዳ ዒዛ ዓይሤ ጎይፆና ዎርቄና ኮሺንቴ ፆኦሲም ዱማዼያ ማዒፆ ዔርዛ ማላታ ማዔ፥ ቦንቺሳ ቆኦቦ ዓጌኔ። 10 ዬካፓ ሙሴ ቲዦ ዛይቶ ዔኪ ዓፒሎና ማዢንቴ፥ ፆኦሲ ዴሮና ካኣማ ማኣሮንታ ጋራ ዓኣ ባኮዋ ቲሽኬኔ፤ ዬያይዲ ቢያ ባኮ ፆኦሲ ማዾም ዱማሴኔ። 11 ቲዦ ዛይቶይዳፓ ዻካ ዔኪ ፆኦሲም ዒንጎ ባኮ ዒንጎ ቤዞ ዑፃ ላንካይ ማይንቲ ፑጬኔ፤ ዬኖ ጎይፆ ፆኦሲ ማዾም ዱማዼያ ማዓንዳጉዲ ሚቺ ዒንጎ ቤዞና ዒኢካ ዓኣ፥ ማዺንቶ ሜሆ ቢያሢ፤ ሃሣ ዋኣፆ ማስቶ ሳኣኖንታ ጌሦ ቤዞዋ ቢያ ፑጬኔ። 12 ቲዦ ዛይቶ ዓኣሮኔ ቶኦካ ዋሂ፥ ዒዚ ፆኦሲ ማዾም ዱማዻንዳጉዲ ቲሽኬኔ። 13 ዬካፓ ሙሴ ናንጊና ናንጋ ጎዳ ዒዛ ዓይሤ ጎይፆና ዓኣሮኔኮ ዓቲንቆ ናኣቶ ዓሶ ቤርቶ ሺኢሺ፥ ቄኤሳ ማይንታ ዖዶዞ ቃሚሾ ማይሲ፥ ኬርኖ ቱኮ ቃልሾ ቱኪ፥ ቶኦኮይዳኣ ዔያቶም ቆኦቦ ዓጌኔ። 14 ዬካፓ ሙሴ ጎሞ ጌኤሻኒ ዒንጊንቴ ጌሜ ዔኪ ሙካዛ፥ ዓኣሮኔና ናኣቶና ጌሜኮ ቶኦኮይዳ ኩጮ ጌሤኔ። 15 ዬያይዴስካፓ ሙሴ ጌሜ ሹካዖ ሱጉፆይዳፓ ኬኤላና ዔኪ ፆኦሲም ዱማዼያ ማዓንዳጉዲ ዒንጎ ባኮ ዒንጎ ቤዞኮ ዖይዶ ዛላ ዓኣ ዻንኮ ቲሽኪ ጌኤሺ፥ ዓቴ ሱጉፆ ዒንጎ ባኮ ዒንጎ ቤዞኮ ዴማ ዋሄኔ፤ ዬያይዲ ዒንጎ ባኮ ዒንጎ ቤዞ ፆኦሲም ዱማሴኔ። 16 ሃሣ ዒዚ ጌሜኮ ጎጶ ባኮ ዑፃ ዓኣ ማሎ ቢያ፥ ማዮኮ ሻኣዣዻ ቤዞንታ ጳላሢያኣ ዒኢካ ዎላ ዓኣ ማሎና ቢያ ዔኪ ሚቺ ዒንጎ ቤዛ ሚቼኔ። 17 ጌሜኮ ዒልዖ፥ ሃንጎ ዓሽኮ፥ ሩቁንቶንታ ሶኦኮዋ ዔኪ ናንጊና ናንጋ ጎዳ ዓይሤ ጎይፆ ጉርዶኮ ዙላ ኬሲ ሚቼኔ። 18 ዬካፓ ሙሴ ሚቺ ዒንጎም ጊኢጊሺንቴ ማራዓሢ ዔኪ ሙካዛ፥ ዓኣሮኔና ናኣቶና ማራዓሢኮ ቶኦካ ኩጮ ጌሤኔ፤ 19 ዬያይዴስካፓ ሙሴ ማራዓሢ ሹኪ ሱጉፆ ሚቺ ዒንጎ ቤዞኮ ዖይዶ ዛሎ ፑጬኔ። 20 20-21 ማራዓሢኮ ዓሽኮ ሜኤሎና ሜኤሎና ቲቂ፥ ጎጶ ባኮንታ ጊንፆ ቶኮንታ ዋኣሣ ማስኬኔ፤ ዬካፓ ናንጊና ናንጋ ጎዳ ዒዛ ዓይሤ ጎይፆ ቶኦኮንታ ማሎንታ ማራዓሢኮ ዓቴ ዓሽኮዋ ቢያ ሚቺ ዒንጎ ቤዛ ሚቼኔ፤ ዬያ ሚቺ ዒንጎናሢኮ ሳዋ ናንጊና ናንጋ ጎዳ ዎዛሳ ሙኡዚ ዒንጊሢ ማዔኔ። 22 ቄኤሶ ዶኦሪፆ ዛሎ ላሚ ዒንጊንታ ማራዓሢ ዔኪ ሙካዛ፥ ዓኣሮኔና ናኣቶና ኩጮ ማራዓሢኮ ቶኦካ ጌሤኔ፤ 23 ዬካፓ ሙሴ ማራዓሢ ሹኪ ሱጉፃፓ ዻካ ዔኪ ዓኣሮኔኮ ሚዛቆ ዋዮ ቤርቶ፥ ሚዛቆ ኩጮና ቶኮናኮ ዶኦሞ ኬኤሎ ቲሽኬኔ፤ 24 ሃሣ ዓኣሮኔኮ ናኣቶ ዓሶኮ ቤርቶ ዔኪ ሺኢሻዖ ሚዛቆ ዋዮ ቤርቶ፥ ሚዛቆ ኩጮና ቶኮናኮ ዶኦሞ ኬኤሎ ዔያቶኮ ቲሽኬኔ፤ ዬያይዲ ዓቴ ሱጉፆ ፆኦሲም ዒንጎ ባኮ ዒንጎ ቤዞኮ ዖይዶ ዛሎ ጎኦቦ ፑጬኔ፤ 25 ዬያይዴስካፓ ማላኣ፥ ዑንኮ ማላ፥ ጎጶ ባኮ ካንቂ ዓኣ ማሎ ቢያ፥ ማዮኮዋ ሻኣዣዻ ቤዞ፤ ጳላሢንታ ዒኢካ ዓኣ ማሎንታ ሚዛቆ ዛሎ ላባዎዋ ዔኬኔ፤ 26 ፆኦሲም ዱማዼያ ማዔ፥ ሙኑቃ ፃኣዛ ጌሊባኣ ላኣዶ ጌሦ ሌማቶይዳፓ ፔቴ ላኣዳ ዔኪ፤ ዬያጉዲ ሃሣ ዛይቶና ዲርኪ ላኣዶና ላኣዳ፥ ሻኣዣ ላኣዳኣ ዔኪ ማሎና ላባዎ ዓሽኮናኮ ዑፃ ጌሤኔ። 27 ዬያ ሙዖ ቢያ ዔኪ ዓኣሮኔና ናኣቶናም ዒንጋዛ ዔያታ ዬያ ዡጊ፥ ናንጊና ናንጋ ጎዳም ዒንጌኔ። 28 ዬካፓ ሙሴ ካሦ ዔያቶ ኩጫፓ ዔኪ፥ ቄኤሶ ዶኦሪፆሮ ሚቺ ዒንጎ ባኮይዳ ቃሲ ጌሢ ሚቺ ዒንጎ ቤዛ ሚቼኔ፤ ዬያኮ ሳዋ ናንጊና ናንጋ ጎዳ ዎዛሳ ሙኡዚ ዒንጊሢ ማዔኔ። 29 ዬያይዴስካፓ ሙሴ ዚኢሮ ዔኪ ዡጊ፥ ናንጊና ናንጋ ጎዳም ዒንጌኔ፤ ዬይ ቄኤሶ ዶኦሪፆሮ ዒንጎ ማራዖኮ ሙሴ ሄላ ቤዞኬ፤ ሙሴያ ናንጊና ናንጋ ጎዳ ዒዛ ዓይሤ ጎይፆ ቢያ ባኮ ማዼኔ። 30 ሃሣ ሙሴ ቲዦ ዛይቶና ዒንጎ ባኮ ዒንጎ ቤዛ ዓኣ ሱጉፃፓኣ ዻካ ዔኪ ዓኣሮኔና ናኣቶናኮ ዑፃ፤ ጊንሣ ሃሣ ዔያቶኮዋ ዓፒሎይዳኣ ቢያ ፑጬኔ፤ ዬያይዲ ዒዚ ዔያቶንታ ዔያቶኮ ዓፒሎንታ ናንጊና ናንጋ ጎዳም ዱማሴኔ። 31 ዬካፓ ሙሴ ዓኣሮኔና ናኣቶናም «ዓፒሎና ማዢንቴ፥ ፆኦሲ ዴሮና ካኣማ ማኣሮ ካራ ዓሽኮ ካሡዋቴ፤ ናንጊና ናንጋ ጎዳ ታኣም ዓይሢ ኬኤዜ ጎይፆ ቄኤሶ ዶኦሪፆሮ ዒንጎ ካሦ ጌሦ፥ ሌኤማቶ ጋራ ዓኣ ካሦና ዎላ ሙዑዋቴ። 32 ዓቴ ዓሽኮ ማዔቴያ ላኣዶ ታሚና ሚቹዋቴ፤ 33 ዒንሢኮ ቄኤሶ ማሂ ዶኦሪፆ ዳምባ ማዺንቲ ኩማንዳሢ ላንካይ ኬሊዳታሢሮ ዬይ ማዺንቲ ጋፓንዳ፥ ላንካዎ ኬሎ ሄላንዳኣና ዓፒሎና ማዢንቴ፥ ፆኦሲ ዴሮና ካኣማ ማኣሮ ካራፓ ዓኣዺፖቴ። 34 ጎሞ ዒንሢኮ ጌኤሻኒ፥ ሃያ ኑ ሃኖ ማዼ ባኮ ኩንሣንዳጉዲ ናንጊና ናንጋ ጎዳ ኑና ዓይሤያኬ። 35 ዬያሮ ናንጊና ናንጋ ጎዳ ዓይሤ ባኮ ቢያ ማዺ ኩንሡዋቴ፤ ላንካዎ ኬሎዋ ጉቤ ዋንቴና ሮኦሪና ዓፒሎና ማዢንቴ፥ ፆኦሲ ዴሮና ካኣማ ማኣሮ ካራ ዴዑዋቴ፤ ዬያ ዒንሢ ማዺባኣቴ ጋዓንቴ ሃይቃንዳኣኬ፤ ዬይ ቢያ ናንጊና ናንጋ ጎዳ ታና ዓይሤ ዎጌኬ» ጌዔኔ። 36 ዓኣሮኔንታ ናኣቶንታ ናንጊና ናንጋ ጎዳ ሙሴ ዛሎና ዔያቶ ዓይሤ ባኮ ቢያ ማዺ ኩንሤኔ።