Isaiah 16 (TBIAOTANT)
1 O Moapɨn atrivim, e Moapian gumazamiziba ara iza Idomɨn nguibar ekiam Selan iti.Eghtɨ atrivim, nɨ sipsipɨn nguziba isɨ da amadaghtɨ, da Saionɨn Mɨghsɨamɨn mangam.Sipsipɨn kaba, Saionɨn Mɨghsɨamɨn gumazamiziba dar ganigh fogh suam,e uam dagɨaba takisɨn mɨn me danɨngam.Gumazir sipsipɨn kaba inigha zuiba,me gumazamiziba puvatɨzir danganimɨn zuir tuavimɨn mangɨ, Jerusalemɨn otivigham.Jerusalem, Saionɨn guivimɨn ababanim gami. 2 Egh me kamaghɨn Judan gumazamizibav mɨkɨm,Apaniba en nguibabar en agɨrazɨ,e ara ghua Arnonɨn Fanemɨn mɨriamɨn ikia,deragha itir puvatɨ.E mati kuarazir nguziba uan mɨkonimɨn suaghireghapura tintinibar ruarimɨn aven arui moghɨn,e ara pura tintinibar arui. 3 Ezɨ, e kamaghsua, ia en akaba tuisɨghɨva, kotɨn aven guizɨn arazimɨn gɨn mangɨ en akuragh.E kamaghɨn ifonge, ia en danganir mogomemɨn mɨn otogh.E mati gumaziba temer ekiamɨn apengan mangɨ aruer dafamɨn mɨzazimɨn uari muegh, an orangtɨzimɨn ikiam moghɨn, e izɨ ian kantri uari mongam.En apaniba en nguibabar en agɨrazɨma, e datɨrɨghɨn pura guighav iti.Kamaghɨn, ia ua e isɨ, apanibar agharim datɨghtɨ,me izɨ pazɨ e damuan markɨ. 4 E uari, e Moapian gumazamizir aragharuiba, ia e ateghtɨ,e izɨ ian tongɨn ian nguazimɨn ikiam.Eghtɨ ia en ganɨva e mueghtɨ,en apaniba e gasɨghasɨghan kogham! “E fo, osɨmtɨzir datɨrɨghɨn e bativir kaba gɨvaghtɨ,en apaniba en kantri ategh mangɨ ua pazɨ e damuan kogh, 5 eghtɨ danganir kamɨn, atrivir mam otogham.A Devitɨn ovavir boribar gumazir mam.Egh a uan gumazamiziba bar men apangkuvigh,egh zurara guizɨn arazimɨn gɨn mangɨ men ganam.A uan gumazamizibar osɨmtɨziba baragh, egh zuamɨra me tuisɨgh me akɨrmɨgham.Egh a zurara arazir aghuibar amusɨ gavgavigham.” 6 Ezɨ Judaba Moapian akar kam baregha, me kamaghɨn uarira uariv gei,“E Moapian arazir uari febar eghaghaniba baregha gɨfa.Me puv ifaghata uarira uan ziaba fa, mɨgɨrɨgɨar guar avɨribagh ami.Me ghaze, me uarira ikia, gumazamizir igharazibagh afiragha, me dɨpofi.E fo, Moapia me gumazamizir ifariba.E nɨghnɨzir gavgavim men akabar ikian kogham. 7 “Kamaghɨn amizɨ, e Moapian gumazamiziba ateghtɨ,me uan kantrin osɨmtɨzim ko mɨzazim bagh aziva arangam.Me fomɨra Kirheresɨn nguibar ekiamɨn ikia,wainɨn ovɨzir mɨdiarir me apuzizir aghuiba api.Men bizir aghuiba, da bar moghɨra ikuvigha gɨfa,kamaghɨn amizɨ, me datɨrɨghɨn dagher aghuir kabagh nɨghnɨgha,bar uarir apangkuvighav arai.Mevzika!Gumazamiziba bar men apangkuvigh me bagh aziam. 8 Me uaghan uan wainɨn azenir aghuir Hesbonɨn nguibar ekiam ko, Sipman nguibar ekiamɨn boroghɨra itibagh nɨghnɨgha,dar apangkuvavɨra iti.Kantrin igharazibar atriviba fomɨra,wainɨn azenir kabar wainɨn dɨpabar amasa bar ifonge.Ezɨ wainɨn dɨpar kaba me gamima, me bar ongani.Ezɨ wainɨn azenir kaba datɨrɨghɨn, bar mɨsigha ikuvigha gɨfa.Moapia fomɨra wainɨn azenir bar avɨriba ike,da Hesbon ko Sipman nguibar ekiamningɨn ikegha,ghua notɨn amadaghan Jaserɨn nguibar ekiamɨn ghua, aruem anadi naghɨn itir gumazamiziba puvatɨzir danganimɨn tu.Egha maghɨra ghua Amangsɨzim Itir Dɨpar Akarem girɨghaghua vongɨn aruem uaghiri naghɨn tu. 9 “Kɨ Jaserɨn nguibar ekiam ko, Sipman wainɨn azeniba bagha azi.Ezɨ nan damazir temeriba uaghan Hesbon ko, Elealen nguibar ekiamning gisɨn iri.Kɨ fo, ia bar ikuvigha gɨfa,kamaghɨn amizɨ, ian gumazamiziba wainɨn azenibar mangɨ,wainɨn ovɨzir andɨziba kuarsɨ bar akuegh dɨm ivemar mangɨgh izegh damuan kogham. 10 Wainɨn azenir kaba, da fomɨra bar puvɨra be,ezɨ gumazamiziba da kuarir dughiamɨn, me bar akonge.Ezɨ datɨrɨghɨn bar akongezir arazir dɨmdɨar kam gɨfa, ezɨ gumazamiziba ua bar akongeghamin ighiabagh amir puvatɨ.Ezɨ gumazamiziba uam wainɨn itarir ekiamɨn, wainɨn ovɨziba mɨrmɨrir puvatɨ.Ikiavɨra Itir God men akaba dukuagha, me bar akongezir arazir dɨmdɨar kam agɨfa. 11 Kamaghɨn amizɨ, kɨ Moapia ko, Kirheresɨn nguibar ekiamɨn gumazamiziba bagha nan navim bar oseme.Gumazimɨn navim bar osemegha gita mɨsogha ighiar amɨrizibagh ami moghɨn, nan navim bar oseme. 12 Moapian gumazamiziba uan asebar ziaba fasa mɨghsɨabar ghuavanega,dar dɨpenibar aven dar dei.Me arazir kabagh amua pura uan gavgaviba agefi.Ezɨ men arazir kam tong men akurvazir puvatɨ.” 13 Moapia ikuvighamin mɨgɨrɨgɨar kaba, Ikiavɨra Itir God bar fomɨram dagh amigha gɨfa. 14 Egha Ikiavɨra Itir God datɨrɨghɨn ua kamaghɨn mɨgei, “Moapia uan bizir aghuiba sara bar gɨvaghamin azenir 3plara iti. 3plan azenir kabanang, dar arueba kɨ vaghvagha, bar deraghavɨra da medi. Ezɨ namba 3ɨn azenimɨn, kɨ mɨkemezɨ moghɨn kɨ bizir kabar amuam. Moapɨn ziam datɨrɨghɨn bar pɨn iti, egh a gɨn bar gɨvagham. Gumazamizir bar avɨrim datɨrɨghɨn kantri Moapɨn iti, eghtɨ men kantri ikuvamin dughiamɨn, gumazamizir varazira an ikɨva gavgaviba puvatɨgham.”