Psalms 40 (TBIAOTANT)

undefined Devit onger akar kam osiri.An onger akar kabar faragha zuir gumazim gɨnɨghnɨgha onger akar kam osiri. 1 Kɨ dughiar bar ruarimɨn Ikiavɨra Itir God mɨzua itima,a nan ararem baregha nan akura. 2 Kɨ mati gumazim torir konimɨn aven ikia oveghasava amima,Ikiavɨra Itir God nan suiragha na gekuigha anabo.Mati kɨ beghneazim bar a giraghugha an aven itima,a ua na asigha dagɨar ekiam gisɨn na afazɨ, kɨ gavgavim inigha tu. 3 An onger akar igiar mam nan akam gatɨ.Kar onger akar e uan Godɨn ziam famim.Gumazamizir avɨrim kamaghɨn ganigh atiatigh an apengan ikɨsɨ,nɨghnɨzir gavgavim Ikiavɨra Itir Godɨn ikiam. 4 Gumazamizir nɨghnɨzir gavgavim Ikiavɨra Itir Godɨn itiba, me bar akongegh.Gumazamizir kaba, me gumazir uari uan ziaba febar gɨn zuir puvatɨgha,uamategha asebar ziaba fer puvatɨ. 5 O Ikiavɨra Itir God, nɨ nan God, nɨ bizir aghuir bar avɨriba e bagha dagh ami.Gumazitam nɨn mɨn amir puvatɨ, nɨ bar me gafira.Nɨ e bagha bizir aghuir avɨribagh ami.Dar dɨbobonim bar ghuavanabozɨ,kɨ da mengan ibura. 6 Asɨzir e mɨsogha nɨ bagha ofa gamiba ko, bizir aghuir e ofan mɨn isa nɨ ganɨdiba,nɨ dar aghua.Asɨzir e nɨ bagha avimɨn tuazɨ bar isigha mɨghɨriziba ko, arazir kuraba gɨn amangamin ofaba,nɨ dar aghua.Nɨn ifongiamra kara, nɨ nan nɨghnɨzim kuightɨ,kɨ nɨn akaba baragh dagh fogh dar gɨn mangam. 7 Kɨ datɨrɨghɨn ghaze,“God, kɨra kara. Moses fomɨra nan gun Akɨnafarir rɨghizimɨn aven osirizɨ moghɨn,kɨ datɨrɨghɨn izegha gɨfa. 8 O nan God, kɨ nɨn Akar Gavgaviba uan navimɨn aven ada arigha,nɨn ifongiamɨn gɨn mangasa bar ifonge.” 9 O Ikiavɨra Itir God, gumazamiziba uari akuva nɨn ziam fer danganimɨn,nɨ en akurazir akar aghuir kam, kɨ an gun me mɨkemegha gɨfa.Nɨ fo, kɨ me mɨkɨm mangɨvɨra ikiam. 10 Nɨ en akuragha ua e inizir bizir aghuir kam, kɨ a modozɨ a narara itir puvatɨ.Kɨ gumazamiziba uari akuvir danganibar kamaghɨn mɨgɨa ghaze,Nɨ zurara en apangkufi,egha mɨkemezɨ moghɨra deragha bizibagh amua, uan nɨghnɨzim gɨghavkɨrir puvatɨ. 11 O Ikiavɨra Itir God, kɨ fo, nɨ nan apangkuvir arazir kam, nɨ anegɨvaghan kogham.Nɨ zurara uan guizɨn akamɨn gɨn mangɨ,na gifongezir arazir kam bagh na geghuv nan akurvagham. 12 Guizbangɨra, arazir kurar bar avɨrim na okarigha itima,kɨ da mengan iburaghburaki.Nan arazir kuraba bar na abɨragha gɨvazɨkɨ ua garir puvatɨ.Dar dɨbobonim bar nan dapanir arɨzibar dɨbobonim gafirazɨ,nan navim bar nan amɨrazɨ kɨ gavgaviba puvatɨ. 13 O Ikiavɨra Itir God, nɨ ifueghzuamɨra izɨ nan akuragh! 14 Gumazamizir maba na mɨsueghtɨ kɨ aremeghasa.Eghtɨ nɨ me abɨnigh men nɨghnɨziba aghamsightɨ, me aghumsika.Osɨmtɨzir kɨ isiba, gumazamizir maba dar gara bar akonge.Nɨ men ziaba abɨnigh me batueghtɨ me mangɨ. 15 Gumazir maba na mɨgɨa ghaze,“A mara! Nɨ magh a baragh!”Nɨ me damightɨme amir arazir kam bagh aghumsɨzir dafam inigh. 16 Gumazamizir nɨ bagha iziba,men naviba deraghtɨ, me nɨ bagh bar akongegham.Gumazamizir nɨn akurvazim iniasa bar ifongeziba,me zurara nɨ mɨnabɨva kamaghɨn mɨkɨm suam,“Ikiavɨra Itir God,a bar ekevegha bar pɨn iti!” 17 Kɨrara, kɨ gavgaviba puvatɨgha uabɨra uabɨn akurvaghan iburaghburaki.Ezɨ Ekiam na gɨnɨghnɨsi.O nan God, nɨ uabɨ nan akuragha ua na ini.Nɨ suighsuighan markɨ, nɨ zuamɨra izɨ nan akuragh!

Psalms 40 (TBIAOTANT)

In Other Versions