2 Chronicles 29 (TOMA)
1 Ezekiase ná-konagi ɠɛni ga puufele maazu lɔɔlugɔ (25), siɛgi zu é zeini la ga masagi. Kona ʋuufele maazu taaʋuugɔ (29) ɠa é kɛɛni masadai zu Zeluzalɛme. Dee laa ɠɛni ga Aɓiya, Zakali ná-doun anzanui ɠɛni de. 2 É Ɠɔoɠɔ GALAGI yiima vai ɠɛɛni ga mɛmɛwola Davide ɠɛʋele fai pɛ su. 3 Ná-masa fai ma ɠona mɔungi ta ma alu mɔungi é Ɠɔoɠɔ GALAGI zei ʋɛlɛi ma ɓogiti daalaoni, é náti kpɛtɛ ʋolu ga niinɛ. 4 É zalaɠa ɠula nuiti ta Levi nuiti tolini, é ti ɠaalɛ ba folo ɠulazu ʋele eteaʋɛ. 5 É ɠɛni ti ma: «Levi mavofodaiti, à woilo gòo ma! À ɓɔɠɔ ɲadena, naa ʋoluma wo Ɠɔoɠɔ GALAGI zei ʋɛlɛi ɓalaa ɲade, wo-mɛmɛwolani ta-ƓALAGI. Nii kpein é GALA sei ʋɛlɛi ɠɔzɔzu, à naati pɛ kula ada ɲadegai ʋa. 6 Mazɔlɔɔ ade-mɛmɛwolani ti ɠɛɛʋɛ ga wooʋalada nuiti, ti Ɠɔoɠɔ GALAGI wanama vai ɠɛɛʋɛ, ti ɠɛlɛ ba, ti ɠɛlɛ sei ʋɛlɛi ʋa, ti ʋoluave Ɠɔoɠɔ GALAGI ʋa. 7 Ti GALA sei ʋɛlɛi laaɠuluga, ti fitinaiti paa, ti looɠo ga ansansegiti gala vai ʋa, naa ʋɛɛ gala zalaɠaiti kula vai ʋa ada ɲadegai zu Izilayɛle ná-GALAGI ʋɛ. 8 Naa ɠa é kɛa Ɠɔoɠɔ GALAGI yiiɠaawanaa Zuda ta Zeluzalɛme ma, é faa maalualuagi nii la ada-nuɓusɛiti ma, é ti ɠɛ ga ɲɛɛɠulasu ani, é ada-yooi ɠɛ ga ziiɓɔlɔ yooi, eɠɛʋelei wa ɓɔɠɔi wo kaazu la. 9 Mazɔlɔɔ ade-ɠɛɛni ti zaaʋɛ boɠa zɔkpɔi yee ɠa, ade-loun zunuiti ta ade-loun anzanuiti naa ʋɛɛ ade-anzaiti ba, naati ti ɠɛa ga kɔɔ luɔiti, ti li ga tiye. 10 Naa ɠa é ba, gè deveʋɛ ga minazeɠe ge ɠɛ ade yɔɠɔzu ada Ɠɔoɠɔ GALAGI, Izilayɛle ná-GALAGI, nii a kɛ ná-ziiɠaawana wolai zeɠe ade maala. 11 Naa ɠa é ba, dòun zunuiti, à looɠona faalakobai ʋa, mazɔlɔɔ wa ɠa é yiimazeɠea ga woye ga wo botii ɠɛ bɛ, wo ɠɛ ga ná-botiɠɛ nuiti, wo ɗa ansansegiti gala bɛ.» 12 Levi nui tɛiti ti zɛba ti botii lɔɔzei: Keɠate mavofodaiti saama, niiti ge ɠɛni de: Amasayi ná-doun zunui Maɠate, Azalia ná-doun zunui Zowɛle. Melali mavofodaiti su, niiti ge ɠɛni de: Aɓidi ná-doun zunui Kise, naa ʋɛɛ Yeɠalelɛle ná-doun zunui Azalia ʋa. Gɛɛlɛson mavofodaiti su, niiti ge ɠɛni de: Zima ná-doun zunui Yoa, naa ʋɛɛ Yoa ná-doun zunui Edɛn ʋa. 13 Elisafan mavofodaiti su, niiti ge ɠɛni de: Simili ta Yeiyɛle. Azafe mavofodaiti su, niiti ge ɠɛni de: Zakali ta Matania. 14 Ɠeman mavofodaiti su, niiti ge ɠɛni de: Yeɠiyɛle ta Simeyi. Yedutun mavofodaiti su, niiti ge ɠɛni de: Semaya ta Uziyɛle. 15 Ti ta-ʋɛlɛyeɠe ɠilagiti su nuɓusɛiti gaalɛɛni ba. Ti ɓegai ma ga ɓɔɠɔ ɲade, ti liini, ti Ɠɔoɠɔ GALAGI zei ʋɛlɛi ɲade fai lɔɔzei, eɠɛʋelei masagi boni la ti ma, ta é zoloo Ɠɔoɠɔ GALAGI laawooiti ma. 16 Zalaɠa ɠula nuiti ti lɛɛni Ɠɔoɠɔ GALAGI zei ʋɛlɛi wu ga ti ná ɲade. Nii kpein é ɠɛni ga kɔzɔba anii, ti ɠɛni naati pilisu ya etea ʋelei koi zaamaʋɛ. Levi nuiti ti ɠɛni naati seɠezu, ti ɠula ga tiye taai ʋa, ti pili Sedelɔn ʋɛtugi zu. 17 Ti naama ɲade fai lɔɔzeini alu mɔungi ma volo mɔungi ma. Foloi lɔsaʋasiɛi ti ɠaani niina ga Ɠɔoɠɔ GALAGI zei ʋɛlɛi ma lɛɛ wosuʋɛ. Ti kɛɛni Ɠɔoɠɔ GALAGI zei ʋɛlɛi ɲade fai ɠa ga folo lɔsaʋa. Folo puugɔ maazu lɔzitasiɛi (16), ti ɓeni ga botii pɛ kɛ. 18 Ti liini masagi Ezekiase ʋɔ bɛ, ti ɠɛ ma: «Gi ɓega ga Ɠɔoɠɔ GALAGI zei ʋɛlɛi ná pɛ ɲade, gala zalaɠaiti kulazuʋɛ, naa ʋɛɛ ma zɔɔlaiti pɛ ba, ta taɓalii nii ɓului a ɗa la ga, nii feai GALA bɛ, naa ɓɔ ba zɔɔlaiti ba ɓalaa. 19 Nii kpein masagi Aɠaze ná-masadai zu, é yɛni ná-kpakagi zu Ɠɔoɠɔ GALAGI laalɔɠɔma, é ti ɠɔzɔ, gi naati pɛ kɛʋele ɓɛtɛa, gi ti ɲade. Ti pɛ ta ʋuuni Ɠɔoɠɔ GALAGI ná-zalaɠa ɠulazuʋɛ laawu.» 20 Poluma zobui, masagi Ezekiase wuzeɠeni ga sobuzobu wolai, é taai ma lotuɠɔiti gaalɛ ba, é zɛba é li Ɠɔoɠɔ GALAGI zei ʋɛlɛi ma ɠoizuʋɛ. 21 Ti ʋaani ga nikɛ zinɛ lɔfela, baala sinɛ lɔfela, baala ziʋo lɔfela, naa ʋɛɛ boli zinɛ ʋa ga koto gba zalaɠai masa pɛlɛyeɠei ʋɛ, seizu ɲadegai ʋɛ, naa ʋɛɛ Zuda pɛ ba. Masagi devei veeni zalaɠa ɠula nuiti zea, ti ga Aalɔn mavofodaiti, ga ti naati pɛ kula ga zalaɠai, Ɠɔoɠɔ GALAGI ná-zalaɠa ɠulazuʋɛ. 22 Zalaɠa ɠula nuiti ti nikɛ zinɛiti kɔdaaleʋeni, ti ma ɲamai zo, ti pili zalaɠa ɠulazuʋɛ ma. Ti baala sinɛiti kɔdaaleʋeni ɓalaa, ti ma ɲamai ʋili zalaɠa ɠulazuʋɛ ma. Ti baala ziʋoiti kɔdaaleʋeni, ti ma ɲamai ʋili zalaɠa ɠulazuʋɛ ma. 23 Naa ʋoluma, boli zinɛiti niiti ti ga koto gba zalaɠai, ti ʋaani ga naati masagi ta bɛbɛi ɠakala, naati ti yeela ti ma. 24 Zalaɠa ɠula nuiti ti bolii naati kɔdaaleʋeni, ti ma ɲamai ʋu zalaɠa ɠulazuʋɛ ma, ti kula ga koto gba zalaɠai, nii a kɛ ti Izilayɛle ná-kotoi gba vai ma ɠɛɛwotii ɠɛ. Tɔɔzei masagi boni é kole ga gala zalaɠaiti ta koto gba zalaɠai maanɛɛʋɛ ga ti ɠula Izilayɛle pɛ bɛ. 25 É Levi nuiti toni Ɠɔoɠɔ GALAGI zei ʋɛlɛi ma ɠoizuʋɛ, kɔtɛgiti ta kɔnigiti ti ti ya, naa ʋɛɛ papaiti ba, é zoloo devei naa ma nii Davide feeni, ta masagi ná-GALA goo wo nui Gade, naa ʋɛɛ GALA goo wo nui Natan ʋa. Tɔɔzei Ɠɔoɠɔ GALAGI ná-devei ɠɛni de nii é puuni GALA goo wo nui naati da, ti bo. 26 Levi nuiti ti loni, Davide ná-gɛingɛin ganiiti ti zoni ti ya, zalaɠa ɠula nuiti ɓalaa ti lo, puʋugiti ti ti ya. 27 Ezekiase devei veeni ga ti gala zalaɠaiti fe ga zalaɠai, zalaɠa ɠulazuʋɛ. Siɛgi zu zalaɠai ɠula ziɛgi zeelini la, guyei looni Ɠɔoɠɔ GALAGI maamusɛ vai ma, puʋugiti ti bu, naa ʋɛɛ Izilayɛle masagi Davide ná-gɛingɛin ganiiti ba. 28 Bɛbɛi pɛ ge nɔkɔni, guye loo nuiti ti ɗa guyei loo, puʋugiti ti ɗa vɛ, eyɛsu ti ɓe ga gala zalaɠai ɠula. 29 Zalaɠai ɓegai ma ga ɠula, masagi ta nui niiti kpein ti ɠɛni ba, ti maayeini, ti nɔkɔ. 30 Naa ʋoluma masagi ta ná-botiɠɛ nu wolaiti ti ɠɛni Levi nuiti ma, ti Ɠɔoɠɔ GALAGI maamusɛ ga guyei niiti Davide ti ɓɛtɛni, naa ʋɛɛ GALA goo wo nui Azafe ʋa. Naati ti guyei looni ga koozunɛɛi, naa ʋoluma ti maayeini, ti nɔkɔ. 31 Ezekiase zɛba é kpɔɛi zeɠe ʋolu, é ɠɛ ma: «Tɛi wo ɓɔɠɔ vea niina Ɠɔoɠɔ GALAGI ʋɛ, à maaɓuɠa ʋɛ ʋa, à ʋa ga zalaɠa zuaiti, naa ʋɛɛ mama fee zalaɠaiti ba, Ɠɔoɠɔ GALAGI zei ʋɛlɛi ma ɠoizuʋɛ.» Bɛbɛi ʋaani ga zalaɠa zuaiti ta mama fee zalaɠaiti, naa ʋoluma zɔiti kpein faaɓɔɠɔ yii ɠɛni ti ʋɛ, naati ti ʋaani, ti gala zalaɠaiti kula. 32 Gala zalaɠai nii bɛbɛi ʋaani la Ɠɔoɠɔ GALAGI ʋɔ, tiegɔi ɠɛni ga: nikɛ zinɛ ʋuulɔfela (70), baala sinɛ ungila (100), naa ʋɛɛ baala ziʋo unfelegɔ (200) ʋa. 33 Naa ʋoluma, zalaɠa ɠiligiti faa zu, ti ʋaani ga nikɛ zinɛ undɔzita (600), naa ʋɛɛ baala waasaʋagɔ (3.000) ʋa. 34 Zalaɠa ɠula nuiti ti la ɠɛni mɔinni ga ti ʋa naama zuaiti pɛ kɔlɔɔ. Ti-ɠɛɛlointi Levi nuiti ti ɠɛni ɓɔsu ti ʋa, eyɛsu botii naa ɓe, ta eyɛsu zalaɠa ɠula nui taɠiligaa ti ɓɔɠɔ ɲade. Tɔɔzei Levi nuiti mu ti zuvilɛni ga ɓɔɠɔ ɲadega, é leʋe zalaɠa ɠula nuiti ba. 35 Gala zalaɠa mɔinmɔingiti poluma, kɛni ziilɛi zalaɠaiti ma wulɔiti ta la ɠala, puya zalaɠai niiti ti ga dɔɔi, ti ʋilɛsu gala zalaɠaiti polu, naati ti vaza. Ʋele ɠana GALA dɛbi vai lɔɔzeini la ʋolu Ɠɔoɠɔ GALAGI zei ʋɛlɛi wu. 36 Ezekiase ta nuɓusɛiti pɛ ti ɠoozunɛɛni ga ʋelei GALA ge loni la naama vaiti untuɠɔ, tɔɔzei niima vai pɛ ge ɠɛɛni fala ga pagɔ.
In Other Versions
2 Chronicles 29 in the ANTPNG2D
2 Chronicles 29 in the BNTABOOT
2 Chronicles 29 in the BOATCB2
2 Chronicles 29 in the BOGWICC
2 Chronicles 29 in the BOHNTLTAL
2 Chronicles 29 in the BOILNTAP
2 Chronicles 29 in the BOKHWOG
2 Chronicles 29 in the KBT1ETNIK
2 Chronicles 29 in the TBIAOTANT