2 Peter 2 (TOMA)
1 Zɛɛ ɠala goo wo nuiti ti ɠɛni nuɓusɛiti saama mɔungi. Zenɔ ɠana niizu, zɛɛ ɠalamɔinti ta lɔ wo zaama ga undaaʋili kala ɲɔiti. Ta ɠɛlɛ Maliɠii ʋa, é ti unmɔɔni. Ta undaaʋiligi mɛɛnsu ɓɔɠɔ ma ga gaazuvilɛi. 2 Ma mɔinmɔin ka ʋilɛ ti ʋolu ta-ɓaaɠulama vaiti su. Ti maaʋele ma, woo ɲɔi ɠa wo gaama ʋelei laalɔɠɔma. 3 Koozu yii maaʋele ma, ta wo ɠɛ ga ta-wali zɔlɔɔ saɓui, ga yaava ɓɔɛiti, tiya ɓɔɠɔi ti ti ɓɛtɛai. Kɛlɛ kaite suɠooza ta-ʋeelala vai ɠɛʋele ɓɛtɛʋɛ ná ga é loo ti ma, ta-undaaʋiligi ɠa ti ɠaiziɛzu. 4 Mazɔlɔɔ GALA ge la ɠɛni geezuɠeelaiti gaazumaazasani niiti ti kotoi ɠɛɛni, kɛlɛ é ti ʋilini undaaʋili adaʋɛ, ʋɛ é ti makɛgai ná, é ti ɠili ga yɔlɔɠɔi kpidii zu, eyɛsu tukpɔɠaaleʋe voloi. 5 É la ɠɛni etea wɔlɔmai ɠaazumaazasani, kɛlɛ é ʋaani ga ziɛve golai GALA gaazuluabalala nuiti ta-eteai naa zu. É Nowe nɔ ɠizoni, nii é telebodai ma lɛnɛgi wosu, ta nu lɔfela ɠiligaa. 6 GALA ge taa wolaiti peelalani, ti ga Sɔdɔme ta Gomɔɔl, é ti ɠoloɠolo ga abui, ti ɠɛ ga zuʋui, é ti ɠɛ ga poogi GALA gaazuluabalala nuiti bɛ, é ʋilɛ faiti ba ti ʋaazu. 7 É telebo nui Lote ɠizoni, nii zii ɠɛni ɓɔlɔzu gola ga faa ɲɔu ɠɛ nuiti ta-ɓaaɠulama vaiti. 8 Mazɔlɔɔ telebo nui tɛi ɠɛni zeini ti zaama, é ɗa faiti ka, é ɗa ti mɛni, ti ɗa ziiɓɔlɔ folo-o-folo ga ta-lɔ koloɠologiti. 9 Tama, Maliɠii zoogɛ GALA gaazuluaba nuiti kulazu ʋoluɠulai zu, ta é kwɛɛ ʋele a telebotala nuiti makɛ da, é ʋa ti nimiza tukpɔɠaaleʋe voloi, 10 ma un ge daa ma mɛɛ ga naati, niiti ti ʋilɛsu kɔzɔba ɠisiɛiti polu, nii a kɛ ti ɗa ti-ɓusɛi yiimai vai ɠɛ, ti ɗa maliɠilai ʋɛlɛʋili.Ɓɔɠɔlɛsu nui naati, ti ga waso nuiti, ti la unfema veezu lɛbiya yɛnvuiti bɛ ti geezuʋɛ, kɛni ti ɗa ti ʋoomu. 11 Anɛɛ geezuɠeelaiti, ti-zɛbɛi wɔɔlɔai ta ta-zobogi zɛɛ ɠalamɔinti ba, ti la ɗa ga maalɔɔ ʋoomu goo woga ti ma Maliɠii ɠaazu. 12 Kɛlɛ numai naati ta ʋilɛsu nɔ ti-wɔinma vai nɔ ʋolu, ti ɠulaʋɛ ga dɔɓɔ zuaiti, niiti ɠi ge la ti ma, ti zoloogɛ ga ti zo, ti ti ʋaa. Nii ti la kwɛɛ, naa ɠa ta ɗa poomu. Ti undaa ɠa ʋili ɓalaa, eɠɛʋelei suaiti undaa a ɗa ʋili da. 13 Faa ɲɔi nii ti kɛai, naa ma zii ɠa a ɠɛ ga ti-zalai. Ti-yiimai ɠa ga ti ɗa koloɠologi ɠɛ kɛlɛmaʋɛ. Ta ɠɛna wo zaama, ta wa-vɛtii ɠɔzɔzu, ti ɓaaɠula ma, keleɠele ɲɔi nɛɛ ti ʋɛ. 14 Wɛɛnziɛ gaazuʋɛ ɠa é ti unma, ti la ɓɔlɔa ga kotoi ɠɛɛ vai. Nuiti ti zɛbɛ la lɔɔni ga pagɔ, ta naati sosu ga balii, ti-yii laavegɛ ga naavolo wɔin lateʋegai. GALA ná-foovooi ɠa ti ʋa. 15 Ti zeɠea ʋoluma pele zɔlegi ʋa, ti ɓɔɠɔ ɠakani ti ʋilɛ fai zu Ɓozɔɔl ná-doun zunui Ɓalaame ná-pelei ma, nii telebotala wali mii vai nɛɛni bɛ. 16 Kɛlɛ zelii loni ma, tɔ ɓɔɠɔi ná-tɔ koloɠologi maaʋele ma. Soovale saai nii daa la bɛ, naa ɓɔɛni pɔ ga nuɓusɛ ɓɔɛ wooi, é GALA goo wo nui Ɓalaame ná-keleɠeletalai ɠwɛteʋe. 17 Ta ga ziɛyeɠeiti niiti ziɛ la ti zu, ti ɠɛ ga tonaɓiingiti tɔngɔlɔ fiilɛi ti ɓɛɛzu ga. Kpidi ɓɔii ɠa makɛgai ti laalɔɠɔma. 18 Ta-waso kpɔɛ wafuungiti maaʋele ma, ta naati yaavazu ga kpusɛi zu ani wɔin ɲɔi, niiti ti ɠulaai nɔ feya nuiti zea niiti ti kaka pelei ziɛzu. 19 Ti ɗa minazeɠe ga nuiti ta-wɔɔlɔya vai, tama tiya ɓɔɠɔi ti ga duɔiti faa luulaiti zea, mazɔlɔɔ zɔi é pilɛ sɔlɔɔsu è ma, ɗa ga naa ná-duɔi. 20 Tama, ni nuiti kulaa ʋoluma eteai ná-kɔzɔba vaiti su, de-Maliɠii, de Ɠizo Nui Yesu Kilista ɠwɛɛgai maaʋele ma, ni ta lɔɔna etea vaiti su ʋolu ga niinɛ, ti ɓɔɠɔ yɛ ná naati ti vɔni ti ma, ti-ɠaaɓelazuʋɛ ɠa ɲɔu, é leʋe ma mɔungi ʋa. 21 Mazɔlɔɔ a la vizɔ ti ma ga ti mina telebo pelei ɠwɛɛ, é leʋe kwɛɛgai ʋa, ti ʋa zeɠe ba, ti ɠale ma, ti zeɠe deve ɲadegai ʋa, nii é veeni ti ya. 22 Nii kɛai ga tiye, naa ɠa faalaalii naa ná-gaamai lɛɛzu ga: «Gilɛi ɠalega ma ná-unpiligi ma, boigi maagbaai feya, é ɠalega ma, é ɠilikili palaʋalai zu».