Amos 6 (TOMA)

1 Maanɔɠɔi ɠa wo luɠɔ,wɔiti wo zɛnvui wosu ziilɛigi zu Siyɔn,wa kaazu ga wa kpaamaazui zaama Samali ɠizei ma.Ungo, wa ʋe, wɔigiti wo ga zii mɔungi ma nu wolaiti,wɔiti Izilayɛle nuiti ti ɓizɛzu, ti ɗa ʋa wo ʋɔ bɛ. 2 «À li Kalené, wo naa ɠaa, nii kɛai ná.Wa zeɠena miná, wo li Ɠamate taa wolai zu.Naa ʋoluma, à yei Filisiti nuiti ta-laazuʋɛ Gate.Wa pɛtɛ ni taai naati fizɔgɛ wa-masa taai niiti ba,ɓaa ni ta-you zɛʋɛi wɔɔlɔʋɛ wɔnɔi ʋa.» 3 Wa ɠisiɛzu ga wo maanɔɠɔ voloi maaɠooza ɓɔɠɔ ʋa,kɛlɛ tɔun tooma masadai ɠa wo tolisu ɓɔɠɔ ma. 4 Wɛlɛ wo ʋa, wo laani bete ʋagɔiti su,ti ʋɔnɛai ga see ɲiigai,wo zakpamaalɛgai wa-ʋeteiti su,wo ɗa baala ziʋoiti mi,ta nikɛ yiʋoi niiti ti wulɔai. 5 Wa guyei loozu nɔ lein kɔnigi bu,wo ɗa Davide laaʋokɔɠɔga wa ɓɔɠɔi wa-ɠɛingɛin ganiiti. 6 Wa dɔɔi ɓɔlezu gɔwɔ wolaiti su,wo ɗa gulɔ maku nɛɛnɛgiti siɛ wɔungiti su.Kɛlɛ wo la yiizoolɛzu ga maanɔɠɔi naa,nii é ʋaazu Zozɛfe ná-bolodamaiti pɔ. 7 Naa ɠa é ba, nii ɠa gè bosu niina,wa ɠa wo ɠɛɛzu ʋelelaʋɛ,ti ɗa li ga woye duɔlai zu.Ɲaka nuiti ti laani ta-ʋeteiti su, ta-vɛtii ɠa ɓe! 8 Maliɠii Ɠɔoɠɔ GALAGI ɠonaʋɛ ɓɔɠɔ ma, é ɠɛ ma:«Nà Samali taai veezu sili nuiti zea, ta nii kpein é su,mazɔlɔɔ Zakɔɓe mavofodaiti ta-wasogi ʋɛlɛ la bɛ̀,ti-ʋoluzeizuʋɛti wɔinzeɠea mà,»Ɠɔoɠɔ GALAGI, Fai-Pɛ-Maliɠii wooi ɠana. 9 Ni zunu puugɔ a ɠɛna pɛlɛyeɠe ɠila bu, ti pɛ ta za. 10 Ni poomai ta ná-nui ta a ʋaana ga é kula pɛlɛi wu, é gala, toɠa naama nui ɠaazaɠa, nii é pɛlɛ ʋoluʋɛ, é ɠɛ ma: «Nu ɠili ka dɛ è ɠoba ɓaa?» Naa ɠa gooɠaaʋote, é ɠɛ ma: «Nu nɔpɛ ge la mɔ ʋɛ.» Zɔi ɠa ɠɛ bɔɔlai ma: «Maaɠɛ kpɔ! Mazɔlɔɔ é la vizɔni ga nu Ɠɔoɠɔ GALAGI loli niima ziɛgi zu.» 11 Mazɔlɔɔ Ɠɔoɠɔ GALAGI ɠa devei veezu,pɛlɛ wolaiti ta ɠolo,ma goiti ti ʋaliʋali. 12 Kaipa wo mɛniga ga sooi ɠa ɗa ɓizɛ fasai ma?Ɓaa nu ɠa wozai woli kpoloɗɛi ɠa ga nikɛiti?Kɛlɛ wɔun, wa telebodai valibosu ga anivebɛi,wo sɔledai valibo ga ani wanai. 13 Wa ɠoozunɛɛzu Lodeɓaal zo fai zu wo ʋɛ,wo ɗa ɠɛ ma: «Gi ɓɔɠɔ zɛbɛi maaʋele lɛigi ʋa Kaalenayime taa wolai zo da ɓaa?» 14 «Ee, Izilayɛle nuɓusɛiti, nà zii ɠila buzeɠezu wo laalɔɠɔma,nii a zei wo ɠa, é zo Leɓo-Ɠamate,é zeeli Zuludɛn ma ʋɛtu nɛmɛi zu ɠɔtuɗɛi ma,»Ɠɔoɠɔ GALAGI, Fai-Pɛ-Maliɠii wooi ɠana.

Amos 6 (TOMA)

In Other Versions