Amos 6 (YAPE)

1 Kar mu gafgow gad e pi’in ni gimed be par u Zion nib mom urngin ban’en ngomed ndariy ban’en ni be magafan’med ngay, nge gimed e pi’in ni kam pired u Samaria ni gimed be finey ndariy ban’en nra buch romed, ni gimed e pi tagagiyeg ni gilbugwan ko fare nam nu Israel nib ga’, gimed e pi’in ma yib e girdi’ ngomed ni ngam ayuweged! 2 Marod ngam yaliyed e binaw nu Kalneh. Mi gimed yan u rom ko fare binaw ni ba ga’ nu Hamath, mi gimed yan u rom nga p’ening ko fare binaw rok e piyu Filistia ni er yu Gath. Gur kabfel’ fapi binaw ko nam nu Judah ngu Israel? Gur ba ga’ taferad nga tafenmed? 3 Gimed be guy rogon ni ngam mal’af niged fare rran ni bay yib e gafgow ngomed, machane ngongol ni gimed be tay e be chugur nag e re rran nem. 4 Ri bay mu gafgow gad e pi’in ni gimed be k’iyagmed nga daken yungi couch ni fefalel’, gimed be li’ pifak e garbaw nge saf ngu’um mur gad. 5 Gimed ba’adag ni ngu’um tunguyed e tang, mi gimed chubeg e harp, ni bod ni i rin’ David. 6 Gimed be unum e wayin ni yu dabiy, ma gimed be thiy ko tin th’abi fel’ e florida, machane da mur yor niged e mogothgoth nike tay yu Israel. 7 Ere gimed e som’on ni bay ni fekmed nga reb e nam ngam kalbus gad. Pi madnom nge pi mur ni gimed be tay e bayi m’ay. 8 I SOMOL ni Th’abi Tolang ma Gubin ma Rayag Rok e ke micheg e re thin ney nib ginaeng ni ga’ar: “Kug fanenikay e ufanthin ko girdi’ nu Israel; kug dabuy e pi naun rorad ni fafelel’ ma gagang. Bay gu pi’ fare binaw ni tochuch u taferad nge urngin ban’en ni ba’ riy nga pa’ e to’ogor rorad.” 9 Fa’anra ragag e pumo’on ni magach u reb tabnaw, ma bay ramad’. 10 Be’ rok fare yam’ ni ireram e cha’ ni ga’ ko fare magawon e ir e nge fek downgin fare pumo’on nga wean. Ma ir e ra pining e en kabay u naun ni nge ga’ar, “Kabay be’ ni gimew u wur?”Ma ra fulweg facha’ ni ga’ar, “Dariy!”Ma aram e facha’ ni girdi’en fare yam’ e nge ga’ar, “Mu th’ab gulngam! Thingar da kol ayuw gad ni dab doged fithingan SOMOL.” 11 Nap’an nra non SOMOL ma pi naun nib ga’ nge tin ba’achig e bay ni bilig nge yochyang u but’. 12 Gur ma titimo’og e os u daken e war? Gur bay be’ nma gi’ e garbaw rok e day? Machane kam pingeged e tin nib yal’uw ke ngal’ ni yub, ma kam pingeged e tin nib mat’aw ko kireb. 13 Gimed ba uf ko fare binaw nu Lodebar ni kam koled. Be lungumed, “Gu koled yu Karnaim ya gamad ba gel. 14 I SOMOL ni Got ni Gubin ma Rayag Rok e be ga’ar, “Girdi’ nu Israel, aram e nggu l’oeg e salthaw u reb e nam ngar pired ko nam romed. Ni ra gafgow nagmed ni tabab u Hamath Pass ko lel’och nge mada’ ko fachipa’ i lul’ nu Arabah u lan e yimuch.”

Amos 6 (YAPE)

In Other Versions