Daniel 9 (TOMA)
1 «Zɛɛlesɛse ná-doun zunui Daliyuse ná-masadai ma ɠona mɔungi, Mɛde nuiti ma zii, é ɠɛni ga Ɓaɓilɔne nuiti ta-masagi, 2 nà Daniyɛle, gè sɛʋɛ ɲadegaiti kalani, gè naa ʋoluʋɛ ɠaaɠaani naazu, nii Ɠɔoɠɔ GALAGI boni GALA goo wo nui Zelemi ma, é lo kona ʋuulɔfelai (70) ma vaa ʋa, nii Zeluzalɛme maanɛɛni é kɛ koloɠologai zu. 3 Gè ɠaaʋoteni Maliɠii GALA ma, nii a kɛ gè GALA falii ɠɛ ta gè maanɛɛnɛi wo, gè zugi zo, gè saa wɔlɔ wo seɠei looni ɠɔba, gè zuʋui ziɛ ɓɔɠɔ ma. 4 Gè Ɠɔoɠɔ GALAGI nà-GALAGI valini, gè kotoiti ma losɔgai wo, gè ɠɛ ma: ‹Ee, Maliɠii, GALA golai nii maayikiai, ɗɛi è ɗa minazeɠegi laazeelizu naati bɛ niiti ti ɠolozu ɗa-leveiti bɛ, ɗa ga wooɠɛɠila nu naati bɛ niiti ti è nɛai ʋɛ, 5 gi kololalai ɠɛɛʋɛ, gi kotoi ɠɛ, gá ga sɔba nuiti, gi wuzeɠeʋɛ è laalɔɠɔma, gi ʋoluavegɛ ɗa-leveiti ba ta ɗa-lɔgiti. 6 Gi la woiloni ɗa-wotiɠɛ nuiti GALA goo wo nuiti gooi ma, niiti ti ɠɛni ɓɔɛzu è-laaseigi zu gá-masagiti pɔ, ta gá-ɠundiɠiiti, ta gi-mɛmɛwolani, ta zooi zu nuɓusɛiti kpein pɔ. 7 Ɗɔun, Màliɠii, è lelebogɛ! Gɔun, gi letema, unfegi ɠa gi su, eɠɛʋelei é la za voloi zu, zekana é la gi ya, Zeluzalɛme nuiti, gɛi gi ga Zuda you zu nuiti, ta Izilayɛle nui zɔiti kpein, ɓuɠama ɓaa ɠoozama, niiti ti vazagai zooiti su, ʋɛ è ti ɓɛai, ti vaza náti, tɔɔzei ta-wooʋaladai ʋa nii ti kɛɛni è laalɔɠɔma. 8 Ɠɔoɠɔ GALAGI, unfegi ɠa gi ɠaazu, gá gá-masagiti, gá gá-ɠundiɠiiti, gá gi-ɠɛwolani, mazɔlɔɔ gi kotoi zeɠea è ʋɔ. 9 Kɛlɛ ɗɔun ɗa, Maliɠii gá-ƓALAGI, ɗa gi zuvaayɛsu ɗa-maawɔinɠai zu, anɛɛ ni gi wuzeɠeni è laalɔɠɔma. 10 Gi la woiloni è-woo ma, siɛgi zu è ɠɛni bosu la gi ma ga gi ɠolo tɔgiti bɛ è ti lɛɛni ga giye ga ɗa-wotiɠɛ nuiti GALA goo wo nuiti maaʋele. 11 Izilayɛle nuɓusɛiti kpein ti ɗa-lɔgi ɠoloɠoloni ta ti ʋoluave ga ti mina woilo ɗa-lɛnɛ gooiti ma. Gá-ɠololalaiti maaʋele ma, foovooi ma vai zɛʋɛai ɗa-wotiɠɛ nui Moize ná-tɔgi zu, naa laa gi unma. 12 È naa laazeelia, nii è boni é lo gá ɓɔɠɔgoi gi ʋa, ta kundiɠiiti ti gi levezu. È ʋaa ga maanɔɠɔiti gi ʋɔ Zeluzalɛme, niiti nu la dɛ ti ɠɛɠala ɠaani ada ɠili eteai zu. 13 Eɠɛʋelei sɛʋɛai la Moize ná-tɔgi zu, naama maanɔɠɔiti kpein ti zeeliʋɛ gi ma. Gɔun gá, Ɠɔoɠɔ GALAGI gá-ƓALAGI, gi la è maanɛɛnɛni, gi la ʋoluaveni gá-vaaɠaaza golaiti ba, ta gi la ɗa-ɠaamai yɔɠɔzuɠulani. 14 Naa ɠa é kɛa è niima maanɔɠɔiti seiɗa gi ma. Tɔɔzei Ɠɔoɠɔ GALAGI gá-ƓALAGI, è lelebogɛ naa kpein su nii è kɛɛzu, kɛlɛ gɔun, gi la woiloni ɗa-lɛnɛ gooiti ma. 15 « ‹Maliɠii gá-ƓALAGI, siɛgi zu è ɗa-nuɓusɛiti kulani la Ezipete yooi zu ga ɗa-ɠaaɓaai, è lɔɠɔ zɔlɔɔgɛ nii é wosu zaaɠaza. Kɛlɛ gɔun, gi kololalai ɠɛɛʋɛ, gi ɠɛ ga sɔba nuiti. 16 Maliɠii, ɗa-vaaɓɔɠɔiti maaʋele ma, ɗa-yiiɠaawana wolai ɠaaɠale ma, é mina zeeli Zeluzalɛme ma, ɗa-laa wolai, ta ɗa-ɠize ɲadegai. Gá-vaaɠaaza golaiti maaʋele ma ta gi-ɠɛwolani ta-ɠotoiti, ziiti ti gi-maaɠoolii zu Zeluzalɛme ta ɗa-nuɓusɛiti goizuɓɔlɔzu ga poomugiti. 17 Woilo deɠɛmu, Maliɠii gá-ƓALAGI, GALA falii ma ta maanɛɛnɛiti ma gè ti laazeelizu è ma, nɛ̀i gè ga ɗa-wotiɠɛ nui. Ɗa ɓɔɠɔi ɗa-nɛɛbɛi vaa zu, ɠaazu ʋagɔi lo ɗa-ada ɲadegai ʋa, nii koloɠologai. 18 Nà-GALAGI, woilo ga pagɔ, ɠaazuzeɠe ma, è wɛlɛ gá-laa wolai ɠoloɠolo pelei ʋa, nii è-laaseigi ʋɛai ba. Mazɔlɔɔ gá-wotiiti ma lelebo faa laade gi ʋa ɠɛ gá-maanɛɛnɛ wooiti daazeelizu la è ma, kɛlɛ kɛni ɗa-maawɔinɠaa wolai maaʋele ma. 19 Maliɠii, woilo gi-woo ma! Maliɠii, gi zuvaayɛ! Maliɠii, woilo! Ɗa ɓɔɠɔi ɗa-nɛɛbɛi vaa zu, nà-GALAGI, gi maalobo. Mina nɛkɛ niima laa wolai vaa zu, ta niima nuɓusɛiti ti ɠalivaai è ma.› » 20 «Gè yɛni GALA falizu, gè ɗa laa zɔ ga ga nà-kotoiti faa ta nà-nuɓusɛi Izilayɛle nuiti ta-ɠotoiti faa, ta gè nà-maanɛɛnɛ wooiti daazeeli Ɠɔoɠɔ GALAGI nà-GALAGI ná-gize ɲadegai vaa zu. 21 Siɛgi zu gè ɠɛni ɓɔɛzu la ɠana, geezuɠeelai Gaɓiliyɛle, nii gè kaani nà-kulakɛlɛmai zu nii teʋegai, é ɠoʋeni ga gaazuvilɛ, é maaɓuɠa bà, kpɔkɔ volo zalaɠa ɠula yeeɠɛɠalai. 22 É ɠigi veeni bɛ̀, é ɠɛ mà: ‹Daniyɛle, pàaʋɛ niizu ga gè è ɠisuɠala, è gaaɠa ga 23 è GALA maanɛɛnɛ vai lɔɔzeiɗai ma feya, keela wooi ta woni, naa ɠa pàai daazeelizu è ma, mazɔlɔɔ GALA ge è nɛɛʋɛ ʋɛ. Ɠaaɓa è keela wooi nii ɠaaɠa, è kulakɛlɛmai ʋoluʋɛ yɔɠɔzuɠa. 24 « ‹Siɛgi teʋeai ba ɗa-nuɓusɛiti ta ɗa-laa wola ɲadegai vaa ma, naa ɠa é ga puulɔfela (70) zeizu ɠɛ ga kona dɔfela, siɛgi naa vizɔgɛ naa ɠa a kɛ kololalai ɓe ta faaɠaaza golaiti, ta kotoiti ti gba, naa ɠa a kɛ ɠɔoɠɔ telebodai ɠula kɛlɛma, nii a kɛ ɓalaa kulakɛlɛmai ta GALA gooi ti laazeeli, ta nii a kɛ GALA sei ʋɛlɛi ɠaliva ʋolu ga niinɛ. 25 Pɛtɛ nii maanɛai è kwɛɛ, è gaaɠa: É zo naama yeeɠɛɠalai ma wooi woni la, é lo duɔlai ɓe fai ʋa, ta Zeluzalɛme lo fai ga niinɛ, eyɛsu zɔi gulɔi ziaai ma nii a kɛ é ɠɛ ga kundiɠii, naa ɠula kɛlɛma, yeeɠɛɠala lɔfela zeizu ɠɛ ga kona dɔfela. Naa ʋoluma, yeeɠɛɠala ʋuulɔzita maazu felegɔ (62) kona dɔfela laawu, taa wolai ta ma wuulaagiti ta lo ʋolu, kɛlɛ naama voloi zu vaiti ta wola ɓaa. 26 Yeeɠɛɠala ʋuulɔzita maazu felegɔi (62) a ɓena, zɔi gulɔi ziaai ma nii a kɛ é ɠɛ ga kundiɠii, naa ɠa za, nu nɔpɛ ge la maaloboga. Naa ʋolu kundiɠi ɠila ka ʋa ta ná-kɔɔɓɔgi, ti taa wolai ta ada ɲadegai ɠoloɠolo. Kɛlɛ kundiɠii naa ná-fai ɠa ɓe eɠɛ ziɛve ka li ga ani. Kɛlɛ eyɛsu é za, toɠa faa zuɠoloɠolo kɔɔi ɠɔ, eɠɛʋelei naa leveni la. 27 Kona dɔfela ma yeeɠɛɠalaiti daawu, toɠa minazeɠe kpaagiti kpɛtɛ ti yɔɠɔzu ta nu mɔinmɔin. Kona saʋagɔ ta tukpɛgi (3,5) ɠa ɓena, toɠa zalaɠa ɠula vaiti seɠe ga ta GALA kɔɔiti. Kɔzɔba vaa wolai ɠa lɔ GALA sei ʋɛlɛi wu, eyɛsu faa zuɠoloɠologi kpein nii ma levei wogai, naa loo ada zuɠoloɠolo nui ɓɔɠɔi ma.› »