Deuteronomy 19 (TOMA)

1 Siɛgi zu Ɠɔoɠɔ GALAGI wa-ƓALAGI ʋaazu ziiti kpɛɛzu la, niiti é pɔ é ta-yooi ve wo ya, siɛgi zu wo ti ɓɛɛzu la, wo zei ta-laaiti su, ta ta-ʋɛlɛiti bu, 2 wa taa saʋagɔ yɛ ná yɛ zooi zu, nii Ɠɔoɠɔ GALAGI wa-ƓALAGI feezu wo ʋɛ ga wɔnɔ. 3 Wa peleiti to ti ʋa, nii a kɛ nu ʋaa nui ɗa lɔɔɠuzu ɠaiziɛ ná, wa zooi ʋalisu ga saʋagɔ, nii Ɠɔoɠɔ GALAGI wa-ƓALAGI feezu wo ʋɛ ga wɔnɔ. 4 Wɛlɛ ʋelei nu ʋaa nui maanɛai la, é ɓɔɠɔ maaʋela la, taai naati gila su, zɛnvui ʋa ɠizo: Ni é seiɲɔɠɔi ʋaaʋɛ, é la gaaɠilini ma, naa ná-wɔinzeɠema ɠi ge la ɠɛa kisu kaipa. 5 A ɠɛna nɔ ga tanisu ti li ta bɔɔlai dɔɓɔi zu, gulu leʋezuʋɛ, a yɛna gului ʋɔsu, zoovɛi ɠula ma ungi ɠa, é bɔɔlai zaɠa, é za. Zunui naa ɠa zoo é ʋela, é li taai naati gila su, zɛnvui ɠizo, 6 naa ɠa a kɛ, ɲamai ʋotokula nui mina lia ʋilɛsu polu, ná-ziiɠaawana wolai zu, é ʋa so, ni siɛ ɠooza ka a wo, é ʋa zeeli taai naa ma, a ʋa paa, tama zunui naa maa la nɛɛni, é ʋa za. Wɔinzeɠema vaa la ɠɛa ti yɔɠɔzu kaipa ta seiɲɔɠɔi, é paai. 7 Naa ɠa é ba, gè devei vea wo ya, ga wo yeelo taa saʋagɔ ʋa ɓɔɠɔ ʋɛ yɛ. 8 Ni Ɠɔoɠɔ GALAGI wa-ƓALAGI a wa-yooi zuwɔɔlɔna, eɠɛʋelei é minazeɠeni wo-mɛmɛwolani bɛ, é zooi kpein fe wo ya, nii é minazeɠea ga é fe wo ya, 9 ni nɔ wa devei niiti so, wo ɗa ziɛ ga tiye, nii gè feezu wo ya za, wo Ɠɔoɠɔ GALAGI wa-ƓALAGI nɛɛ ʋɛ, wo ziɛ siɛnɔpɛ su ga ná-pelei, wa taa saʋagɔ la taa saʋagɔi niiti ma ɓɔɠɔ ʋɛ, 10 naa ɠa a kɛ, nu la sɔbalala nu ʋaa, ma ɲamai ʋa ʋu zooi nii zu, nii Ɠɔoɠɔ GALAGI wa-ƓALAGI feezu wo ʋɛ ga wɔnɔ, nu ʋaa ɲama ɠotoi la ɠɛa wo ʋa naazu. 11 Kɛlɛ ni wɔinzeɠemai ɠa nui ta ɠisu seiɲɔɠɔi laalɔɠɔma, é ɗa gaaʋɛɛnɛ, é so, é doɠa, naa za, é ʋela, é li, é zei naama laai taɠila su, 12 ná-taazu ɠɛwolaiti ta nu leʋe kalama, a ʋaana, ti fe ɲamai puai, naa ʋotokula nui ya, naa ɠa a kɛ é za. 13 À mina maawɔinɠa, wa Izilayɛle ɲade ɠana sɔbalala nui ɲamai ma puai, wa ɠɛ gaanɛɛi zu. 14 Siɛgi zu wo zeizu la zooi naa zu, Ɠɔoɠɔ GALAGI wa-ƓALAGI feezu wo ʋɛ ga wɔnɔ, à mina kwɛ ma ɠɔtui zeɠe daazuʋɛ, nii é wo-zeiɲɔɠɔi ɠwɛgi lɛɛzu, nii nu mɔungiti ti daani, ti ʋaai ma. 15 Zeele ɠilagi ná-zeele wooi la zoga nu ɠilagi laalɔɠɔma, é ʋa lo ná-faaɠaazagi ʋa, ɓaa ná-faa ɲɔi, ɓaa kotoi tanɔpɛ nu a kɛ. Fai pɛ gaa ɠa ɠula ba nɔ, ga zeele felegɔ ɓaa zeele saʋagɔ ná-zeele wooi maaʋele. 16 Ni zɛɛ zeelei a zɛɛi ʋɛɛna nui ta ma, faa ɲɔi ta ma vaa zu, 17 nu felegɔiti ti zakpegai, naati ta ʋa Ɠɔoɠɔ GALAGI ɠakala, zalaɠa ɠula nuiti ta tukpɔɠaaleʋe nuiti kakala, niiti ti botii zu naama ziɛgi zu. 18 Tukpɔɠaaleʋe nuiti ta naa wuuɓɛ ga pagɔ gola. Ni ta kaana ga zeelei zɛɛi woni, zɛɛ zeele wooi nɔ ɠa é boni kɛɛɠɛloin laalɔɠɔma, 19 naazu wa naa ɠɛ la, nii é wɔinni ga é ɠɛ ga kɛɛɠɛloin. Ʋele ɠana wa faa ɲɔi ɠula la ɓɔɠɔ zaama. 20 Zɔiti ta mɛnina, ta lua, nu nɔpɛ ge la mɔ naa ɠɛɠala vaa ɲɔi ta ɠɛa wo zaama. 21 À mina maawɔinɠa ɠɛ, devei ɠa ɠɛ ga: Zɛnvui ʋoto ka ɠɛ ga zɛnvui, nu ɠaazuɠɛzɛi ʋoto ka ɠɛ ga nu ɠaazuɠɛzɛi, nu ɲiiga ʋoto ka ɠɛ ga nu ɲiiga, nu yeei ʋoto ka ɠɛ ga nu yeei, nu ɠɔɠɔi ʋoto ka ɠɛ ga nu ɠɔɠɔi.

Deuteronomy 19 (TOMA)

In Other Versions