Ephesians 3 (TOMA)

1 Naa ɠa é ba, nà Pɔle, nà GALA falii wosu. Nà ga kasoɠa nui, botii maaʋele ma gè kɛa Yesu Kilista ʋɛ, wa-vaa ma, wɔi wo la ga Zuifua. 2 Dàaʋɛ da ga wo mɛnigɛ, tosuʋɛ GALA ge naa ɠalivaai mà, ga ná-zaalai maaʋele, wa-vaa zu. 3 É ná-faazeikpasui ma lɔɔɠuzu vai lɛɛni ga ze ga kulakɛlɛmai maaʋele, eɠɛʋelei gè sɛʋɛai la wo ma woo ɓuɠa su. 4 Siɛgi zu wo kalasu da, wa nà-faaɠaaɠai ɠwɛɛ, nii é zèa dɔɔɠuzu vai vaa zu, é lo Kilista ʋa. 5 Niima lɔɔɠuzu vai, GALA ge la ɠɛni dɛɛni ga nuɓusɛiti wɔlɔwɔlɔi zu, eɠɛʋelei é kula la kɛlɛma niizu ná-keela ɲadegaiti bɛ ta GALA goo wo nuiti, ga ná-Zɛnvui maaʋele. 6 Dɔɔɠuzu vai naa ɠa é ga nii: Tɛiti ti la ga Zuifua, ta tɔnɔ zɔlɔɔ nɔ ga Zuifuiti kɛʋele ta-ɠilibalai maaʋele ma ta Yesu Kilista. Ta niina ga kpusɛ ɠilagi naa ʋaalobai, ta tɔnɔ zɔlɔɔ minazeɠe gilagi tɔna su, Woo Niinɛ Ʋagɔi zaɓui zu. 7 Gè ɠɛa ga Woo Niinɛ Ʋagɔi ma wotiɠɛ nui, tɔɔzei ná-zaalai ʋa. GALA ge naa veeʋɛ bɛ̀ ga ná-zɛbɛsu wotii maaʋele. 8 Tama nɛ̀i dɔ̀iɗai, gè ga ma ɠaaɓelagi GALA ná-nuiti pɛ saama, gè naama zaalai zɔlɔɔni, ga Kilista ná-kpɛtɛi nii kpelagi la ɠwɛɛga, gè naama vai laazeeli naati ma, ti la ga Zuifua, 9 ta é la wozakalagi ɠa nui pɛ bɛ, ʋelei GALA ge naama lɔɔɠuzu vaazeikpasui laazeelizu la. Naama vaazeikpasui, GALAGI é anii pɛ kpɛtɛai, é dɔɔɠuni ɓɔɠɔ ʋɛ kaite wɔlɔwɔlɔ, 10 naa ɠa a kɛ, zɛnvu zu zobodaiti ta ma zɛbɛiti ti GALA ná-ɠimalai ɠwɛɛ, ná-kɛʋelei pɛ su, ga Egilisii maaʋele, 11 eɠɛʋelei ná-ɠɔoɠɔ faazeikpasui la, é kɛai ga de-Maliɠii Yesu Kilista maaʋele. 12 Da-ɠilibalai maaʋele ma da Kilista, da-ɠidaaleʋei de boga tɔun ma, ma zobogi ɠa de ya, de maaɓuɠa GALA ba ga ladalai. 13 Naa ma, nà wo lɛnɛsu, wo iɲɔ ge mina leʋe, tɔɔzei nà-kpɔlɔiti ba, gè sɔlɔɔsu wa-vaa zu. Naati ka ti ga wa-lɛbiyai. 14 Naa maaʋele ma, nà ʋilɛsu ɲiibiɠa Ɠɛɛɠɛ GALA bu, 15 niigi é ga pɛlɛyeɠeiti pɛ ma ungi, niiti ti geeɠɔlɔgi zu ta zooi ma. 16 Nà maanɛɛnɛzu ga é fe wo ʋɛ, eɠɛʋelei ná-lɛbiyai zuwɔɔlɔai la, wo zɛbɛlɔ ga gola ga ná-Zɛnvui zɛbɛi maaʋele, wa-nuɓusɛlai pɛ su, 17 Kilista zei wo-yiimaʋɛti ga kidaaleʋei maaʋele. Nà maanɛɛnɛzu ɓalaa ga wo zapelɔ, wo zɛbɛlɔ nɛɛbɛi zu, 18 nii a kɛ wa GALA ná-nuiti pɛ, wo zoo wo Kilista ná-nɛɛbɛi ɠaaɠa, komaʋɛ wɔɔlɔ ʋelei, ta sakpai, buuɠooza ʋelei ta gaaɠooza ʋelei, 19 ta nii a kɛ wo Kilista ná-nɛɛbɛi ɠwɛɛ, nii kpudɛai faaɠwɛgi pɛ maazu, wo laa ɗa zeeli ga GALA kɛʋele, ná-kɛʋeleiti pɛ su. 20 Deɠɛmu, tɔungi a zoo ná-zɛbɛi zu, é botii ɠɛɛzu la de-yiimaʋɛ, é faa wolaiti kɛ, é ɓudɛ da-vali wooiti ta da-ɠisiɛiti maazu, é ʋooʋa ma, 21 lɛbiyai ɠɛ bɛ Egilisii zu, Yesu Kilista maaʋele ma, yeeɠɛɠalaiti pɛ su, eyɛsu ɠɔ. Amina!

Ephesians 3 (TOMA)

In Other Versions