Exodus 40 (TOMA)
1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Alu mɔungi ma volo mɔungi, ɗa seɠe ʋɛlɛ ɲadegai lo, GALA daaɠomi seɠe ʋɛlɛi. 3 Ɗa zeele woo ɠesui zei bu, è maalɔɔɠu ga kwɛpele seɠezuɠoozagi. 4 Ɗa ʋa ga taɓalii, è ná-sɔɔlaiti sei ga. Ɗa ʋa ga fitina zei anii, è fitinaiti kɛʋele ɓɛtɛ. 5 Ɗa ansansegi ma zalaɠa ɠulazuʋɛ ʋilɛ, nii zanugi ziɛni maaʋɛ, zeele woo ɠesui ɠakalaʋɛ. Ɗa kwɛpele seɠezuɠoozagi zɛlɛ nu lɛɛzuʋɛ seɠe ʋɛlɛ ɲadegai wu. 6 Ɗa gala zalaɠaiti kulazuʋɛ ʋilɛ seɠe ʋɛlɛ ɲadegai ɠakalaʋɛ, GALA daaɠomi seɠe ʋɛlɛi. 7 Ɗa maagba aniɲakai zei GALA daaɠomi seɠe ʋɛlɛi ta zalaɠa ɠulazuʋɛ ti yɔɠɔzuʋɛ, è ziɛi ʋu su. 8 Ɗa koii ma zasai lo, é maaɠooli ná pɛ, è kwɛpele seɠezuɠoozagi zɛlɛ sasai laaʋɛ. 9 «Ɗa siɛma wulɔ ɲadegai zeɠe, è ta ziɛ seɠe ʋɛlɛ ɲadegai ma, ta nii kpein a ɠɛ ná, è ti ɲade, ta ná-aniɲakaiti kpein. Toɠa ɲade. 10 Ɗa gulɔ ɲadegai ziɛ gala zalaɠaiti kulazuʋɛ ma, ta ná-sɔɔlaiti. Ɗa zalaɠa ɠulazuʋɛ ve bɛ̀, naa ɠa a kɛ, zalaɠa ɠulazuʋɛ wola ɲade. 11 Ɗa gulɔ ɲadegai ziɛ maagba aniɲakai ma, é ʋɛɛ ná-seiga anii ʋa, è ɲade. 12 «Ɗa Aalɔn ta ná-doun zunuiti maaɓuɠa nu lɛɛzuʋɛ ʋa, GALA daaɠomi seɠe ʋɛlɛi ɠakalaʋɛ, è ti maagba ga ziɛi. 13 Ɗa Aalɔn maaɠili ga zalaɠa ɠula zeɠeiti. Ɗa gulɔ ɲadegai ziɛ ma, è fe bɛ̀, é zalaɠa ɠula losuʋɛ ma wotii ɠɛ bɛ̀. 14 Ɗa ʋa ga ná-doun zunuiti, è seɠewuzeɠei loo ti ɠɔba. 15 Ɗa gulɔ ɲadegai ziɛ ti ma, eɠɛʋelei è gulɔi ziɛzu la ti-ɠɛɛ ma, naa ɠa a kɛ ti nà-zalaɠa ɠula wotii ɠɛ. Gulɔi a ziɛna ti ma, naa maaʋele ma, zalaɠa ɠula vai ma losuʋɛ ɠa ɠɛ ti ya, ti-mavofodaiti kpein su.» 16 Moize naa kpein kɛɛni, nii Ɠɔoɠɔ GALAGI ma levei veeni zea. Zekana é kɛɛni la. 17 Konagi velesiɛi ma alu mɔungi ma volo mɔungi ɠa seɠe ʋɛlɛ ɲadegai loni la. 18 Moize seɠe ʋɛlɛ ɲadegai loni, é ma labuiti kpɛtɛ, é suzo guluiti pilɛ, é gulu zɔkpɔiti dɔ ti zu, é tɔkpalaiti to. 19 É tandai zuvieni, é pɛɛ seɠe ʋɛlɛ ɲadegai ma. É pɛɛmazeɠei ʋɛɛni maazu, eɠɛʋelei Ɠɔoɠɔ GALAGI ma levei veeni la zea. 20 É zeele woo ɠokolo felegɔi zeɠeni, é ti la kesui zu. É gulu zɔkpɔiti dɔɔni kesui ma ʋalaiti su. É kesui lakulugi zeini kesui la. 21 É liini ga kesui seɠe ʋɛlɛ ɲadegai wu. É kwɛpele seɠezuɠoozagi zɛlɛni, nii a kɛ é zeele woo ɠesui maalɔɔɠu, eɠɛʋelei Ɠɔoɠɔ GALAGI ma levei veeni la zea. 22 É taɓalii ʋilɛni GALA daaɠomi seɠe ʋɛlɛi wu, nu ɠɔʋɛzu ʋelei, kwɛpele seɠezuɠoozagi ɠakalaʋɛ. 23 É ɓuluiti puuni ga ga pagɔ Ɠɔoɠɔ GALAGI ɠaazu, eɠɛʋelei Ɠɔoɠɔ GALAGI ma levei veeni la zea. 24 É fitina zei anii ʋilɛni GALA daaɠomi seɠe ʋɛlɛi wu, nu yeezazu ʋelei, taɓalii letemaʋɛ. 25 É ma vitinaiti kɛʋele ɓɛtɛni, Ɠɔoɠɔ GALAGI ɠaazu, eɠɛʋelei Ɠɔoɠɔ GALAGI ma levei veeni la zea. 26 É zalaɠa ɠulazuʋɛ ʋilɛni, nii zanugi ziɛni maaʋɛ, GALA daaɠomi seɠe ʋɛlɛi wu, kwɛpele seɠezuɠoozagi ɠakalaʋɛ. 27 É ansansegiti galani ga, eɠɛʋelei Ɠɔoɠɔ GALAGI ma levei veeni la zea. 28 É kwɛpele seɠezuɠoozagi zɛlɛni nu lɛɛzuʋɛ seɠe ʋɛlɛ ɲadegai wu. 29 É gala zalaɠaiti kulazuʋɛ ʋilɛni seɠe ʋɛlɛ ɲadegai ɠakalaʋɛ, GALA daaɠomi seɠe ʋɛlɛi. É gala zalaɠai ɠulani ná ta vebɛ zalaɠai, eɠɛʋelei Ɠɔoɠɔ GALAGI ma levei veeni la zea. 30 É maagba aniɲakai zeini GALA daaɠomi seɠe ʋɛlɛi ta zalaɠa ɠulazuʋɛ ti yɔɠɔzuʋɛ. É ziɛi ʋuuni su maagba vaiti su. 31 Moize ta Aalɔnni, ta ná-doun zunuiti, ti ɠɔɠɔiti ta ti-yeeiti maagbani náʋɛ. 32 Ta la ɠɛna lɛa GALA daaɠomi seɠe ʋɛlɛi wu, ɓaa ti ʋa maaɓuɠa zalaɠa ɠulazuʋɛ ʋa, ti ɠɛni ɓɔɠɔ maagbazu, eɠɛʋelei Ɠɔoɠɔ GALAGI ma levei veeni la Moize ya. 33 É koii ma zasai loni seɠe ʋɛlɛ ɲadegai ta zalaɠa ɠulazuʋɛ maaɠoolii zu, é kwɛpele seɠezuɠoozagi zɛlɛ sasai laaʋɛ. Zekana Moize ɓeni da ga botii ɠɛ. 34 Tonaɓiingi ʋɛɛni GALA daaɠomi seɠe ʋɛlɛi ma, Ɠɔoɠɔ GALAGI ná-lɛbiyai seɠe ʋɛlɛ ɲadegai wuulaaveni. 35 Moize la mɔ ɠɛni zoosu é ʋa lɛ GALA daaɠomi seɠe ʋɛlɛi wu, mazɔlɔɔ tonaɓiingi ɠɛni ʋɛɛni ma, Ɠɔoɠɔ GALAGI ná-lɛbiyai ɠɛni nɔ seɠe ʋɛlɛ ɲadegai laavesu ɠɔ. 36 Siɛgi zu tonaɓiingi ɠɛni wuzeɠezu la, é zeɠe seɠe ʋɛlɛ ɲadegai maazu, názu ɠa Izilayɛle nuiti ti ɓena siɛi wo da, ti zeɠe ti-ʋuuzuʋɛ. 37 Ni tonaɓiingi la dɛ wuzeɠeni maazu, ti la ɠɛni liizu, eyɛsu voloi a la wuzeɠena la. 38 Mazɔlɔɔ Ɠɔoɠɔ GALAGI ná-tonaɓiingi ɠɛni seɠe ʋɛlɛ ɲadegai maazu foloi, kɛlɛ kpidii, abui ɠɛni zosu tonaɓiingi zu, Izilayɛle nuiti kpein ti ɠɛni kaazu kpezekele. Zekana é ɠɛni ɠɛɛzu la ta-ziɛ yeeɠɛɠalai kpein su.