Exodus 5 (TOMA)

1 Naama vaiti teʋegai ma, Moize ta Aalɔn ti liini Falaɠɔn ʋɔ bɛ, ti ɠɛ ma: «Ɠɔoɠɔ GALAGI, Izilayɛle ná-GALAGI wooi ɠaa: ‹Ɓe nà-nuɓusɛiti ba, ti li, ti fɛti ɠula teʋebai zu dàaseigi lɛbi vaa ma.› » 2 Falaɠɔn ti wooɠaaʋoteni, é ɠɛ ti ma: «Ɓɛ ɠa é ga Ɠɔoɠɔ GALAGI, ga gè ɠolo bɛ, gè ɓe Izilayɛle nuiti ba, ti li? Gè la Ɠɔoɠɔ GALAGI ɠwɛɛ, gè la yeeɓega Izilayɛle nuiti ba pɛ, ti ʋa li.» 3 Ti ɠɛni ma: «Eɓulu nuiti ta-ƓALAGI ɠulaʋɛ kɛlɛma gi ʋɛ. Va bu gi folo saʋagɔ ziɛ wo teʋebai zu, gi li, gi zalaɠaiti kula gá-ƓALAGI, Ɠɔoɠɔ GALAGI ʋɛ, naa ɠa a kɛ, é mina ʋa seeɓɛ wola ʋɛɛzu gi ʋa, ɓaa a ʋa kɔɔ ʋɛɛ gi ʋa.» 4 Ezipete masagi ɠɛni ti ma: «Moize ta Aalɔn, leeni vaa zu wo nuɓusɛiti seɠezu ta-wotiiti ma? À ɠale ma, wo wa-wotiiti kɛ.» 5 Falaɠɔn ɠɛni ma: «Niizu, niima nuɓusɛiti ti mɔinɗa zooi zu, wa ta-wotiiti suɠoloɠolosu!» 6 Naama voloi nɔ, Falaɠɔn niima levei veeni nuɓusɛiti ta-wɛlɛma nuiti zea, ta ta-wotiɠɛ ɠundiɠiiti, é ɠɛ ti ma: 7 «À mina mɔ tufa ve nuɓusɛiti zea, eɠɛʋelei é ɠɛa ɠɛɛzu la mɔungi zu, ga ti ʋa ɓilikii loɠa, ti ɗa li niina, tiya ɓɔɠɔi ti ɗa tufai yɛʋɛ. 8 Anɛɛ naa ʋe, ɓilikii liegɔi ti ɠɛa doɠazu mɔungi zu, wa naa nɔ la ti ɠakala. À mina ta ɠula naa la ga tago ɓalaa, mazɔlɔɔ ta ga dɔɔʋɛ nuiti, naa ɠa é kɛɛzu, ti kpeei loozu, ti ɗa ɠɛ ma: ‹Ɓe gi ʋa, gi li, gi zalaɠaiti kula gá-ƓALAGI ʋɛ.› 9 À nui niiti kasɔɠili ga botii, ti-un ka yɛ naa ma, ti mina woilo zɛɛ ɓɔɛzuɠulaiti ma.» 10 Nuɓusɛiti ta-wɛlɛma nuiti, ta ta-wotiɠɛ ɠundiɠiiti ti liini, ti ɠɛ nuɓusɛiti ma: «Falaɠɔn wooi ɠaa: ‹Gè la mɔ tufa veezu wo ya. 11 Wa ɓɔɠɔi, à li, wo tufai ɠaiziɛ ɓɔɠɔ ʋɛ, ʋɛ nɔpɛ wa ka ná. Anɛɛ naa ʋe, tanɔpɛ ge la ɠulazu wa-wotii la.› » 12 Nuɓusɛiti ti vazani Ezipete yooi zu ná pɛ, ti ɗa tufa unkpulugiti zɛʋɛ tufai ʋotogi zu. 13 Ta-wɛlɛma nuiti ti ɠɛni ɓɔizu ti la, ti ɗa ɠɛ ma: «À wa-volo ɠila kuɠui ɓe, eɠɛ nɔ siɛgi zu tufai ɠɛni la wo ya.» 14 Ti ɠɛni Izilayɛle nuiti ta-wotiɠɛ ɠundiɠiiti doɠazu, niiti Falaɠɔn ná-gwɛlɛma nuiti ti ti zeini ti unda. Ti ɠɛni ɠɛɛzu ti ma: «Lee vaa zu wo la ɓeni ga wogi ta za ɓilikii liegɔi loɠa, daai wo ɠakala, eɠɛʋelei é laani la wo ɠakala mɔungi zu?» 15 Izilayɛle nuiti ta-wotiɠɛ ɠundiɠiiti ti liini, ti ɓaazaɠa Falaɠɔn ma, ti ɠɛ ma: «Lee vaa zu è gi zosu ɠani, gɛi gi ga ɗa-wotiɠɛ nuiti? 16 Ti la mɔ tufa veezu gi ya, gɛi gi ga ɗa-wotiɠɛ nuiti, ti ɗa ɠɛ gi ma: ‹À ɓilikiiti doɠa!› Gɛi gi ga ɗa-wotiɠɛ nuiti, ta gi loɠazu, tama ɗa-nuɓusɛiti ka ti faaɠaazagi ɠɛai.» 17 Falaɠɔn ti wooɠaaʋoteni, é ɠɛ ma: «Wa ga dɔɔʋɛ nuiti, dɔɔʋɛ nu wolaiti! Naa ɠa é kɛɛzu, wo ɠɛɛzu ma: ‹Ɓe gi ʋa, gi li, gi zalaɠaiti kula Ɠɔoɠɔ GALAGI ʋɛ.› 18 Niizu, à li, wa-woti ɠɛɛzuʋɛ, nu la mɔ tufa veezu wo ya ɲɛgɛlɛin, kɛlɛ wa ɓilikii liegɔi nɔ ve, nii wo ɠɛni feezu pɔlɔma.» 19 Izilayɛle nuiti ta-wotiɠɛ ɠundiɠiiti ti kaani ga ta ti maanɔɠɔzu nɔ sɛsɛ, ti ɗa ɠɛ ma: «Wo la tanɔpɛ kulazu ɓilikii liegɔi la, nii é veezu folo-o-folo.» 20 Ti ɠulazuʋɛ Falaɠɔn ʋɔ bɛ, ti zeelini Moize ta Aalɔn ʋɔ bɛ, naati ti ɠɛni ti maaɓɔunsu. 21 Ti ɠɛni ti ma: «Ɠɔoɠɔ GALAGI ɠa wo ɠaazu, toɠa wo lukpɔɠaaleʋe! Wo gi maayogi zeɠea Falaɠɔn ta ná-botiɠɛ nuiti bɛ. Wo boɠa zɔkpɔi laa ti-yeezaamaʋɛ, ga ti gi ʋaa la.» 22 Moize ɠaleni ma Ɠɔoɠɔ GALAGI ʋɔ bɛ, é ɠɛ ma: «Màliɠii, lee vaa zu é faa ɲɔi ɠɛa ga niima nuɓusɛiti? Lee vaa zu è tèʋegai? 23 Kaipa gè liini Falaɠɔn ʋɔ bɛ, gè ɓɔɛ pɔ è-laaseigi zu, toɠa faa ɲɔi ɠɛɛzu nɔ ga niima nuɓusɛiti, ɗa ma, è la ɗa-nuɓusɛiti unmɔɔni pɛ, è ʋa ti ɠula zea.»

Exodus 5 (TOMA)

In Other Versions