Ezekiel 25 (TOMA)

1 Ɠɔoɠɔ GALAGI ɓɔɛni pɔ̀, é ɠɛ mà: 2 «Ɗa ʋe, zunui, ɠaaʋote Amɔn nuiti pɔ pelei, è GALA gooi wo ti laalɔɠɔma. 3 Bo Amɔn nuiti ma: ‹À woilo Maliɠii Ɠɔoɠɔ GALAGI wooi ma: Wo ɲɛɛi woni, siɛgi zu sèizu ɲadegai ɠɔzɔni la, siɛgi zu Izilayɛle yooi zuwoni da, ti ɗa li ga Zuda nuiti Ɓaɓilɔne. 4 Naa maaʋele ma, nà ɓesu folo ɠulazu ʋele nuiti ba, ti ɗa-yooi zeɠe ga tɔnɔ, ta ta-ɠɔɔlaaɠai ʋu ɗa-yooi ɠa, ta ta-zeɠe ɠotaiti to ná. Tiya ɠa ta ɗa-yooi ma lɔnɔgi pɛ mi, nɔnɔiti ti ga ɗɔnɔiti, ti naati kpɔle. 5 Nà wa-laa wolai Laɓa ɠɛ ga ɲɔmɛiti daamiizuʋɛ, Amɔn nuiti ta-yooi pɛ ge ɠɛ ga baala sasai. Wa suɠwɛɛ naazu ga nà ɠa gè ga Ɠɔoɠɔ GALAGI. 6 Mazɔlɔɔ Maliɠii Ɠɔoɠɔ GALAGI wooi ɠaa: Wo yealoɠani, wo ɠɔkɔ ga koozunɛɛi Izilayɛle ná-maanɔɠɔi vaa zu. Ʋele ɠana wo wa-wɔinzeɠemai ɠulaai la kɛlɛma é lo nà-nuɓusɛi Izilayɛle ʋa. 7 Naa ma, nà zobogi ɠulazu kɛlɛma wo laalɔɠɔma, gè wo lɔ zii ɠiligiti zeezu, ti wo yeavoo. Nà wo ɠoloɠolo mɛtu, wa ɲɛɛlɛ nuɓusɛiti saama, zou la mɔ ɠɛa wo ʋɛ. Wa suɠwɛɛ naazu ga nà ɠa gè ga Ɠɔoɠɔ GALAGI.› » 8 «Maliɠii Ɠɔoɠɔ GALAGI wooi ɠaa Moaɓe nuiti ta Seyiil nuiti daalɔɠɔma, niiti ti ɠɛni: ‹Zuda ʋɛlɛyeɠei ɠa ga nuɓusɛi, ga zii ɠiligiti kɛʋele.› 9 Naa ɠa é ba, nà Moaɓe laalaosu ná-taa wolaiti pɔ pelei, ta ná-kwɛpelemaʋɛ, ti pɛ ti ɠoloɠolo, anɛɛ niiti ti wola ʋagai, eɠɛʋelei Ɓɛte-Yesimɔte la, ta Ɓaale-Meyon, ta Kiliyatayime. 10 Nà daalaosu folo ɠulazu ʋele nuiti tuɠɔ, ti Moaɓe zeɠe ga tɔnɔ, eɠɛʋelei ti Amɔn zeɠeni la. Naazu ʋelela ʋelei nu nɔpɛ ge la mɔ ɠizɛga Amɔn zu. 11 Nà-tukpɔi ɠa loo Moaɓe nuiti ma, ta suɠwɛɛ naazu ga nà ɠa gè ga Ɠɔoɠɔ GALAGI.» 12 «Maliɠii Ɠɔoɠɔ GALAGI wooi ɠaa: ‹Edɔme nuiti ti potokula ɲɔu ɠɛɛni Zuda nuɓusɛiti daalɔɠɔma, naa ɠa é ti ɠɛɛni ga sɔba nuiti. 13 Naa ɠa é ba, Maliɠii Ɠɔoɠɔ GALAGI wooi ɠaa: Nà yeewuzeɠezu Edɔme laalɔɠɔma, nà nuiti ma zuwu ɠaaleʋezu ma yooi zu ta suaiti, gè ná valibo, é ɠɛ ga teʋebai zu, é zo Teman taa wolai ma, é zeeli Dedan, ná-nuɓusɛiti pɛ ta za kɔɔi zu. 14 Nà naa ɠaliva nà-nuɓusɛiti ma, Izilayɛle nuiti, ga ti nɔ̀nɔ ʋotokula Edɔme nuiti ma. Izilayɛle nuiti ta ti zo eɠɛʋelei nà-ziiɠaawanai ta nà-ziiɠulagi ti levezu la, ti ti ɠala ga nu a ɓaaɠona mà, ʋelei a ɗa zale la.› » Maliɠii Ɠɔoɠɔ GALAGI wooi ɠana. 15 «Maliɠii Ɠɔoɠɔ GALAGI wooi ɠaa: ‹Filisiti nuiti ti kɛɛʋɛ ga potokulai, ti tɔnɔi ʋotokula ti zili nu wɔlɔmaiti ma ga wɔinzeɠema wolai, ti naati suwuɠaaleʋe. 16 Naa maaʋele ma, Maliɠii Ɠɔoɠɔ GALAGI wooi ɠaa: Nà yeeʋɛɛzu Filisiti nuiti ma. Zɔiti ti ʋaai, ti zeɠe Kelɛte, nà ti pɛ koloɠolosu, mɔtaiti ti zeini kpoloɗɛi laaʋɛ, nà naati pɛ undaaʋili. 17 Nà-potokulai ta nà-doɠaiti ta ɲɔu ti ma. Siɛgi zu naati ti zeelizu la ti ma, ta suɠwɛɛ ga nà ɠa gè ga Maliɠii Ɠɔoɠɔ GALAGI.› »

Ezekiel 25 (TOMA)

In Other Versions