Ezekiel 37 (TOMA)

1 Ɠɔoɠɔ GALAGI zɛbɛi ɠɛni bà, ná-Zɛnvui liini ga ze, é pìlɛ nɛmɛ wolai zu, ʋɛ zooi maalaaveni ná ga nu ɠaei. 2 É pìlɛni teʋeteʋegi zu ti-maaɠoolii pɛ su, tama, ti mɔinni gola, ti vɔa ɠɛni de kpaan. 3 É ɠɛni mà: «Ɗa ʋe, zunui, kaei niiti ta zoo nɛi ti yɛnvu ʋolu ɓaa?» Gè gooɠaaʋoteni, gè ɠɛ ma: «Màliɠii, Ɠɔoɠɔ GALAGI, ɗa ɠila kpe nɔ ɠa è kwɛɛ.» 4 É ɠɛni mà: «GALA gooi wo dɛɛ niima ɠae vɔɔiti ma, è ɠɛ ti ma: ‹Kae vɔɔiti, à woilo Ɠɔoɠɔ GALAGI laawooi ma! 5 Maliɠii Ɠɔoɠɔ GALAGI wooi ɠaa: Nà fiilɛi ʋuuzu wo zu ʋolu, wo zɛnvui wo. 6 Nà wo ma ɲataiti tɛɛzu wo ma, gè wo ma zuai lɛ wo ma, gè wo-ɠɔlɔgi lɛ wo ma, gè zɛnvu viilɛi ʋu wo zu, wa yɛnvu. Wa suɠwɛɛ naazu ga nà ɠa gè ga Ɠɔoɠɔ GALAGI.› » 7 Gè GALA gooi woni eɠɛʋelei gè devei zɔlɔɔni la. Kɛ̀ai ma ɓɔɛzu, gè ani ɲiikpi tu golai mɛnini, kaeiti kɛni de, ti ɗa maaɓuɠa ɓɔɠɔ ʋa, ti ɠilagilagiti, é zoloo ti lobazuʋɛti ma. 8 Gè kaani ga ti-ɲataiti ta ti ma, ma zuai ɗa ɓɛtɛ ti ma, ma ɠɔlɔgi ɗa lɛ ti ma, kɛlɛ zɛnvu la ɠɛni dɛ ti zu. 9 Maliɠii ɠɛni mà naazu: «Ɗa ʋe, zunui, ɓɔɛ zɛnvu viilɛi ʋɔ, è ɠɛ ma: ‹Maliɠii Ɠɔoɠɔ GALAGI wooi ɠaa: Ʋa, è zeɠe zooi ma zoko naanigɔiti su, è ʋu poomai tɛiti ma, ti vulu su.› » 10 Gè GALA gooi woni eɠɛʋelei é dèveni la. Zɛnvu viilɛi lɔɔni poomaiti su, ti vulu su. Ti ɠaalɔni, ti lo ɠɔɠɔiti ga. É ɠɛni ga bɛbɛ wolai, daawɔɔlɔ gola. 11 É ɠɛni ma: «Ɗa ʋe, zunui, kaei tɛiti ta ga Izilayɛle nuɓusɛiti ma ʋoogi. Izilayɛle nuiti ta ɠɛɛzu ma: ‹Gá ga kae vɔɔiti, gi ɠitosu la ná, gi loa ya.› 12 Naa ɠa é ba, GALA gooi wo, è ɠɛ ma: ‹Maliɠii Ɠɔoɠɔ GALAGI wooi ɠaa: Nà ʋaazu wa-ɠabaiti daalaosu, ee, nà-nuɓusɛiti, gè wo ɠula ti zu, gè li ʋolu ga woye wa-yooi zu Izilayɛle. 13 Wa suɠwɛɛ naazu ga nà ɠa gè ga Ɠɔoɠɔ GALAGI, siɛgi zu gè wa-ɠabaiti daalaosu da, gè wo ɠula ti zu, ee, nà-nuɓusɛiti! 14 Nà nà-Zɛnvui ʋuuna wo zu, wo zɛnvui wo ʋolu, ta siɛgi zu gè wo zeizu la ʋolu wa-yooi zu, názu wa suɠwɛɛ ga nà, Ɠɔoɠɔ GALAGI, nà ɠa kpɔ̀ɛai, tama nii gè bogai, nà kɛ nɔ,› » Ɠɔoɠɔ GALAGI wooi ɠana. 15 Ɠɔoɠɔ GALAGI ɓɔɛni pɔ̀, é ɠɛ mà: 16 «Ɗa ʋe, zunui, gulu ɓuɠai zeɠe, è niima wooiti sɛʋɛ ma: ‹Zuda ta Izilayɛle tɛiti ti ɓɔgai masadai ma, tɔnɔi ɠaa›. È gulu ɓuɠai taɠili seɠe, è sɛʋɛ ma ga: ‹Zozɛfe (ɓaa Efelayime) ná-gului ɠaa, ta Izilayɛle tɛiti ti ɓɔgai masadai ma›. 17 Ti zei ɓɔɠɔ la, é ɠɛ è ya ga gulu ɓuɠa ɠila kpe nɔ, ti ɠili ʋa. 18 Siɛgi zu ɗa-nuɓusɛiti ta è ɠaazaɠana da ga: ‹È la naa ʋolu lɛɛzu ga giye mu ɓaa?› 19 ɗa ti wooɠaaʋote, è ɠɛ ti ma: ‹Maliɠii Ɠɔoɠɔ GALAGI wooi ɠaa: Nà Zozɛfe ná-gulu ɓuɠai zeɠezu, é zoni Efelayime ya, ta Izilayɛle wolodaiti ti ɓɔgai su, gè sei Zuda ná-gulu ɓuɠai la, gè kpɛtɛ ga gulu ɠila, ti ɠɛ ga ani ɠila kpe zèa.› 20 «Gulu ɓuɠaiti è sɛʋɛi ɠɛɛzu ti ma, ta ɠɛ zoni è ya ti ɠaazu, 21 ɗa ɠɛ ti ma: ‹Maliɠii Ɠɔoɠɔ GALAGI wooi ɠaa: Nà Izilayɛle nuiti kulazu zii ɠiligiti saama. Ʋɛti ti liini náti, gè ti ɠaalɛ ba, ti zeɠe adaʋɛ pɛ, gè ʋa ga tiye ʋolu ta-yooi zu. 22 Miná ɠa nà ti ɠaalɛ ba ná, ti ɠɛ ga zii ɠila kpe Izilayɛle ɠizeiti ma. Masa gila kpegi ɠa a zei ti pɛ unda. Zeeɠaaɠwɛɛzu la mɔ ɠɛa nuɓusɛ zeizu felegɔiti zɔɠɔzu, ɓaa masada zeizu felegɔiti. 23 Ti la mɔ ɓɔɠɔ ɠɔzɔa ʋolu, ti ʋa ɗa nɔkɔ kɔɔɠɔ gani nɔɠɔiti bu, ti ʋa ɗa kɔzɔba vaiti kɛ, ta tɔ koloɠologi ma zii pɛ. Nà ti ɠula wooʋalada vaiti pɛ su, niiti ti ti ɠɛɛni nɔ̀un daalɔɠɔma. Nà ti gba, ti ɲade, ti ɠɛ ga nà-nuɓusɛiti, gè ɠɛ ga ta-ƓALAGI. 24 « ‹Nà-botiɠɛ nui Davide ɠa ɠɛ ga ta-masagi, tɔ ɠila kpe ka a ɠɛ ga ti makɛ nui. Ta ziɛ ga nà-tɔ gooiti, ta nà-deveiti so, ti ziɛ ga tiye, niiti gè ti zɛʋɛni ti ʋɛ. 25 Ta eteai ziɛ zooi naa zu gè feeni nà-botiɠɛ nui Zakɔɓe ʋɛ, ʋɛ ti-mɛmɛwolani ti ɠɛni ná. Ta zei ná eyɛsu ɠɔ, tiya-o, ti-lointi-yo, ta ti-mavofodaiti pɛ. Nà-botiɠɛ nui Davide ɠa zei ti unda eyɛsu ɠɔ. 26 Nà minazeɠezu ti ʋɛ, ga ziilɛigi ɠa yɛ ti ya eyɛsu ɠɔ. Nà ti zei ʋele ɓɛtɛ, gè ti ɠaawɔɔlɔ. Nà sèizu ɲadegai lo ti zaama, é yɛ ná ɠɔ. 27 Sèizuʋɛ ɠa ɠɛ ti zaama. Nà ɠɛ ga ta-ƓALAGI, ti ɠɛ ga nà-nuɓusɛiti. 28 Zɔɔma you ɠiligiti ta suɠwɛɛ naazu ga nà ɠa gè ga Ɠɔoɠɔ GALAGI, ta nà Izilayɛle lo nà-botii laawu, siɛgi zu sèizu ɲadegai losu la ti zaama, é yɛ ná ɠɔ.› »

Ezekiel 37 (TOMA)

In Other Versions