Ezekiel 45 (TOMA)
1 « ‹Siɛgi zu wo zooi ɠaaɠwɛɛzu la Izilayɛle wolodaiti zɔɠɔzu, wa ta zeɠe ba, é ɠɛ ga Ɠɔoɠɔ GALAGI nɔnɔ, sakpai ɠa ɠɛ ga zeezakpa waaʋuufelegɔ maazu lɔɔlugɔ (25.000), kogi ɠɛ ga zeezakpa waaʋuufelegɔ (20.000). Toɠa leve ga náʋɛ pɛ ɲadegɛ. 2 Naama yooi zaamaʋɛ ɠa, GALA seizu ɲadegai ma yooi a leʋe ba ná, é ɠɛ ga seki naanigi, ma zeki naanigɔi ɠilagilagi zɔligɔi ɠɛni ga zeezakpa undɔɔlugɔ (500), ada ɲakai ɓalaa yɛ maaɠoolii zu ga zeezakpa ʋuulɔɔlugɔ (50). 3 Zooi ʋɔ bɛ ná veezu ga Ɠɔoɠɔ GALA nɔnɔi, wa zooi ná ta ɠɔɠɔ ba ga zeezakpa waaʋuufelegɔ maazu lɔɔlugɔ (25.000), kogi ɠɛ ga zeezakpa waapuugɔ (10.000), miná ɠa GALA seizu ɲadegai a ɠɛ ná, ta ada ɲadega wolai. 4 Miná ɠa ná ɲadesu zooi ma vaa ʋa, ná makɛsu yɛ zalaɠa ɠula nuiti bɛ, niiti ti Ɠɔoɠɔ GALAGI ná-botii ɠɛɛzu GALA seizu ɲadegai. Ta zooi zɔlɔɔ miná, ti ta-ʋɛlɛiti to, zɔɠɔzu ɠɛ ti ʋa ta seizu ɲadegai. 5 Ná taɠili ka leʋe ba ga zeezakpa waaʋuufelegɔ maazu lɔɔlugɔ (25.000), ta kogi ɠɛni ga zeezakpa waapuugɔ (10.000), é ve Levi nuiti zea, niiti ti GALA sei ʋɛlɛi wu wotii ɠɛɛzu ga pagɔ. Ta taaiti to miná, ʋɛ ta zei ná. 6 « ‹Ʋɛ ná makɛgai Ɠɔoɠɔ GALAGI ʋɛ, naama yooi zakpai ma, kobaʋɛ, wa zeezakpa waaʋuufelegɔ maazu lɔɔlugɔ (25.000) leʋezu ba, kogi ɠɛ ga zeezakpa waadɔɔlugɔ (5.000), miná ɠa wo taai ʋuuzu ná, toɠa ɠɛ ga Izilayɛle ʋɛbɛi kpein nɔnɔ. 7 Wa zou felegɔ makɛ kundiɠii ʋɛ, ta ɠa ɠɛ ʋepemaʋɛ ɠilagilagiti pɛ zooi ʋa nii makɛgai Ɠɔoɠɔ GALA ʋɛ, ta taai ʋɛ, gilagi ɠɛ folo liizu ʋelei, gilagi ɠɛ folo ɠulazu ʋelei, ti zakpai ɠa ɠɛɛzu ga bolodamaiti tɔnɔiti kɛʋele, é zo folo liizu ʋelei ma ɠwɛmaʋɛ, é li folo ɠulazu ʋelei ma ɠwɛmaʋɛ. 8 Ná ɠa é ɠɛɛzu ga nɔnɔi ma yooi, Izilayɛle yooi zu. Naazu nà-kundiɠiiti ti la mɔ nà-nuɓusɛiti suziɠaa, ta zooi yɛ Izilayɛle nuiti zea, eɠɛʋelei ta-wolodamaiti ti la.› » 9 «Maliɠii Ɠɔoɠɔ GALAGI wooi ɠaa: ‹Faa kula ɠɛa, Izilayɛle ɠundiɠiiti! À pele leʋe toomai ta toosu vaiti tuɠɔ. À sɔledai ziɛ, ta telebodai. À ɓe nà-nuɓusɛiti kpɛɛzu ta-yooiti maazu,› » Maliɠii Ɠɔoɠɔ GALAGI wooi ɠana. 10 « ‹Kɔɠɔ ganiiti ti ɠɛ wo ya, niiti ti zoloogai su, kiloiti ti laazeeliai, ta kɔɠɔ ganii mɔtai kpein ti laazeeli. 11 Ani ɠae ɠɔɠɔ ganii daa ga efa, ta ziɛ aniiti kɔɠɔ ganii daa ga bate, ti felegɔ ta ɠɛ ɠɛɠala. Ti ɠilagilagi ɠa ga kɔɠɔ gani wolai daa ga womɛlegi, naa ma ɠaaɠwɛsui ʋuusiɛi. 12 Sikilegi ma wali ɠae ɠilagi ɠa ɠɛ ga gelagi puufelegɔ (20), tama kɛni naama wali ɠaeiti ti ɠɛ ga puulɔzita (60), é ʋa ɠɛ ga mine gilagi. 13 « ‹Ʋele ɠa wa ɠɛ wa-vebɛaniiti kulazu ba la, efagi zeizu lɔzitasiɛi ɠa wa kula womɛle gilagi ʋa moloi zu, ta efagi lɔzitasiɛi ɠa wa kula womɛle gilagi ʋa wɔɔlezegi zu. 14 Nii pilɛgai gulɔi ʋa: wo-zɔlɔɔ gani ma ɠaaɠwɛsui ungilasiɛi. Gulɔi ɠa ɠɔɠɔ bategi zu, nii suʋɛ ga womɛlegi ɓaa kɔɔlegi ma ɠaaɠwɛsui ʋuusiɛi. 15 Baalagi ɓaa boli ɓulugi a ɠɛna ga unfelegɔ (200) Izilayɛle lufa lɛnugiti su, wa gila seɠe ti zaama. Naa ɠa é ɠɛɛzu ga vebɛ zalaɠai, ɓaa gala zalaɠai, ɓaa ziilɛi zalaɠai, nii a kɛ é ɠɛ ga wa-ɠotoiti gba zalaɠai,› » Maliɠii Ɠɔoɠɔ GALAGI wooi ɠana. 16 « ‹Naama yeemaaɓɔgi maa ɠa loli nuiti pɛ ma ti zooi zu, ti ʋaa la Izilayɛle ɠundiɠii ʋɔ. 17 Tɔɔzei kundiɠii ɠa tosuʋɛ ɠɛɛzu ga é gala zalaɠaiti ma zɔɔlaiti fe, ta vebɛ zalaɠaiti, naa ʋɛɛ puya zalaɠaiti ba, ti ɠulazu fɛti voloiti, ta alu toga niinɛi ma vɛtiiti ma, naa ʋɛɛ dooɠo foloiti, ta zɔɔma voloiti kpein ba, Izilayɛle nuiti maanɛai ti ɠaalɛ ba ma. Kundiɠii ɠa maanɛai é koto gba zalaɠai ma zɔɔlaiti fe, ta vebɛ zalaɠai, ta gala zalaɠai, ta ziilɛi zalaɠai, nii a kɛ kotoi ma zuvaayɛgi zɔlɔɔ Izilayɛle ʋɛlɛyeɠei ʋɛ.› 18 «Maliɠii Ɠɔoɠɔ GALAGI wooi ɠaa: ‹Alu mɔungi ma volo mɔungi, wa nikɛ zinɛ ɓokpa gila seɠe, nii nɛɛʋuzu la ba, wo kula ga zalaɠai, wo GALA sei ʋɛlɛi ɲade da. 19 Zalaɠa ɠula nui ɠa koto gba zuai ma ɲamai zeɠe, kulaai ga zalaɠai, é siɛ GALA sei ʋɛlɛi ma laamasagiti ma, ta zalaɠa ɠulazuʋɛ woizuʋɛti ma ɠɔɠɔ naanigɔiti ma, ta koi ɠoozuʋɛ ziɠidaʋɛti ma laamasagiti ma. 20 Alugi ma voloi lɔfelasiɛi ma, wa kɛ ɠana nɔ naama nui ʋɛ, zɔi a kotoi ɠɛ, é la gaaɠilini ma, ɓaa é la suɠwɛɛni. Wa GALA sei ʋɛlɛi ɲade ga naa ɠɛai. 21 « ‹Alu mɔungi ma volo puugɔ maazu naanisiɛi (14) ɠa ɠɛ wo ʋɛ ga Pake fɛtii. Toɠa ga folo lɔfela vɛtii. Ɓului lɛʋɛ la su, naa ɠa wa ɠɛ miizu. 22 Naama volo ná, kundiɠii ɠa nikɛ zinɛ ɓokpagi ɠula ga zalaɠai, tɔ ɓɔɠɔi ná-kotoi gba vai ma, ta nuɓusɛiti pɛ ta-ɠotoiti gba vai ma. 23 Fɛtii ma volo lɔfelaiti su, toɠa gala zalaɠai ma zɔɔlaiti fe Ɠɔoɠɔ GALAGI ʋɛ ga, nikɛ zinɛ ɓokpa dɔfela, ta baala sinɛ lɔfela, niiti nɛɛʋuzu la ti ʋa. Folo lɔfelai laawu, toɠa boli zinɛ ɠila fe ga zalaɠai folo-o-folo, koto gba vai zu. 24 Naa ʋolu toɠa vebɛ zalaɠai ve ga moloi kilo ʋuusaʋagɔ (30), ta gulɔi litɛlɛ lɔzita ti ɓɔ nikɛ zinɛi ɠilagilagi ta baala sinɛi ɠilagilagiti ba. 25 « ‹Fɛtii tɔɔzeizu alugi lɔfelasiɛi ma volo puugɔ maazu lɔɔlusiɛi (15) ma, kundiɠii ɠa kɛ nɔ mɔnɔ, eɠɛ pelegi é kɛɛni la Pake fɛtii zu, folo lɔfelai naa ɠilagilagi pɛ su, toɠa ma zalaɠai ma ziiti nɔ ve koto gba vai ma, ta gala zalaɠaiti, ta vebɛ zalaɠaiti, é ɓɔ gulɔi ʋa.› »