Ezekiel 45 (YAPE)
1 Nap’an ni yira f’oth e binaw ni ngan pi tafen reb e ganong nge reb, ma bay bang riy ni yira pi’ ngak SOMOL. Ni regi binaw nem e ragag e mayel n’umngin ma meruk e mayel radan. Ga’ngin e re gin’em nra par nib thothup. 2 U lan e re gi binaw ney e nge par bang riy ni ta’reb n’umngin nge radan ni nge tagl’iy e Tempel, ni 840 e fit u barba’ ngu barba’; ma ga’ngin yang nib liyeg charen fare Tempel ni nge par ni dariy ban’en riy ni meruk i ragag nge aningeg e fit radan. 3 Barba’ ko re gi binaw ney, ni ragag e mayel n’umngin ma aningeg e mayel radan e ngan foleg ni aram e gin nge par e Tempel riy ma aram e gin th’abi thothup u fithik’ urngin yang. 4 Ra par ni aram e re gin’en nib Thothup ko fare nam, ni kan duwgiliy ni tafen e prist ni yad ma pigpig ngak SOMOL u lan fare Tempel rok. Bayi mang gil’ e pi naun rorad nge gin tagil’ fare Tempel. 5 Barba’ i yang ko fare gi binaw e nge par ni nge tafnay e pi Levite, ni yad ma rin’ e maruwel u lan e Tempel. Bayi sum yochi binaw u rom ni fan ngorad ni ngu’ur pired riy. 6 Gin migid ko gin nib thothup, e bay ba guruy riy ni ragag e mayel n’umngin, ma l’agruw e mayel radan, ni ngan duwgiliy nib binaw ni demturug be’ nu Israel nrayag ni nge par riy. 7 Ki yira tay bang e binaw ni nge tafnay ba pagel ni fak e pilung ni be gagiyeg. U ba’ ni ngal e mathil ko fagi binaw nib thothup nge yan ko ngal nge taw ko Day ni Mediterranean; me tabab ko ba’ ni ngek e mathil ko fa gi binaw nib thothup nge yan ko ngek nge taw ko gin ni mus e nam riy ni aram e ra ta’reb ga’ngin ko fa yung nem ni kan pi’ ko pi ganong nu Israel. 8 Re gin’ey u lan e binaw nu Israel e aram e f’oth rok fare fak e pilung ni be gagiyeg, ya nge dabki gafgownag e girdi’, ma nge pag e gin kabay ko fare nam nge milsuwon ko pi ganong nu Israel. 9 I SOMOL ni Th’abi Tolang e ga’ar, “Kaygi n’uw nap’an ni kam denengad, gimed e pi tagagiyeg nu Israel! Mu taleged e ma’ngach nge kireb romed. Mu rin’ed e tin ni bfel’ mab mat’aw. Thangri dab kum tulfed e girdi’ rog u daken taferad bayay. I Gag SOMOL ni Th’abi Tolang e gu be yog e pi thin ney ngomed. 10 “Thingri urngin e girdi’ ma nge maruwel ko pi thabthabel nge pi fol nib yul’yul’: 11 “Fare efah ni fol ko tin nib mlik ban’en e ta’ab rogon ko bath ni fol ko tin ba raenraen ban’en. Ma gelngin e homer. Ma ba’aray folen nrayan i aw: 1 homer = 10 efah = 10 bath. 12 “Rogon e birom e malngin e ba’aray rogon:20 e gerah = 1 shekel60 shekel = 1 mina 13 13-15 “Irera’ e n’en ni ngan ngongliy e pi maligach riy: Wheat: ⅙th e wom’ngin e woldug rom Barley: ⅙th u wom’ngin e woldug rom Olive oil: 1/10th u wom’ngin e gek’iy rom(Fol ko bath: 10 bath = 1 homer = 1 kor.)Saf: 1 saf u fithik’ gubin e 200 e saf u Israel“Ngam feked i yib e maligach ni grain, nge gamanman ni ngan urfiy ni polo’, nge gamanman ni fan ko maligach nma gapaseg thilin Got nge girdi’, Ya ngan n’ag machan e denen romed. I Gag SOMOL ni Th’abi Tolang e gu be yog e ran’ey. 16 “Gubin e girdi’ u daken e nam e thangri fek e pi maligach ney i yan ko en ni fak e pilung nu Israel. 17 Nge mang ba maruwel rok ni ir e nge yagnag e gamanman ni ngan urfiy nib polo’, maligach ni grain, nge maligach ni wayin ni fen ga’ngin fare nam nu Israel ko pi Madnom ko M’ug e Pul, nge Sabbath, nge ku boch e madnom. Ir e nge yagnag e maligach ko denen, maligach ni grain, maligach ni ngan urfiy nib polo’, nge maligach nma gapaseg thilin Got nge girdi’, ni nge chuweg e denen ko girdi’ nu Israel.” 18 I SOMOL ni Th’abi Tolang e ga’ar, “Bin som’on e rran ko bin m’on e pul e ngam maligach nga ba garbaw ni pumo’on ni dariy bang u downgin nib kireb ngam machalbognag fare Tempel. 19 Fare prist e nge fek boch u racha’en fare maligach ko denen nge thiy ko ren u langan e mab ko fare Tempel, nge nga daken aningeg i tabthungen fare altar, nge daken e pi duga’ ko garog ko wub ngalan e yoror. 20 Ku aray rogon yalen ni ngan rin’ ko bin medlip e rran ko pul, ya nge chey ni denen be’ ni gathi leam rok fa denang nike rin’ ban’en nib kireb min’ag fan rok. Irera’ kanawo’en ni ngu’um ted e Tempel rog nib thothup. 21 “Bin ragag nge aningeg e rran ko bin m’on e pul e nge tabab fare Madnom ko Paluk’af. Ma medlip fen ni nge par e girdi’ ni nge kay e flowa ni dariy e is riy. 22 Bin som’on e rran ko fare madnom e fare pagel ni fak e pilung ni ir e ma gagiyeg e thangri pi’ ba garbaw ni pumo’on ni maligach ni fan ko denen rok nge gubin e girdi’. 23 Mra reb fapi medlip e rran ko fare madnom ma nge maligachnag ngak SOMOL medlip e garbaw ni pumo’on nge medlip e saf ni pumo’on ni dariy bang u dowrad nib kireb ni ngan urfiy e pi gamanman nem nib polo’. Ma ngki pi’ reb e kaming ni pumo’on ni maligach u gubin fapi rran ni maligach ko denen. 24 Ma ku rayag nag rliw’ e pawn e grain nge dalip e quart e olive oil ni ngan pi’ nib dachug nga reb fapi garbaw ni pumo’on fa nga reb fapi saf ni pumo’on ni maligach. 25 “Madnom ko Nochi Na’un, e ma tabab ko ragag nge lal fene pul ko bin medlip e pul, fare pagel ni fak e pilung e nge pi’ u lan fa medlip i rran e maligach ni ta’reb rogon u reb e rran nge reb, ni aram e maligach ko denen, maligach ni ngan urfiy nib polo’ nge maligach ni grain nge olive oil.”