Ezra 7 (TOMA)
1 Niima vaiti kpein poluma, Pɛɛlese masagi Aaletazɛɛlesɛse ná-siɛgi zu, zunui ta ɠɛni ná, daa ga Ɛsedalase, Selaya ná-doun zunui, mɛmɛwolani daaseigiti ta ti zɔlɔɔ peleiti kaa: Azalia, Yilikiya, 2 Salume, Sadɔke, Ayituɓe, 3 Amalia, Azalia, Melayɔte, 4 Zelayia, Uzi, Ɓuki, 5 Aɓisua, Fineyase, Eleazaal, zalaɠa ɠula ɠundiɠi wolai Aalɔn ná-doun zunui. 6 Ɛsedalase naa zeɠeni Ɓaɓilɔne. É ɠɛni ga sɛʋɛ ɠɛ nui, kalagai Moize ná-tɔgi zu, tɔgi nii Izilayɛle ná-GALAGI, Ɠɔoɠɔ GALAGI feeni Moize ya. Masagi ɠɛni naa kpein feezu Ɛsedalase ya, nii é ɠɛni falizu ma, mazɔlɔɔ ná-GALAGI, Ɠɔoɠɔ GALAGI ɠɛni ba. 7 Masagi Aaletazɛɛlesɛse ná-masadai ma ɠonagi lɔfelasiɛi ma, Izilayɛle nui tanigaa ti ɠaleni ma, ti li Zeluzalɛme: zalaɠa ɠula nuiti, Levi nuiti, gɛingɛin gani gɛin nuiti, siɠida makɛ nuiti, ta GALA sei ʋɛlɛi wu wotiɠɛ nuiti. 8 Ɛsedalase yɛni ti ʋolu, ti li Zeluzalɛme, masagi Aaletazɛɛlesɛse ná-masadai ma ɠonagi lɔfelasiɛi ma alugi lɔɔlusiɛi ma. 9 É deveni ga é zeɠe Ɓaɓilɔne alu mɔungi ma volo mɔungi ma, é zeeli Zeluzalɛme alugi lɔɔlusiɛi ma volo mɔungi ma, ná-GALAGI zaalai zu, nii é ɠɛni tɔun makɛsu. 10 Mazɔlɔɔ Ɛsedalase ɠɛni ɠaaɓaazu, é ɗa Ɠɔoɠɔ GALAGI ná-tɔgi ɠala, ta é ɗa so ga yii pɛ, é ɗa Izilayɛle nuiti kala ga tɔgiti ta deveiti. 11 Sɛʋɛi zu wooi ʋɛtɛ, nii Pɛɛlese masagi Aaletazɛɛlesɛse feeni zalaɠa ɠula nui Ɛsedalase ya, tɔgiti ta deveiti ma ɠalamɔin, niiti Ɠɔoɠɔ GALAGI ti veeni Izilayɛle nuiti zea: 12 «Aaletazɛɛlesɛse, masagiti ta-masagi, niima zɛʋɛi ɠa liizu zalaɠa ɠula nui Ɛsedalase ma, GALAGI nii é geeɠɔlɔgi zu, naa ná-tɔgiti ma ɠalamɔin. 13 Gè devei vea ga nu nɔpɛ Izilayɛle nuiti saama, ti nà-masa zooi zu, é ɠɛni ga zalaɠa ɠula nu, ɓaa Levi nu, é pɔ ga é li Zeluzalɛme, ti ɓe ti pɛ ba, wo li ʋɔɔma wa tiye. 14 Nɔ̀un nà, masagi, gá nà-tɛnɛbo nu lɔfelaiti ka gi è leʋesu Zeluzalɛme ta Zuda, è ka ʋelei ɗa-ƓALAGI ná-tɔgi zosu la ná, nii é è ya. 15 Siɛ ɠilagi naa nɔ zu ɗa liizu ga walii ta zanugi, nii gá nà-tɛnɛbo nuiti gi daai ɠisu ga gi fe Izilayɛle ná-GALAGI ʋɛ, é zeini Zeluzalɛme. 16 Ɗa liizu ɓalaa ga waliiti ta zanugiti, niiti ti ɠulaai nuiti zea ti Ɓaɓilɔne you zɛʋɛi zu, ta niiti nuɓusɛiti ta zalaɠa ɠula nuiti ti daai ɠisu ga vebɛanii ta-ƓALAGI zei ʋɛlɛi vaa zu, é Zeluzalɛme. 17 Naama walii ɠa è nikɛ zinɛiti ta baala sinɛiti ta baala ziʋoiti geyazu la ná, naa ʋɛɛ vebɛ zalaɠaiti ba ta puya zalaɠaiti, è ti pɛ kula ga zalaɠai wa-ƓALAGI zei ʋɛlɛi ma zalaɠa ɠulazuʋɛ Zeluzalɛme. 18 Wa è-wɔɔla zalaɠa ɠula nuiti, nii nɔpɛ wa ka ga soloogɛ ga wo kɛ ga wali ta zanu mɔtai, à kɛɛ la, eɠɛʋelei soloogai la wa-ƓALAGI yiimai ma. 19 GALA sei ʋɛlɛi wu wotiɠɛ zɔɔlai niiti ti veai è ya, li, è ti la ɗa-ƓALAGI zei ʋɛlɛi wu Zeluzalɛme. 20 Ni ani ɠili geya vaa a lona è ʋa ɗa-ƓALAGI zei ʋɛlɛi naa ma vaa zu, naama walii ɠa ɠula masagi ná-naavolo makɛsuʋɛ. 21 «Nɔ̀un nà, masagi Aaletazɛɛlesɛse, gè devei vea naavolo makɛ nuiti kpein zea, ti ziɛ wolai Efelate folo liizu ʋelei, ga ti naa kpein kɛ ga pagɔ, nii zalaɠa ɠula nui Ɛsedalase bosu ti ma, geeɠɔlɔgi zu ƓALAGI ná-tɔgiti ma ɠalamɔin. 22 Ti maanɛɛʋɛ ti kilo waasaʋagɔ (3.000) ɠɛɠala ve zea ga walii, moloi kilo waaʋuusaʋagɔ (30.000) ɠɛɠala, dɔɔi litɛlɛ waanaanigɔ (4.000) ɠɛɠala, gulɔi litɛlɛ waanaanigɔ (4.000) ɠɛɠala, ti kpoloi ve zea, ʋelei nɛai la ti ʋɛ. 23 Devei kpein geeɠɔlɔgi ɓɛtɛ ƓALAGI feezu, sei ʋɛlɛi ma vaa zu, ti pɛ ge ɠɛ ga kɛɛʋelei, nii a kɛ GALAGI naa mina ʋa yiiɠaawanazu masa zooi ma, ɓaa nà ɓɔɠɔi ma gá màvofodaiti. 24 Gá bosu ɓalaa naavolo makɛ nuiti kpein ma ga nu mina zou zalai, ɓaa maazoloo ganii, ɓaa zou maaleʋe salai ɠula zalaɠa ɠula nuiti zea, ta Levi nuiti, ta guye loo nuiti, é ʋɛɛ siɠida makɛ nuiti ba, ta GALA sei ʋɛlɛi wu wotiɠɛ nuiti, naa ʋɛɛ nuiti kpein ba ti botii ɠɛɛzu GALA sei ʋɛlɛi wu. 25 «Ɛsedalase, ɗa ma, ʋelei ɗa-ƓALAGI ɠigi veai la è ya, faawo bo nuiti ta tukpɔɠaaleʋe nuiti sei ziɛ wolai Efelate folo liizu ʋelei nuɓusɛiti saama, ti ɗa tukpɔɠaaleʋe naati bɛ, ti ɗa-ƓALAGI ná-tɔgiti kwɛɛ. Wa ti lɛɛ ga naati ɓalaa, niiti ti la ti ɠwɛɛ. 26 Zɔi nɔpɛ é la kɛɛni é ʋa ɗa-ƓALAGI ná-tɔgiti ta masagi ná-tɔgiti so ga pagɔ, naama nui maanɛɛʋɛ ga é za, ɓaa ti kula zooi ʋa, ɓaa kɔligiti ti ɠula zea, ɓaa é ʋili kasoi ɠa.» 27 Mamagi ɠa Ɠɔoɠɔ GALAGI ʋɛ, ade-mɛmɛwolani ta-ƓALAGI, nii é puai masagi yiima ga é nii ɠɛɠala lɛbiyai ve Ɠɔoɠɔ GALAGI zei ʋɛlɛi ʋɛ Zeluzalɛme. 28 Tɔ ɠa é wooɠɛɠiladai ɠɛa bɛ̀, é ɠaazu unfe fe bɛ̀ gi yɔɠɔzu gá masagi, ta ná-tɛnɛbo nuiti, naa ʋɛɛ ná-tosuba nu wolaiti kpein ba. Tɛi gè kwɛɛni ga toɠa bà, naa ìɲɔdɔɔni, gè zoo gè Izilayɛle ɠundiɠiiti gaalɛ ba, ga gi lɛ ʋɔɔma Zeluzalɛme.