Genesis 28 (TOMA)

1 Izaake Zakɔɓe lolini, é tuya loo bɛ, é devei nii ve zea, é ɠɛ ma: «Mina anzanu zeɠe Kanaan anzanu lointi saama. 2 Wuzeɠena, è li Padan-Alame è-lee kɛɛɠɛ Ɓetuwɛle ʋɔ bɛ, è anza ɠaiziɛ è-ɠɛkɛ Laɓan ná-doun anzanuiti saama, è sei. 3 GALA Zɛbɛi-Pɛ-Maliɠii tuya loo è ʋɛ, é è ɠɛ ga kpuɠu nu, ɗa ɠa ga nuɓusɛ mɔinmɔin mɛmɛwola. 4 É Abalaame ná-tuyai ve è ya, é ʋɛɛ è-mavofodai ʋa, nii a kɛ zooi è zeini su ga seikɔɠɔma nui, è naa zɔlɔɔ, zooi nii GALA ge feeni Abalaame ya!» 5 Izaake Zakɔɓe leʋeni ga è li Padan-Alame, Alame nui Ɓetuwɛle ná-doun zunui Laɓan ʋɔ bɛ, Zakɔɓe ta Ezawu ti-lee Eleɓɛka diɛi. 6 Ezawu kaani ga Izaake tuya looni Zakɔɓe ʋɛ, é teʋe Padan-Alame ga é anza zeɠe ná. É mɛnini ɓalaa ga kɛai ma tuya loozu bɛ, é devei nii veeni zea ga: «Mina anza zeɠe Kanaan anzanu lointi saama.» 7 É kwɛɛni ɓalaa ga Zakɔɓe ɠoloni kɛɛɠɛ ta dee ʋɛ, é li Padan-Alame. 8 Ezawu gaaɠaani ga Kanaan anzanu lointi maayo ge la ɠɛni kɛɛɠɛ Izaake ʋɛ. 9 Ezawu liini Abalaame ná-doun zunui Isemayɛle ʋɔ bɛ. É Isemayɛle ná-doun anzanui Maɠalate zeɠeni ga anzai, nii é ga Neɓayɔte baazeelai, zɔɔma anzaiti poluma ti ɠɛni zea. 10 Zakɔɓe zeɠeni Ɓeel-Seɓa, é li Ɠalan. 11 É zeelini adaʋɛ ta, ʋɛ é ɲiini ná, mazɔlɔɔ foloi liini niina. É náʋɛ ɠɔtui ta zeɠeni, é da unbu, é ɲiini naama adaʋɛ. 12 Ná-segi zu, é kaɓagi ɠaani loni zooi ma, nɔungi zeiɗai geei ʋa. Pɛtɛ, GALA ná-geezuɠeelaiti ti ɠɛni lɛɛzu, ti ɗa yeei kaɓagi naa zu. 13 Pɛtɛ, Ɠɔoɠɔ GALAGI ɠɛni loni kaɓagi unsuʋɛ, é ɠɛ ma: «Nà ga Ɠɔoɠɔ GALAGI, è-ɠɛɛ Abalaame ná-GALAGI, ta Izaake ná-GALAGI. Zooi nii è laani ma, nà feezu è ʋɛ, wa è-mavofodai. 14 È-mavofodai ɠa ɠɛ eɠɛ zooi ma vufiligi, ná-zooi zu ɠa ɓaɠo, é zo folo ɠulazu ʋelei, é li folo liizu ʋelei, é zo nu ɠɔʋɛzu ʋelei, é li nu yeezazu ʋelei. Eteai ma ʋɛlɛyeɠeiti kpein ta tuyai zɔlɔɔ è maaʋele ma, ta è-mavofodai maaʋele ma. 15 Wɛlɛ, nà ɓɔɠɔi nà è ʋa, nà è makɛ, ʋɛ kpein è liizu ná, nà ʋaazu ga ɗe ʋolu niima yooi zu, mazɔlɔɔ gè la ɠɛlɛa è ʋa ɲɛgɛlɛin, eyɛsu naa kpein daazeeli, nii gè boga è ma.» 16 Zakɔɓe wuunni, é ɠula ná-ɲiimɛnii zu, é ɠɛ ma: «Gaamazu Ɠɔoɠɔ GALAGI ɠa niima adaʋɛ, nɔ̀un gè la ɠɛa suɠwɛɛ!» 17 É luani, é ɠɛ ma: «Aɛ, niima adaʋɛ maayikiʋɛ! Ʋɛ ɠa ná ga GALA ná-pɛlɛi, geeɠɔlɔgi ma ziɠidaʋɛ ʋe.» 18 Zakɔɓe wuzeɠeni ga sobuzobui, kɔtui nii é daani unbu, é naa zeɠeni, é gaalɔ ga ɠizɛsui, é gulɔi ʋu unsuʋɛ. 19 É naama adaʋɛ laasei pɛɛni ga Ɓetɛle (nii poluʋɛ ga «GALA ná-pɛlɛi»), kɛlɛ taai naa laaseigi ɠɛni ga Luze mɔungi zu. 20 Zakɔɓe minazeɠeni, é ɠɛ ma: «Ni GALA ga yɛna bà, é màkɛ siɛi nii zu, gè bosu, ni a daamianigiti ta seɠeiti feena zèa, 21 ta ni nà ɠalena ma kɛ̀ɛ ʋɛlɛi wu ziilɛigi zu, Ɠɔoɠɔ GALAGI ɠa ɠɛ ga nà-GALAGI naazu. 22 Kɔtui nii gè gaalɔgai ga ɠizɛsui, naa ɠa ɠɛ ga GALA ná-pɛlɛi. Nii kpein è feezu zèa, nà naama ʋuusiɛi ve è ʋɛ.»

Genesis 28 (TOMA)

In Other Versions