Judges 19 (TOMA)
1 Naama ziɛgi zu, masa ge la ɠɛni Izilayɛle unda. Levi nui ta ɠɛni ná, é ɠɛni zeini Efelayime ɠize yooi ɠaaɓelazuʋɛ, é anzai ta zeɠeni Ɓɛteleyɛme Zuda yooi zu, nii é la vuluni ga zɔiti kɛʋele. 2 Kɛlɛ anzanui naa ɓɔɠɔ lɔɔni koloɠologi zu, é zeɠeni pɔ bɛ, é ɠale ma kɛɛɠɛ ʋɔ bɛ Ɓɛteleyɛme, é kɛɛni ná ga alu naanigɔ. 3 Sinigi wuzeɠeni, é li pɔ bɛ, é ʋa ɓɔɛ pɔ, é ziila, é lii la. Ná-botiɠɛ zunu loungoi ɠɛni ba, ta soovale felegɔ. Anzanu loungoi naa lɛɛni kɛɛɠɛ ná-pɛlɛi wu, siɛgi zu kɛɛɠɛ zunui ɠaani la, é yeezeini bu ga koozunɛ. 4 Nɛkoi, anzanu loungoi kɛɛɠɛ, naa yeeʋilini su, é yɛ naa ʋɔ bɛ, é kɛ ná ga folo saʋagɔ. Ti ɗa daamii wo, ti ɗa ɓɔɔle, ti ɗa ɲi ná. 5 Foloi naanisiɛi, ti wuzeɠeni ga sobuzobui, Levi nui ɠɛʋele ɓɛtɛni ga é li. Kɛlɛ anzanu loungoi kɛɛɠɛ ɠɛni nɛkoi ma: «Ani go mi, è zɛbɛ zɔlɔɔ, wa li niina.» 6 Ti zeini, ti daamii wo, ti ɓɔɔle ʋɔɔma ti felegɔ. Naa ʋolu anzanu loungoi kɛɛɠɛ ɠɛni anzazinigi ma: «Deve, è ɲi ʋɛ, è yiilɛi.» 7 Anzazinigi wuzeɠeni ga é li, kɛlɛ nɛkoi ɠilini ma, é kpidi ɠila kɛɛni ná mɔnɔ. 8 Foloi lɔɔlusiɛi, é wuzeɠeni ga sobuzobui ga é li. Anzanui kɛɛɠɛ ɠɛni ma: «Nà è maanɛɛnɛzu, ani go mi, wo naa maaɓɔun, foloi gaayei.» Ti felegɔ pɛ ti daamii woni. 9 Anzazinigi wuzeɠeni, ga ti li ta anzai nii é la ɠɛni fuluni ga zɔiti kɛʋele, ta ná-botiɠɛ zunu loungoi, kɛlɛ anzai kɛɛɠɛ ɠɛni ma: «Wɛlɛ foloi gaayeiɗa, woza lia, à ɲi ʋɛ, foloi lia. À ɲi ʋɛ, è yiiɠaalɛi, lina wa wuzeɠe ga sobuzobui, wo ʋilɛ pelei zu, è li ɗa-laazu.» 10 Anzazinigi la ɠɛni pɔ ga é ʋa ɲi ná, é wuzeɠeni, é li. É zeelini Yeɓuse ɠakalaʋɛ, nii é ga Zeluzalɛme, ta soovale felegɔiti ti maaɠiliai, ta anzai nii é la ɠɛni vuluni ga zɔiti kɛʋele. 11 Siɛgi zu ti zeelini la Yeɓuse, foloi wola liini niina. Botiɠɛ zunu loungoi ɠɛni maliɠii ma: «Ade li, de lati Yeɓuse nuiti ta-laai tɛi ma, ade ɲi ná.» 12 Maliɠii gooɠaaʋoteni, é ɠɛ ma: «Ɓa-o, ade la laazu zii ɠiligiti ta-laazu, ʋɛ Izilayɛle nu la ná, ada ɲiizu Giɓea.» 13 É ɠɛni mɔnɔ ná-botiɠɛ zunu loungoi ma: «Ade li, de maaɓuɠa nuuma adaʋɛti ta ʋa, Giɓea ɓaa Lama, de ɲi ná.» 14 Ti yɛni ziɛzu eyɛsu foloi da, siɛgi zu ti maaɓuɠani la Giɓea ʋa, nii é Ɓɛnzamɛn yooi zu. 15 Ti latini eyɛsu ti zeeli miná, ti ɲi Giɓea. Levi nui lɛɛni, é lo taa zaamaʋɛ. Nu nɔpɛ ge la ɠɛni suzoni, é ʋa daazuʋɛɛ ná-pɛlɛi wu, ga é ɲi ná. 16 Gaaɓelasu, kɛwola wɔlɔi ta ʋaani kpɔkɔi, é zeɠe boti ɠɛɛzuʋɛ kpalagaʋɛ, zunui naa ɠɛni ga Efelayime ɠize yooi zu nui ta, é ɠɛni zeini Giɓea, kɛlɛ náʋɛ nuiti ti ɠɛni ga Ɓɛnzamɛn nuiti. 17 É ɠaazuwuzeɠeni, é wɛɛin ɠa taa zaamaʋɛ. Kɛwolai ɠɛni ma: «Ɗa liizu mini? Ɗa zeɠezu mini?» 18 É gooɠaaʋoteni, é ɠɛ ma: «Gá zeɠezu Ɓɛteleyɛme Zuda yooi zu, gá liizu Efelayime ɠize yooi ɠaaɓelazuʋɛ, miná ɠa gè zɔlɔɔni ná. Pàaʋɛ, gè zeɠe Ɓɛteleyɛme Zuda yooi zu, nà liizu Ɠɔoɠɔ GALAGI ná-pɛlɛi wu, kɛlɛ nu nɔpɛ ge la ná, nii é yeezeizu bù. 19 Tama, tufai ɠa gi ya soovalegiti kɔnɔ fai zu, ta ɓului ɓalaa, ta dɔɔi, gi ʋɛ ga ànzai ta nà-botiɠɛ nui, gi ɓɛdɛ la ani nɔpɛ ba.» 20 Kɛwolai ɠɛni ma naazu: «Ziilɛigi ɠɛ è ʋɛ! Gè minazeɠea ga è-maavai pɛ, è la ɲia taa zaamaʋɛ.» 21 É ti lɛɛni ná-pɛlɛi wu, é tufai ve soovalegiti zea. Siɛʋeaiti ti ɠɔɠɔiti maagbani, naa ʋolu ti daamii wo, ti ɓɔɔle. 22 Siɛgi zu ti ɠɛni ɠoozunɛɛzu la, taazuʋɛ zunuiti, nu ɲakaiti, ti ʋaani ti ɠaku pɛlɛi ma, ti ɗa daa ziɠa, ti ɗa ɠɛ kɛwola wɔlɔi ma, pɛlɛ kɛɛ nui: «Zunui ɠula, nii tɛai è ʋɔ bɛ, gi ɓɛdɛ ɠula la!» 23 Pɛlɛ kɛɛ nui ɠulani, é li ti ʋɔ bɛ, é ɠɛ ti ma: «Ɓa-o, kɛ̀ɛleaiti, à mina faa ɲɔu ɠɛ, nà wo maanɛɛnɛzu, tɔɔzei zunui nii ɠa ga mà wɛɛn, à mina tɔɠɔ ɠoloɠolo faa ɠɛ. 24 Wɛlɛ dòun anzanui ʋa, kpeaai, ta zunui anzai, nà ɠulazu ga naati. À loo naati ma, wo naa ɠɛ nii wo wɔinni wo kɛ. Kɛlɛ à mina tɔɠɔ ɠoloɠolo faa wolai naa ɠɛ ga zunui nii.» 25 Zunui naati ti la ɠɛni woiloni goo ma. Názu ɠa Levi nui anzai zoni la, é kula eteaʋɛ. Ti ʋuuni ma, ti ʋooʋa ma, é zo kpidii ma eyɛsu sobui, naa ʋolu sobuzobui ti yeeɓe ba. 26 Sobui, anzanui naa ʋaani, é loo zunui naa ná-pɛlɛlaʋɛ, ʋɛ sinigi ɠɛni ná, eyɛsu woza ɠala. 27 Sobui sinigi wuzeɠeni, é pɛlɛi laalao, é ɠula, é ʋa li ná-siɛi ma. Kɛlɛ anzanui naa, é ga anzai nii é la ɠɛni fuluni ga zɔiti kɛʋele, é naa ɠaani laani nu lɛɛzuʋɛ pɛlɛi wu, zeeiti pɛai kpofalagi ma. 28 É ɠɛni ma: «Wuzeɠe, de li!» Kɛlɛ gooɠaaʋote ge la ɠɛni veeni. Sinigi seɠeni, é pɛɛ soovalegi gila kɔma, é ʋilɛ pelei zu, é ɗa li ná-taazu. 29 Seeliai ma ná-pɛlɛi wu, é boɠai zeɠeni, é anzai leʋeleʋe, é kɛ ga ma ɓulukpulu puugɔ maazu felegɔ (12), é teʋeni Izilayɛle yooi zu ná pɛ. 30 Niiti kpein ti naa ɠaani, ti ɠɛni ma: «Nii ɠɛɠala vaa nɔpɛ ge la dɛ ɠɛɛni, nu la dɛ ta ɠaani, kaipa Izilayɛle nuiti ti lɛɛni, ti ɠula Ezipete yooi ʋa, eyɛsu zaaɠaza. À ɠisiɛ su, wo ɓɔɠɔ ɠa, wo deve wo!»