Judges 19 (YAPE)
1 U lan e pi rran nem, e dariy e pilung u lan yu Israel, ma immoy be’ ni reb e Levi ni i par u Efraim ni go’ burey. I fek be’ ni bpin u Bethlehem u lan yu Judah nge mang bpin rok. 2 Machane me damumuw fare bpin ngak, me sul nga tafen e chitamngin u lan yu Bethlehem, nge par u rom ni aningeg e pul. 3 Ma aram me leamnag fare pumo’on ni nge lek fare pin nge wenig ngak ni nge sul. Me fek e tapigpig rok nge l’agruw e dongki nge un ngak. Me fek fare bpin fare mo’on ni be’ ko Levi i yan ngalan e naun, ma nap’an ni guy e chitamngin fare pin fare pumo’on, me yan nrib magan’ ngay nge yan i nang salpen. 4 Me tawasar e chitamngin fare pin ngak fare pumo’on ni nge par u rom, ma aram me par ni dalip e rran. Fare mo’on nge fare pin e u ra abichgow miyow be mol u rom. 5 Me yan i kakadbul ko rofen ni aningeg ngay miyow od nri kakadbul ngar fal’egew rogorow ni ngranow. Machane me ga’ar e chitamngin fare pin ngak fa en nu Levi, “Som’on e ngam koy ban’en, nge yib gelngim. Ya rayag ni ngafni ta’boch mfin mmarow.” 6 Ma aram me par fagal pumo’on nga but’ ngar abichgow ma yow be garbad u ta’bang. Me’ere me ga’ar e chitamngin fare pin ngak fare pumo’on, “Wenig ngom mu falegan’um ngay ngam par e nep’ ney u roy.” 7 Me sak’iy facha’ nu Levi ngalang ni nge yan, machane mri wenig e chitamngin fare pin ngak ni nge par, ma aram miki par reb e nep’ u rom. 8 Me yani kakadbul ko rofen ni lal ngay me deg ni nge yan, machane miki ga’ar e chitamngin fare pin ngak, “Wenig ngom, mu koy ban’en. Mu son nge ta’boch.” Ma aram me abich fagali mo’on u ta’bang. 9 Ma nap’an niki fal’eg fare pumo’on, nge bpin rok, nge fare tapigpig rok rogorad ni ngranod, miki ga’ar e chitamngin fare pin, “Amguyed, chiney e ke chugur ni nge blayal’; kabfel’ ni gimed ra par u roy e nep’ ney. Dabkin’uw nap’an me nep’; mu falegan’um ngay ngam pired u roy e nep’ ney. Bayi gabul mi gimed od ni kakadbul ngam milekaggad nga tafenmed.” 10 10-11 Machane fare mo’on e daki m’agan’ ngay ni ngki par reb e nep’ u rom, ma aram me yan fare pumo’on nge fare pin rok, nike un fare sib ngorow nge l’agruw i dongki ni bay e saddle u daken keru’row. Ke blayal’ e rofen nem ma karbad i yib nga charen yu Jebus (ni aram yu, Jerusalem), aram me ga’ar fare tapigpig ngak e masta rok, “Mangfan ni dab da talgad ngad pired e re nep’ ney u lan e re binaw nu Jebus ney?” 12 12-13 Me ga’ar fare masta rok ngak, “Dab darod nga langgin ba binaw ni girdi’ riy e gathi piyu Israel. Bay darod ngad thilyegned ma kagdad be yan buchu’uw magdad mol u Gibeah fu Ramah.” 14 Ma aram miyad thumur u Jebus ma kayad be yan. Ra tawgad nga Gibeah u lan e gin nib milsuwon ko ganong rok Benjamin ma ke aw e yal’. 15 Miyad sor nga wuru’ e wo’ ni yad be yan ni ngar pired e nep’ nem u rom. Mranod ngalan fichi binaw ngranod ra pired nga but’ u luluk’ngun fare binaw, ma dariy be’ ni yib i ognag ni nge fekrad nga tafen e re nep’ nem. 16 Nap’an ni yad bay u rom, me yib be’ ni pumo’on nike pilbithir nike sul ko maruwel rok u lan e flang nike blayal’. Re pumo’on nem e be’ nu Efraim nib binaw ni go’ burey, ma ngiyal’ney e be par u Gibeah. (Ma tin kabay e girdi’ u rom e rabad ko fare ganong rok Benjamin.) 17 Me guy fare pilibthir fare milekag u lulukngun fare binaw me fith ni ga’ar, “Kamub u uw? Ma ga be sor ngan?” 18 Me fulweg fa en nu Levi ni ga’ar, “Ku’ug moyed u Bethlehem u lan yu Judah, ma gamad be yan e chiney i yan nga tabnaw nib palog nga Efraim ni go’ burey. Dariy be’ nra fekmad nga tafen ko re nep’ ney, 19 ni yug aray rogon ni bay e ggan romad nge gan e dongki romad, nge flowa nge wayin ni fan ngomow e bpin rog nge tapigpig rog. Bay gubin e tin nib t’uf romad.” 20 Me ga’ar fare pilibthir, “Rayag ni ngambad nga tafnag! Gu ra ayuwegmed; dariyfan ni ngam pired e re nep’ ney u lulukngun e binaw.” 21 Ma aram me fekrad nga tafen nge duruw’iy e dongki rorad. Fapicha’ nra uned ngak e ra luk niged e rifrif u ayrad miyad un ngak ko abich. 22 Kar pasloggad miy gur gin gad ma ke longbiy bogi pumo’on ni yad ba’adag e pumo’on fare naun miyad tabab i pirdi’iy e mab. Me lungurad ko fare labthir, “Mu fek i yib nga wean fare mo’on nike un ngom nga tafnam! Ya gamad ba’adag ni nggu ngongliyed e tin golong ngak!” 23 Machane me yan fare pilibthir nga wean nge ga’ar ngorad, “Gimed e pi tafger rog, wenig ngomed! Danga’! Dab mu rin’ed e mitin e kireb, nib golong! Re pumo’on ney e gag e kug pining. 24 Mu changargad! Ba’aray e bpin rok nge fakag ni bpin ni dawri nang e pumo’on. Bay gu fek row i yib nga wean e chiney, ngu pi’row ngomed. Mu rin’ed e tin gimed ba’adag ngorow. Machane dab mu rin’ed ban’en ni er feni kireb ko re pumo’on ney!” 25 Machane de motoyil fapi pumo’on ngak. Ma aram me fek fa en nu Levi e bpin rok nge pi’ ngorad nga wean. Miyad kol fare pin u gelngirad ma yad be gafgownag ni polo’ fare nep’ ndar talgad nge yan i kadbul. 26 Be tatamilang me yib fare bpin i aw nga but’ u taga’ mab rok fare pilibthir, ko gin bay e pumo’on rok riy. I fel’ fine tamilang ma kabay fare pin u rom. 27 Me od figirngin fare bpin e re kadbul nem ma nap’an ni bing e mab ni aram e nge yan, me pir’eg fare bpin rok nib thig u but’ u mit e naun ni kab k’iy pa’ ni i guy rogon ni nge dead ko mab. 28 Me ga’ar fare pumo’on, “Mu sak’iy nga darow.” Ma de fulweg fare pin. Ma aram me fek fare ldow ko fare pin nge yon’ nga daken fare dongki nib dubchey me yan nga tabnaw. 29 Nap’an ni taw nga tafen, me yan nga naun nge fek bangi yar. Me fek e ldow rok fare bpin rok nge th’eth’ab ni ragag nge l’agruw yang, mra reb fapi ganong nu Israel me pi’ bang nge yan ngay. 30 Gubin e girdi’ ni guy e ra ga’argad, “Dawor gu rung’aged ban’en ni aray rogon bi’id! Dawori buch ban’en ni aray rogon nnap’an ni chuw yu Israel u Egypt! Thingar da rin’ed ban’en ko ren’ey! Gur bamang?”