Jeremiah 32 (TOMA)
1 Wɛlɛ keela wooi ʋa Zelemi sɔlɔɔni Ɠɔoɠɔ GALAGI ya, Zuda masagi Sedesiyase ná-masadai ma ɠona puusiɛi ma, naa zolooni Ɓaɓilɔne masagi Neɓukadenɛzaal ná-masadai ma ɠona puugɔ maazu lɔsaʋasiɛi (18) ma. 2 Ɓaɓilɔne zalaʋusuiti ti Zeluzalɛme taai zeini kɛlɛ su. GALA goo wo nui Zelemi zoga ɠɛni de, é ɠɛ kasoi ɠa, kaso ziɠigi zu Zuda masagi ná-masa pɛlɛi wu. 3 Zuda masagi Sedesiyase ɠa é pilini kasoi ɠa miná. Mazɔlɔɔ ziiɠaawanani Zelemi ma, ga naa Ɠɔoɠɔ GALAGI laawooi nii woga ga: «Nà Zeluzalɛme lɔɔzu Ɓaɓilɔne masagi yeezu, toɠa taa wolai tɛi sosu. 4 Anɛɛ Zuda masagi Sedesiyase ɓɔɠɔi la ɠulaa Ɓaɓilɔne nuiti zea, mazɔlɔɔ gè deveʋɛ ga gè fe Ɓaɓilɔne masagi ya. Toɠa losu ɠaazuni ta ɠaazu, é gaazaɠa, toɠa gooɠaaʋote. 5 Naa ʋolu Sedesiyase ɠa li Ɓaɓilɔne, toɠa yɛ ná, eyɛsu zèe zeeli ma,» Ɠɔoɠɔ GALAGI wooi ɠana. «Anɛɛ ni wa yɛsu kɔɔi ɠa ɠɔ wa Ɓaɓilɔne nuiti, wo la zobo sɔlɔɔga pɛ.» 6 Zelemi ɠɛni ma: «Ɠɔoɠɔ GALAGI ɓɔɛni pɔ̀, é ɠɛ mà: 7 ‹Wɛlɛ, è-ɠɛkɛ Salume ná-doun zunui Ɠanameyɛle ɠa ʋaazu è ʋɔ bɛ, é ɠɛ è ma: Nà-kpalagi ɠeya, nii é Anatɔte, mazɔlɔɔ ɗa ga nà-nu ɠiteɠitegi, nii unmɔɔ fai ma losuʋɛ zea mɔunpa.› » 8 Kɛ̀kɛ loin Ɠanameyɛle ʋaani pɔ̀ bɛ kaso ɠoizuʋɛ, eɠɛʋelei Ɠɔoɠɔ GALAGI laawooi woni la, é ɠɛ mà: «Nà-kpalagi ɠeya, é Anatɔte, Ɓɛnzamɛn yooi zu, mazɔlɔɔ ɗa ga nà-nu ɠiteɠitegi, nii unmɔɔ fai ma losuʋɛ zea mɔunpa ga é geya, geyana.»Gè laani da naazu ga gaama ʋe, Ɠɔoɠɔ GALAGI ɠa é ɓɔɛni pɔ̀. 9 Gè kpalagi ɠeyani kɛ̀kɛ loin Ɠanameyɛle ma, kpalagi é Anatɔte, ga wali ɠae puugɔ maazu lɔfela (17). 10 Gè pɔdi loo zɛʋɛi ɓɛtɛni, gè kɛ su fele. Zeeleiti gaazu, gè gilagi laaɠuluni, gè nà-zeeʋozɛba anii zei ba, gè tɛ kiloi ɠa, gè walii wuɲɛgi ɠɔɠɔ. 11 Naa ʋolu gè pɔdi loo zɛʋɛi gilagi zeɠeni, nii daaɠuluni, ta zɔi ɓalaa daalaogai, eɠɛʋelei tɔgi boni la. 12 Gè pɔdi loo zɛʋɛ felegɔi naati pɛ kalivaani Ɓaluke ma, Neliya ná-doun zunui, Maaseya ná-dounloin. Kɛ̀kɛ loin Ɠanameyɛle ta zeeleiti ti yeeʋo pilɛni pɔdi loo zɛʋɛi zu, naati ti ɠɛni ná, ta ɓalaa Zuda nuiti kpein ti ɠɛni kasoi ma ɠoizuʋɛ. 13 Gè niima levei veeni ti ɠaazu Ɓaluke ya ga: 14 «Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: ‹Pɔdi loo zɛʋɛi zeɠe, zeeʋozɛbai wogai da, ta zɔi daa la ɠuluni, è ti lɔ pɔlɔ liɠii ta zu, nii a kɛ ti makɛ su eyɛsu suɠooza. 15 Mazɔlɔɔ Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: Niima yooi zu, pɛlɛiti ta ɠeya ʋolu dɛ, ta zooiti, ta leezɛn ɓeleiti.› » 16 Gè pɔdi loo zɛʋɛi veai ma Neliya ná-doun zunui Ɓaluke ya, gè niima maanɛɛnɛ wooi laazeelini Ɠɔoɠɔ GALAGI ma: 17 «Ee, Maliɠii Ɠɔoɠɔ GALAGI, è ɗa-zobogi ta ɗa-zoofaalai lɛɛni geeɠɔlɔgi ɓɛtɛ vai zu ta zooi. Faa nɔpɛ ge la ɓaani è ya. 18 Ɗa ɗa-wooɠɛɠiladai ɠula kɛlɛma nuɓusɛiti bɛ eyɛsu ɠɛɠalama waagila (1.000), kɛlɛ ɗa ɗa ɠɛɛɠɛiti ta-vaaɠaazagi ma ɠuyei ɠula ti-lointi ma. Ɗa ga GALAGI bɔɔlɔai ta suɓaai, nii daasei ge ga Ɠɔoɠɔ GALAGI, Fai-Pɛ-Maliɠii. 19 Ɗa ga faa ɓɛtɛ nu wolai ta faa wola ɠɛ nui. È ɠaazulogɛ nuɓusɛi ɠilagilagi ziɛ ʋelei ʋa, ɗa ɛsɛ gilagilagi pɛ sala, é zoloo siɛ ʋelei ta ná-kɛɛwotiiti ma. 20 «È ɓɔɠɔ lɛɛni poogiti ta maaɓɛlɛ vaiti su, siɛgi zu gi-mɛmɛwolani ti ɠɛni la Ezipete yooi zu, za ɓalaagi, zenɔ ɠana é la Izilayɛle nuɓusɛiti saama, kɛlɛ ɓalaa nuɓusɛi mɔtai pɛ saama, è-lɔɠɔi ɠulaa, eɠɛʋelei nu kaazu la za. 21 Ɗa ɠa é ɗa-nuɓusɛi Izilayɛle ɠulani Ezipete yooi ʋa, ga poo golaiti ta maaɓɛlɛ vaiti, è ɗa-zobogi lɛ ta ɗa-zoofaalai, é dualua golai lɔ ti zu. 22 È niima yooi veeni ti ʋɛ, è ma ɠona woni ti-ɠɛɛni bɛ ga ɗa fe ti ya, zooi ʋɛ nɔnɔi ta kɔin gulɔi ʋooʋaai ná. 23 Ti ʋaani, ti seɠe ga tɔnɔ, kɛlɛ ti la ɠɛni woiloni è-wooi ma. Nii è ti leveni ma, ti la ziɛni ga naa. Ti la naa pɛ kɛɛni, nii è ti leveni ma. Naa ɠa é kɛa, è niima maanɔɠɔiti pɛ seiɗa ti ma. 24 «Wɛlɛ Ɓaɓilɔne nuiti ba, ti maaɓuɠaa taai ʋa ga ti-zeizu ɓɛtɛ wotii, ta sosu, dɔɔʋɛ na ti yeezu, naa ɠa nu a bo, ta ʋaazu vɔnisu ma ga kɔɔi, ta pului, naa ʋɛɛ ɗɔfɔ zeeɓɛi ʋa. Nii è boni ma yeeluɠɔ, é zeelia, ɗa kaazu. 25 Ungo, ná tago nɔ ʋe ná, taai ʋa lɔ Ɓaɓilɔne nuiti zeezu. Maliɠii Ɠɔoɠɔ GALAGI, leeni vaa zu mu è devei veeni zèa, ga gè zou ɠeya, gè geyaga zeeleiti gaazu?» 26 Ɠɔoɠɔ GALAGI ɓɔɛni Zelemi ʋɔ naazu, é ɠɛ ma: 27 «Wɛlɛ! Nà ga Ɠɔoɠɔ GALAGI, fuluaniiti pɛ ta-ƓALAGI. Faa nɔpɛ ge la ɓaani zèa tago pa. 28 Naa ɠa é ba, Ɠɔoɠɔ GALAGI wooi ɠaa: ‹Nà taai nii lɔɔzu Ɓaɓilɔne masagi Neɓukadenɛzaal yeezu, ta ná-salaʋusuiti, toɠa so. 29 Ɓaɓilɔne nuiti ti laalɛai bu, ta lɔ taazuʋɛ, ti abui lo ba, ti gala, ta pɛlɛi niiti ti-ɠɔmaʋɛ ma looɠo bosuʋɛ ɠɛa ɠɛɛzu ga Zuda nuiti ti ɗa ansansegiti gala ná kɔɔɠɔ ganigi Ɓaale lɛbi vai ma, ti ɗa puya zalaɠaiti kula ná gala kiligiti bɛ, nii a kɛ ti ɗa zìiɠaawana. 30 « ‹Mazɔlɔɔ é tɔɔzei Izilayɛle nuiti ta Zuda nuiti ta-vaa lɔɔzeizu ma, ta wànama vai nɔ ɠɛɛzu. Nii é la nɛɛni bɛ̀, naa nɔ ɠa ta ɗa kɛ. Ungo, nii kpein Izilayɛle kɛa, ti pɛ ta ɗa nɔ zìiɠaawana,› Ɠɔoɠɔ GALAGI wooi ɠana. 31 ‹É zo taai nii lo gee ma, é zeeli za ma, toɠa zìiɠaawanazu, é ɗa zìiɠula. Naa ɠa é ba, gè la mɔ pɔ ga gè ɠaazula ma. 32 Tɔɔzei faa ɲɔi pɛ ba nii Izilayɛle nuiti ta Zuda nuɓusɛiti ti kɛa ga zè ga ti zìiɠaawana, tiya-o, ta-masagiti ta ta-ɠundiɠiiti-yo, naa ʋɛɛ ta-zalaɠa ɠula nuiti ta ta-ƓALA goo wo nuiti ba, Zuda nuɓusɛiti ta Zeluzalɛme zei wo nuiti pɛ. 33 Tɔun ti la mɔ wɛlɛzu gàazu, kɛlɛ ti ʋoluavega bà. Nà ma gè la ɓɔlɔni ga ti ɠalaga, kɛlɛ ti la woiloni gòo ma. Ti la yeezeini kalagi wu gè ɠɛni bosu ga tiye. 34 Ti kɔɔɠɔ gani ɠɔzɔai zeini pɛlɛi wu feai bɛ̀, ti kɔzɔa. 35 Ti zalaɠa ɠula adaʋɛti kpɛtɛʋɛ Ɓaale ʋɛ Ɓɛne-Ɠinɔme ʋɛtugi zu, nii a kɛ ti ɗa ti-loun zunuiti ta ti-loun anzanuiti kula ná ga gala zalaɠaiti Mɔlɔke lɛbi vai ma. Tama kaipa gè la kɔzɔba vai naama leve veeni ti ya, naa la vɔlɔ ɠɛni ʋilɛni nà-kisiɛi zu, ʋele ɠana ti Zuda nuɓusɛiti piliga la kotoi zu.› » 36 «Naa ɠa é ba, Ɠɔoɠɔ GALAGI, Izilayɛle ná-GALAGI wooi ɠaa é ʋilɛ taai naa ʋa, nii ɗɔun wa taɠiligaa wo ɠɛɛzu ma: ‹Kɔɔi ta pului, naa ʋɛɛ ɗɔfɔi ʋa, ti taai lɔa Ɓaɓilɔne masagi yeezu.› 37 Zìiɠaa ɠɛa wanani su nuɓusɛiti ma, naa ɠa é kɛa nà-ziiɠula golai zu, gè ɠɛa ti zuvazani zooi pɛ su. Kɛlɛ nà ga ti ɠaalɛ ba, gè ʋa ga tiye ʋolu ʋɛ, gè ti zei ziilɛigi zu. 38 Ta ɠɛ ga nà-nuɓusɛiti, gè ɠɛ ga ta-ƓALAGI. 39 Nà ti ɓɔsu ɠi gila ma, gè siɛ ʋele ʋagɔ ve ti ya, nii a kɛ ti ɠɛ bɛ̀ ga wooɠɛɠila nuiti. Naazu ti undaa ɠa nɛ, ta ti-lointi ti ʋaazu ga ti ʋoluʋele. 40 Nà ɠɔoɠɔ minazeɠegi ɓɛtɛzu gi yɔɠɔzu gá tiye. Naama minazeɠegi maaʋele ma, gè la mɔ ɠɛlɛa ti ʋa eyɛsu pɛ, kɛlɛ nà ɠɛ faaɓɔɠɔi nɔ ɠɛɛzu ti ʋɛ. Naazu ta dɛ̀bi ga ti-yii pɛ, ti la mɔ maaɠoozaa bà. 41 Kòozu ɠa nɛ ga gè ɗa faa ʋagɔi ɠɛ ti ʋɛ. Nà ti zin ʋɛ niima yooi zu, gaamazu nà naa ɠɛɛzu ga zìi ta zɛ̀nvui pɛ. 42 «Ɠɔoɠɔ GALAGI wooi ɠaa: ‹Ʋelei nɔ gè ʋaani la ga nimizai naa, niima nuɓusɛiti ma, ʋele nɔ ɠana gè ʋaazu la faa ʋagɔi naa pɛ ti ʋɔ, nii gè ma minai zeɠeai ti ʋɛ. 43 Mazɔlɔɔ nuiti ta ɠɛ kpalagiti geyazu zooi nii zu, nii wo ɠɛɛzu ma suɠoloɠologɛ, nu vulu nɔpɛ ge la mɔ su, anɛɛ sua ɠila kpalaa ge la mɔ su, kwɛɛʋɛ Ɓaɓilɔne nuiti ma. 44 Kpalagiti ta ɠɛ ɠeyazu ga walii, pɔdi loo zɛʋɛi ɠɛ ma kpaan, zeeleiti ti yeeʋo pilɛ su, Ɓɛnzamɛn yooi zu, ta Zeluzalɛme maaɠoolii zu, naa ʋɛɛ Zuda laa wolaiti su ʋa, ta gize yooi zu laa wolaiti, ta ziɛlaʋɛ ma nɛmɛi zu, naa ʋɛɛ lɛkpɛma ʋelei nu yeezazuʋɛ yooi zu laa wolaiti su ʋa. Mazɔlɔɔ nà ti zeizu ʋolu ga niinɛ,› Ɠɔoɠɔ GALAGI wooi ɠana.»