Jeremiah 52 (TOMA)
1 Sedesiyase ná-konagi ɠɛni ga puufele maazu ɠila (21), siɛgi zu é zeini la ga masagi. Kona puugɔ maazu ɠila (11) ka é kɛɛni masadai zu Zeluzalɛme. Dee laa ɠɛni ga Ɠamutal, Liɓina nui Zelemi ná-doun anzanui ɠɛni de. 2 É Ɠɔoɠɔ GALAGI wanama vai ɠɛɛni ga Yeɠoyakime ɠɛʋele fai pɛ su. 3 Niima vaiti kpein ti ɠɛɛni mazɔlɔɔ Ɠɔoɠɔ GALAGI yiiɠaawanani Zeluzalɛme ta Zuda yooi pɛ ma, ta é ɠɛni pɔ ga é ti ɓɛ ɠoba poun.Sedesiyase ɓakani Ɓaɓilɔne masagi laalɔɠɔma. 4 Sedesiyase ná-kona taaʋuugɔi alugi ʋuusiɛi ma volo ʋuusiɛi ma masa fai zu, Ɓaɓilɔne masagi Neɓukadenɛzaal ʋaani ga ná-kɔɔʋɛbɛi pɛ Zeluzalɛme laalɔɠɔma, é ná zei kɛlɛ su. Ti pɔlɔ ziɠigiti toni daalɔɠɔma, ti kaku taai ma. 5 Taai zeini kɛlɛ su eyɛsu masagi Sedesiyase ná-masadai ma ɠona puugɔ maazu ɠilasiɛi (11). 6 Alugi naanisiɛi ma volo taaʋuugɔi ma, pului ɓɔini gola taazuʋɛ, daamiani nɔpɛ ge la mɔ ɠɛni ná zooi zu nuɓusɛiti bɛ. 7 Ɓaɓilɔne nuiti ti zeɠei wɔɔni taa ma ziɠigi ʋa. Kpidii ʋɛai ma, masagi ta Zuda zalaʋusuiti kpein ti ʋelani. Anɛɛ ni Ɓaɓilɔne zalaʋusuiti ti latiga ɠɛni de taai ma, ti ɠulani taai ʋa ga pɛlɛla ʋelei nii é siɠi felegɔiti zɔɠɔzuʋɛ, masagi ná-kpelei ɠobaʋɛ. Ti liini ga pelei nii é liizu Zuludɛn ma ʋɛtu nɛmɛi zu ʋelei. 8 Kɛlɛ Ɓaɓilɔne zalaʋusuiti ti ʋilɛni masagi Sedesiyase ʋolu, ti kɔɠɔzumɛɛn Zeliko nɛmɛi zu. Ná-salaʋusuiti kpein ti vazani ba. 9 Ɓaɓilɔne nuiti ti masagi zoni, ti lii la Ɓaɓilɔne masagi ʋɔ Liɓila, Ɠamate yooi zu. Miná ɠa masagi Neɓukadenɛzaal ná-tukpɔi ɠaaleʋeni ná. 10 Ɓaɓilɔne masagi Sedesiyase ná-doun zunuiti paani ti-ɠɛɛ ɠaazu. É Zuda ɠundiɠi wolaiti pɛ paani Liɓila. 11 Naa ʋolu é Sedesiyase ɠaazuɠɛzɛiti goloni su, é gili ga kɔlu ɓɔi yɔlɔɠɔ felegɔ, ti lii la Ɓaɓilɔne ga é ʋili kasoi ɠa. Sedesiyase yɛni ná eyɛsu saa voloi zeeli. 12 Ɓaɓilɔne masagi Neɓukadenɛzaal ná-masadai ma ɠona puugɔ maazu taaʋuusiɛi (19) ma, alugi lɔɔlusiɛi ma volo puugɔi ma, Neɓuzaladan lɛɛni Zeluzalɛme, masagi makɛ nuiti ta-ɠundiɠii ɠɛni de, é ɠɛni ga nu wola Ɓaɓilɔne masagi ná-koizuʋɛ. 13 É Ɠɔoɠɔ GALAGI zei ʋɛlɛi ta masagi ná-pɛlɛi ɠala, ta Zeluzalɛme ʋɛlɛiti pɛ, ta pɛlɛ ɓiigiti pɛ. 14 Ɓaɓilɔne ɠɔɔʋɛbɛi kpein é ɠɛni masagi makɛ nuiti ta-ɠundiɠii ʋolu, ti siɠigiti goloni niiti ti Zeluzalɛme maaɠakuni. 15 Naa ʋoluma, masagi makɛ nuiti ta-ɠundiɠii Neɓuzaladan liini ga nuɓusɛi ɠilazuʋɛ nii é yɛni taazuʋɛ, ti zaama pɛlɛyeɠei niiti ti ʋalani, ta niiti ti ɓɔɠɔ veeni Ɓaɓilɔne masagi ya, naa ʋɛɛ ɲɛɛliɠi nui mɔtaiti ba. 16 Kɛlɛ é nuɓusɛi ɠilazuʋɛ yɛni ná, bala nuiti, ti ɗa botii ɠɛ leezɛn ɓeleiti su, ta kpalagiti. 17 Ɓaɓilɔne nuiti ti kɔlu ɓɔi kpɛdɛgiti galeɠaleni, niiti ti ɠɛni Ɠɔoɠɔ GALAGI zei ʋɛlɛi wu, ta wotoloiti, naa ʋɛɛ ziɛ liɠi wolai ʋa é ɠɛni ga kɔlu ɓɔigi, é ɠɛni zeini koizuʋɛ. Ti liini ga kɔlu ɓɔigi tɔnati pɛ Ɓaɓilɔne. 18 Ti zuʋu zo ganiiti ta pɛluiti, ta salaʋa zo sɔɔlaiti, ta ɲama vaza aniɲakaiti, ta ansanse seɠe ɲakaiti, ta kɔlu ɓɔi sɔɔlaiti kpein seɠeni, niiti botii ɠɛni ɠɛɛzu ga tiye Ɠɔoɠɔ GALAGI zei ʋɛlɛi wu. 19 Masagi makɛ nuiti ta-ɠundiɠii sɔɔlaiti seɠeni, ti ɓɛtɛai ga zanugi ta walii, koko wolaiti, abu zeɠe aniiti, ta ɲama vaza aniɲakaiti, naa ʋɛɛ zuʋu zo diɠiiti ba, fitina zei aniiti, ta ziawɔiti, naa ʋɛɛ diɠiiti ba. 20 Kpɛdɛ felegɔiti, ta ziɛ liɠi wolai, ta nikɛ zinɛ wola puugɔ maazu felegɔiti (12), é ɠɛni zeini ti ɠa, ta wotoloiti niiti masagi Salomɔn ti ɓɛtɛni Ɠɔoɠɔ GALAGI zei ʋɛlɛi vaa ma, nu nɔpɛ ge la ɓena ti-wuɲɛgi liegɔi ɠwɛɛ ga kɔlu ɓɔigi. 21 Kpɛdɛgi ɠilagilagi zɔligɔi ɠɛni ga mɛtɛlɛ taaʋuugɔ, kpui ɠɛ ga mɛtɛlɛ lɔzita, zeɠei ɠɛ suʋɛ, gaaɠilini ga nu yeeɓeɠa naanigɔi ta zeina ɓɔɠɔ maazu, naa liegɔi. 22 Seiga felegɔ ɓɛtɛni kpɛdɛgiti faa ma ga kɔlu ɓɔigi, ti ɠilagilagi zɔligi ɠɛni ga mɛtɛlɛ felegɔ ta tukpɛ (2,5). Kɔlu ansa ʋɛlɛʋɛlɛgiti ti ʋilipiligai ɓɔɠɔ zu eɠɛ yɔlɔɠɔ, naati kakugai seigaiti ma, gelenade gulu waai ʋaaɠulabaiti zɛlɛsɛlɛgai ti ʋa, ti pɛ ga kɔlu ɓɔigi. 23 Gelenade gulu waai ʋaaɠulabaiti ti ɓɛtɛai ga kɔlu ɓɔigi, é ɠɛni ga puutaaʋuu maazu lɔzita (96), nii kpein é ɠoolini ma, é ɠɛni ga ungila (100). 24 Masagi makɛ nuiti ta-ɠundiɠii zalaɠa ɠula ɠundiɠi wolai Selaya zoni, ta Sofoni é ɠɛni ga ná-seikobai, ta zalaɠa ɠula nu saʋagɔ ti ɠɛni GALA sei ʋɛlɛi laaʋɛ makɛsu. 25 É salaʋusu ɠundiɠi ɠila soni, nii é ɠɛni ga salaʋusuiti ta-vaaɠaaɠulaba nui, ta nu lɔfela masagi ná-tɛnɛbo nuiti saama, ta sɛʋɛ ɠɛ nui nii é ɠɛni nuiti daaseigiti sɛʋɛzu salaʋusu vai zu, tɔ ɓalaa é ɠɛni ga kɔɔʋɛbɛ ɠundiɠi gila, ta Zuda zunu ʋuulɔzita (60). Naama nuiti pɛ ti ɠɛni Zeluzalɛme taazuʋɛ. 26 Neɓuzaladan liini ga tiye Ɓaɓilɔne masagi ʋɔ bɛ Liɓila. 27 Naa ti pɛ paani náʋɛ nɔ, Ɠamate yooi zu. Ʋele ɠana Zuda liini la duɔlai zu, maaɠooza ná-zooi ʋa. 28 Wɛlɛ nuɓusɛiti tiegɔi ʋa, niiti Neɓukadenɛzaal liini ga tiye duɔlai zu: konagi lɔfelasiɛi, Zuda nu waasaʋagɔ nu ʋuufelegɔ maazu saʋagɔ (3.023). 29 Neɓukadenɛzaal ná-kona puugɔ maazu lɔsaʋasiɛi (18), é liini ga nu undɔsaʋa nu ʋuusaʋagɔ maazu felegɔ (832), é zeɠe ga tiye Zeluzalɛme. 30 Neɓukadenɛzaal ná-kona ʋuufelegɔ maazu saʋagɔi (23) ma, masagi makɛ nuiti ta-ɠundiɠii Neɓuzaladan liini ga Zuda nu undɔfela puunaani maazu lɔɔlugɔ (745), ti kpein tiegɔi ɠɛ niina ga nu waanaanigɔ undɔzita (4.600). 31 Kona ʋuusaʋagɔ maazu lɔfelai (37) ɠɛai ma Zuda masagi Yeɠoyakin ʋɛ duɔlai zu, Evile-Melodake zeini ga Ɓaɓilɔne masagi. Naama ɠonagi ma alu puugɔ maazu felegɔi (12) ma volo ʋuufelegɔ maazu lɔɔlugɔi (25) ma, é Yeɠoyakin maavaayɛni, é kula kasoi ɠa. 32 É ɠɛni ɓɔɛzu pɔ ga pagɔ. Naa ʋoluma é tosu veeni zea é ɓudɛ zɔɔma masagiti tɔnɔiti maazu, niiti ti ɠɛni ba Ɓaɓilɔne. 33 É zobogi veeni Yeɠoyakin ya ga naa mina mɔ kasoɠa zeɠei loo ɠɔba. Naa ʋoluma é ɠɛni laamiizu niina masagi ná-taɓalii ɠa sii ma voloi pɛ su. 34 Ɓaɓilɔne masagi maavaiti kpein kɛɛni, é ɗa ti ɠaaɠula ba, folo-o-folo, sii ma voloi pɛ su, eyɛsu saa yeei zeeli.