Jeremiah 9 (TOMA)
1 Ni ti dɔɔɠuzu veeni bɛ̀ teʋebai zu, eɠɛ siɛ wo nu,nà la zeɠe nà-nuɓusɛiti ba,gè li, gè maaɠooza ti ʋa.Mazɔlɔɔ ti pɛ ta ga wɛɛnziɛ nuiti,yaava nu ɓulugiti. 2 «Ti-nɛgi ɠɛɛʋɛ eɠɛ mɛɛin sumɛɛngai.Gaamai zaɓui zu laade ti ʋa ɠɛ zeizu la zooi unda,kɛlɛ kɛni zɛɛi zaɓui.Ti ɗa faaɠaazagi ɠɛ, ti da faaɠaazagi maazu,ti la nɔ̀un kwɛɛ,»Ɠɔoɠɔ GALAGI wooi ɠana. 3 «Ɛsɛ ge ɓɔɠɔ zo bɔɔlai letema,nu mina la kɛɛɠɛlounɠa la.Mazɔlɔɔ kɛɛɠɛloin pɛ ka ga yaava nui,bɔɔla nui pɛ ka tɔɠɔ ɠoloɠolo kpɔɛiti fazasu. 4 Ɛsɛ ka seiɲɔɠɔi yaavazu,taɠila kpalaa ge la gaama wosu,zɛɛ wo fai nɛɛʋɛ ti ʋɛ.Ti yɛga faa ɲɔi ɠɛɛzu, eyɛsu ʋɛ ti ná,ti la mɔ ɠalega ma, ti ʋa ʋa pɔ̀. 5 Ta ɓesu nɔ ga toomai ta ɠɛ, ti taɠili tɔɔzei,ti ɓe nɔ ga zɛɛ ta wo, ti taɠili tɔɔzei,ta ɠɛlɛzu ga ti ʋa nɔ̀un kwɛɛ,»Ɠɔoɠɔ GALAGI wooi ɠana. 6 Naa ɠa é ba, Ɠɔoɠɔ GALAGI, Fai-Pɛ-Maliɠii wooi ɠaa:«Nà ti maagbazu ga abui, gè ti vɛɠɛlɛfɛɠɛlɛ.Mazɔlɔɔ leeni ɠili ka nà kɛ ga nà-nuɓusɛi ɓulugiti? 7 Niima nuiti nɛgi ɠa ga mɛɛin gaazoɓaai,nii ti bosu, naa ɠa nɔ ga yaavai.Ta ziilɛi fai wosu nɔ ga ti-laaʋɛ ti-zeiɲɔɠɔ ma,kɛlɛ naa ʋoluʋɛ ɠa ga ti baliiti da tuɠɔ. 8 Gè la wuzeɠea ti laalɔɠɔma naa maaʋele ma ɓaa?»Ɠɔoɠɔ GALAGI wooi ɠana.«Gè la nɔ̀nɔ ʋotokula niima zii ɠɛɠalai ma ɓaa?» 9 Nà nà-gɔlɔi ta nà-kpala gooiti bo gizeiti ma,gè kpee looi zuɠula teʋebai ná-faa zu, ʋɛ tufa lɛnugi ɠɛa ɠɛɛzu ná,mazɔlɔɔ ti ɠalaa, nu nɔpɛ ge la mɔ ziɛzu ná.Nu la mɔ suaiti ta wɔniiti goomɛnisu naa ʋɛɛ toganiiti ba, ti pɛ ti ʋelaa, ti li. 10 Ɠɔoɠɔ GALAGI ɠɛ ma:«Nà Zeluzalɛme ɠɛɛzu ga puulegi ná zuɠoloɠolo,koʋeiti daamiizuʋɛ,gè Zuda laa wolaiti kɛ ga iɲɔteʋe adaʋɛti, nu la ɠɛa ná.» 11 Zunu ɠa nɛi ná, nii é niima vaiti gaaɠaazu, a ti ʋoluwo?Ni Ɠɔoɠɔ GALAGI ɠa é ɓɔɛni pɔ,é dɛɛ lɛɛ leeni vaa zu zooi loai ya,é ɠala eɠɛ teʋebai zu, ʋɛ nu nɔpɛ ge la leʋesu ná? 12 Ɠɔoɠɔ GALAGI ɠɛ ma: «Naama vaiti kpein ti zeelini ti ma, tɔɔzei ti ɠɛlɛni nà-tɔ gooiti ba nii gè feeni ti ya, ti la woiloni gòo ma, ti la naa ɠɛɛni nii gè boni ti ma. 13 Tɔɔzei ti ʋilɛgɛ kɔɔɠɔ ganigi Ɓaale ná-pelei ma ga goizuɓɔlɔi, eɠɛʋelei ti-ɠɛɛni ti ti ɠalani da. 14 Naa ɠa é ba, nɔ̀un nà, Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI, gòoi ɠaa: Nà ʋaazu ani wanai losu niima nuɓusɛiti da, nà anivebɛ ɗɛiti tosu ti-la. 15 Nà ti vazasu zii ɠiligiti saama, niiti tiya-o, ti-mɛmɛwolani-yo, ti la ɠɛni ti ɠwɛɛ. Nà kɔɔi ʋilɛ ti ʋolu, eyɛsu gè ta-vai ɓe.» 16 Ɠɔoɠɔ GALAGI, Fai-Pɛ-Maliɠii wooi ɠaa:«À gɔlɔ wo anzanuiti toli, ti ʋa!À nu leʋe é anzanuiti gaiziɛ niiti ti wola zoogai wɔlɔzu, ti ʋa!» 17 Ti suvilɛ, ti ʋa, ti gɔlɔ wooi zuɠula gá-vaa zu!Gi-ɠaazuɗɛiti ti leʋe ma, gi-ɠaazuɠɔlɔgiti ti yɛɓɛ! 18 Mazɔlɔɔ maawɔin ɓeei ɠa loozu Siyɔn ga:«Ade ɠoloɠologa, ada unfegi zu,mazɔlɔɔ ade zeɠea da-yooi zu,ade ada-ʋɛlɛiti zɛga, ti woloai.» 19 Ee, anzanuiti, à woilo Ɠɔoɠɔ GALAGI laawooi ma,à naa mɛni ga wo-woiyeɠei, nii é ɠulazu daaʋɛ!À wo-loun anzanuiti kala ga kpalagi wo fai,anzanui ɠilagilagi zeiɲɔɠɔi ɠala ga saa wɔlɔ wuyei. 20 Mazɔlɔɔ saai lɛɛni ga ada-venɛtɛlɛ la ʋeleiti,é lɔ da-ʋɛlɛ ʋagɔiti bu,é doungoiti undaaʋili taazuʋɛ,ta é nu niinɛiti teʋeɓasu koi yɔɠɔzuʋɛti. 21 Nii wo adaʋɛ pɛ, ga Ɠɔoɠɔ GALAGI ɠɛ:«Nu ʋoomai ɠa ʋu dɔɓɔi zu eɠɛ kpoɠa pɔlɔi,eɠɛ molo ɠiliiti molo leʋe nuiti ti zɛsu ʋoluʋelei,nu nɔpɛ ge la gaalɛɛni ba!» 22 Ɠɔoɠɔ GALAGI wooi ɠaa:«Ɠima nui mina ɓɔɠɔ maamusɛ ga ná-ɠimalai.Zunui suɓaai é mina ɓɔɠɔ maamusɛ ga ná-suɓaai.Kpɛtɛ nui mina ɓɔɠɔ maamusɛ ga ná-kpɛtɛi. 23 Kɛlɛ zɔi é pɔ é ɓɔɠɔ maamusɛ,é ɓɔɠɔ maamusɛ ga é ɠigi zɔlɔɔga ga é zoo é nɔ̀un kwɛɛ,nɛ̀i gè ga Ɠɔoɠɔ GALAGI,gè faiti kɛɛzu ga wooɠɛɠiladai, ta sɔledai, ta telebodai eteai zu,mazɔlɔɔ faiti kana ta ɗa zìila,»Ɠɔoɠɔ GALAGI wooi ɠana. 24 «Wɛlɛ, foloi tanigaa ta ʋaazu,yeei gè wuzeɠezu la naati daalɔɠɔma,niiti ti latigai pɛlɛʋolu ti-ɓusɛiti nɔ zu,»Ɠɔoɠɔ GALAGI wooi ɠana, 25 «Ezipete nuiti, ta Zuda nuiti, ta Edɔme nuiti, ta Amɔn nuiti, ta Moaɓe nuiti,ta nuɓusɛiti ti zeini teʋebai zu,niiti kpein ti ti-ɓakalagiti bosu.Mazɔlɔɔ niima nuɓusɛiti pɛ, ta Izilayɛle nuiti ɓɔɠɔi,ti-yii la latini pɛlɛʋolu.»