John 5 (TOMA)
1 Ku ɠɛai ma fele, Yesu ɠaleni ma ʋolu Zeluzalɛme, Zuifuiti ta-vɛtii ta zu. 2 Tama Zeluzalɛme miná, Baala Siɠidaʋɛ ɠobaʋɛ, kpoi gila ge ɠɛni ná, daaseigi ga Ɓɛtezata, Eɓulu wooi zu. Kota lɔɔlugɔ ɠɛni kpoigi naa ɠoba. 3 Seeɓɛ nu mɔinmɔingiti ti ɓena laa kotai niiti bu: gaazuɠole nuiti, mɛɠɛlɛ nuiti, ta kɔlɔsama nuiti. [Ti ɓena ziɛi ɲiikpi fai maaɓɔun. 4 Tɔɔzei geezuɠeelai gila ge ɠɛni yeizu yeeɠɛɠalai tanigaa zu, é ɗa ziɛi ɲiikpi. Zɔi nɔpɛ a la yeina ziɛ ɲiikpigai wu mɔunpa, seeɓɛi ma zii nɔpɛ a la ɠɛna ma nu ʋa, é ɓena ʋalo.] 5 Zunu ɠila ge ɠɛni miná, nii é kɛɛni seeɓɛi zu ga kona ʋuusaʋagɔ maazu lɔsaʋa (38). 6 Yesu kaani laani ná. É kwɛɛgai ma ga naa lɛbiga seeɓɛi zu, é gaazaɠani, é ɠɛ ma: «Ɗa pɔ è ʋalo?» 7 Seeɓɛ nui gooɠaaʋoteni, é ɠɛ ma: «Màliɠii, siɛgi zu ziɛi ɲiikpisu da, nu la bɛ̀, nii a pìli bu. Siɛgi zu gè ɠɛɛzu la, gè li ná, taɠili ka yeizu bu tùɠɔ.» 8 Yesu ɠɛni ma: «Wuzeɠe, è ɗa-zaɓai zeɠe, è ziɛ.» 9 Gaamago nɔ, zunui naa ɠɛdɛni, é ná-saɓai zeɠe, é tɔɔzei ga é ɗa ziɛ.Naama vai ɠɛɛni ga dooɠo foloi ta. 10 Zuifuiti ta-ɠundiɠiiti ti ɠɛni zunui ma, nii kɛdɛga ɠɛni de nɔ feya: «Za ɠa ga dooɠo foloi, tɔgi la vaani bu ga è ʋa ɗa-ʋetei zeɠe.» 11 Zunui naa ti wooɠaaʋoteni, é ɠɛ ti ma: «Zunui nii é bàloai, naa ɠa kɛai mà: ‹Ɗa-zaɓai zeɠe, è ziɛ.› » 12 Ti ɠɛni ma: «Ɓɛ ɠa kɛai è ma: ‹Ɗa-ʋetei zeɠe, è ziɛ›?» 13 Kɛlɛ zunui nii é ʋaloni, naa la ɠɛni kwɛɛni, tɔɔzei Yesu ɲɛɛlɛni bɛbɛi zaama, nii é ɠɛni ná. 14 Naa ʋoluma Yesu kaani yeeta GALA sei ʋɛlɛi wu, é ɠɛ ma: «Ɗa ɠana, è ʋaloai, mina mɔ koto ɠɛ, naa ɠa a kɛ faa mina zeeli è ma, nii gola a ɲɔu.» 15 Zunui naa liini, é bo Zuifuiti ta-ɠundiɠiiti ma ga Yesu ɠa é baloni. 16 Naa ɠa é kɛɛni, Zuifuiti ta-ɠundiɠiiti ti ɠɛni Yesu wɔinzeɠezu, tɔɔzei é ɠɛni naama vaiti kɛɛzu ga dooɠo foloi. 17 Kɛlɛ Yesu ti wooɠaaʋoteni, é ɠɛ ti ma: «Zaaɠaza Kɛ̀ɛ ɠa botii ɠɛɛzu, nà ɓalaa, nà botii ʋa, gè ɗa kɛ.» 18 Naama wooi maaʋele ma Zuifuiti ta-ɠundiɠiiti ti wola zɛbɛzeɠeni ga ti Yesu ʋa, tɔɔzei é ɠɛni dooɠo foloi ma lɔgi ɠoloɠolosu, naa ʋoluma é ɠɛni ɠɛɛzu GALA ka ga Kɛɛɠɛ ɠitei, é ɗa ɓɔɠɔ ɠɛ ga GALA kɛʋele. 19 Yesu ti wooɠaaʋoteni, é ɠɛ ti ma: «Gè bo wo ma ga gaamai, Doun Zunui la ɗa ga faa nɔpɛ kɛ ɓɔɠɔ ʋɛ, kɛni nii nɔ é Ɠɛɛɠɛ GALA kaazu, é ɗa kɛ. Tama nii kpein Ɠɛɛɠɛ GALA ge kɛɛzu, Doun Zunui ɠa naa ɠɛɛzu ɓalaa. 20 Tɔɔzei Ɠɛɛɠɛ GALA ge Doun Zunui nɛɛʋɛ ʋɛ, ta nii pɛ é kɛɛzu, toɠa naa lɛɛzu ga Doun Zunui. Toɠa zobogi ve zea, ga é faa ɓaaza golai taɠiligaa ɠɛ, niiti ti leʋegai niiti ba, wo ti ɠaai, naa ɠa a kɛ wo laavɔ. 21 Tɔɔzei ʋelei Ɠɛɛɠɛ GALA ge gɔvɛiti buzeɠezu la, é ti ɠula saai ya, é zɛnvui ve ti ya, zenɔ ɠana Doun Zunui ɓalaa ɠa zɛnvui veezu naama nui ya, nii é pɔ é fe bɛ. 22 É ɓudɛ naa maazu, Ɠɛɛɠɛ GALA tɛi a ɗa nuiti ta-lukpɔi ɠaaleʋe, kɛlɛ é tukpɔɠaaleʋe vai pɛ zɛgɛ Doun Zunui ya, 23 naa ɠa a kɛ nuiti pɛ ti unfemai ve Doun Zunui ya, ga Ɠɛɛɠɛ GALA kɛʋele. Zɔi é la unfema veeni Doun Zunui ʋɛ, naama nui la unfema veezu Ɠɛɛɠɛ GALA bɛ, nii é tɔun teʋegai. 24 Gè bo wo ma ga gaamai, zɔi nɔpɛ a woilo gòo ma, é ɠidaaleʋe naa ma, nii é tèʋegai, ɠɔoɠɔ zɛnvui ɠa naama nui ya, tukpɔɠaaleʋe la mɔ maala, kɛlɛ kulaʋɛ niina saai ya, é ʋa zɛnvui ʋɔ. 25 «Gè bo wo ma ga gaamai, yeeɠɛɠalai ɠa ʋaazu, tɔun vɔlɔ é zeelia, siɛgi zu zɔiti ti zaai, ti ʋaazu GALA Doun Zunui wooi mɛnisu da, tama zɔiti pɛ ta gooi mɛni, naati ta zɛnvui wo. 26 Tɔɔzei Ɠɛɛɠɛ GALA ɠa ga zɛnvui ma ungi, é zobogi veeʋɛ Doun Zunui ɓalaa ya ga é ɠɛ ga zɛnvui ma ungi. 27 Tɛi é ga Nu ná-Doun Zunui, GALA ge zobogi veeʋɛ zea ga é ɠɛ ga tukpɔɠaaleʋe nui. 28 Wo laa mina vɔ, yeeɠɛɠalai ɠa ʋaazu, zɔiti pɛ ti kabaiti su, ta Nu ná-Doun Zunui wooi mɛni. 29 Naazu ti ɠula kabaiti su. Zɔiti ti faa ʋagɔi ɠɛai, naati ta wuzeɠe, ti ɠula saai ya, zɛnvui wo fai ma. Niiti ti faa ɲɔi ɠɛai, naati ta wuzeɠe, ti ɠula saai ya, ta-lukpɔɠaaleʋe vai ma. 30 Nɔ̀un gè la zooga faa nɔpɛ kɛɛzu ga ɓɔɠɔ zobogi. Nà tukpɔɠaaleʋezu eɠɛʋelei Ɠɛɛɠɛ GALA ge dɛɛzu la ga ze. Tama nà-tukpɔɠaaleʋei zɔlegɛ, tɔɔzei nɔ̀un ziima vai lɛi gè ʋa ɠɛ kɛɛzu, kɛlɛ zɔi é tèʋegai, naa yiimai ɠa gè kɛɛzu.» 31 «Ni nà ɓɔɠɔ nɔ ɠa gè zeele wooi wosu nà ɓɔɠɔ nà-faa zu, nà-zeele wooi la ɠɛni ɠɛa ga gaama. 32 Kɛlɛ zeele ɠili ka zèa, tama gè kwɛni ga ná-zeele wooi ɠa ga gaama. 33 «Wɔun, wo faa wuuɠaiziɛ ɠeelaiti teʋeni Zan ma, tama é zeele wooi woni gaamai ʋɛ. 34 Nɔ̀un kpɛdɛ la ba ga nu zeele woo wo bɛ̀, kɛlɛ nà nii wosu, nii a kɛ wo ɠizo. 35 Gaamazu Zan ɠɛni ga fitinai abui sosu ba, nii ma wozakalagi ɠɛni volozu. Wɔun, é nɛɛni wo ʋɛ ga wo ɠoozunɛ yeeɠɛɠala go laawu ná-wozakalagi ɠa. 36 «Nɔ̀un, zeele woo ɠa zèa nii bɔɔlɔai é leʋe Zan nɔnɔi ʋa. Kɛɛwotii niiti Ɠɛɛɠɛ GALA ti veai zèa ga gè kɛ, naati ka ti dɛɛzu kpezekele ga Ɠɛɛɠɛ GALA ɠa é tèʋegai. 37 É ɓudɛ naa maazu, Ɠɛɛɠɛ GALA ɓɔɠɔi é tèʋegai, naa ɠa zeele wooi wosu bɛ̀. Kɛlɛ kaipa wo la dɛ gooi mɛnini, wo la dɛ ɓalaa gaazuʋɛ ɠaani. 38 Daawooi la yɛni wo ɠisu, tɔɔzei wo la ɠidaaleʋeni naama nui ma, nii é teʋegai. 39 Wa ɠaaɓaazu kele, wo ɗa GALA sɛʋɛiti kala, tɔɔzei wo laaʋɛ da ga wa ɠɔoɠɔ zɛnvui zɔlɔɔ naati saɓui zu. Tama naati mu ka ti zeele wooi wosu nɔ̀un bɛ. 40 Kɛlɛ wo la ʋaazu pɔ̀, wo ʋa zɛnvui zɔlɔɔ. 41 «Gè la ɓɛdɛni ga nuiti ti lɛbiya ve bɛ̀. 42 Kɛlɛ faa ɠila ka gè kaazu, naa ɠa ga nɛɛbɛ nɔpɛ ge la wo-yiimaʋɛti GALA bɛ. 43 Nɔ̀un, pàaʋɛ Ɠɛɛɠɛ GALA laaseigi zu, wo la kɛɛzu, wo ʋa yeezei bù. Kɛlɛ ni nu ɠili ka ʋaana ɓɔɠɔ laasei su, wa yeezei naa wu. 44 Tɔun vɔlɔ, wa la zoo ɠidaaleʋezu ɠale, wɔigiti wo lɛbiyai ɠaiziɛzu ɓɔɠɔ ya wo ɠilagilagiti, wo la lɛbiyai ɠaiziɛzu, nii é zeɠezu GALA pɔ bɛ nɔ? 45 «À mina vɔlɔ ɠisiɛ ga nà ɠa gè ʋaazu wo ʋeelalazu Kɛ̀ɛ ɠakala. Moize ɠa é ʋaazu wo ʋeelalazu, Moizei nii wo ɠitogai ba. 46 Mazɔlɔɔ ni wo laani Moize la ga ɠite, wa la la nà ɓalaagi la, tɔɔzei nà ɠa é nà-faa wogai ná-sɛʋɛiti su. 47 Kɛlɛ ni wo la ɠidaaleʋeni naama zɛʋɛiti su wooiti ma, wa zoo ɠale ɠidaaleʋezu nɔ̀un gooiti ma?»