Job 40 (TOMA)

1 Ɠɔoɠɔ GALAGI Zɔɓe ɠaazaɠani, é ɠɛ ma: 2 «Ɗa ʋe, GALA Zɛbɛi-Pɛ-Maliɠii maaɠaali nui, ɗa zoo nɛi è va ma?Zɔi é GALA maaɠaalizu, gooɠaaʋote ka zea, ɓaa?» 3 Zɔɓe Ɠɔoɠɔ GALAGI wooɠaaʋoteni, é ɠɛ ma: 4 «Wɛlɛ, gè la ga ani nɔpɛ, leeni ɠa nà è wooɠaaʋote da?Gè yeeʋɛa la deɠɛmu. 5 Gè ɓɔɛa, ná ɠɛ ɠila, gè la mɔ gooɠaaʋote bosu ʋolu.Ná ɠɛa fele, gè la mɔ ta laazu ma.» 6 Názu, Ɠɔoɠɔ GALAGI yɛni fiilɛ wolai zu, é Zɔɓe wooɠaaʋote, é ɠɛ ma: 7 «Ɗa-zaamaɠiligi ɠili eɠɛ ziilo nui,nà ʋaazu è ɠaazaɠasu, ɗa kàlasu. 8 È wɔinʋɛ gaamazu, è dɛɛ ga gè la leleboni?Ɗa pèelalazu nii a kɛ è ɓɔɠɔ maalobo? 9 È yeezuɓaaʋɛ ga GALA kɛʋele?È-wooi ɠa zoo nɛi é zizi eɠɛ ga tona kpunɛ tugi ɠɛʋele, ga nɔ̀nɔi ɠɛʋele? 10 Li, è ɓɔɠɔ ɓɛtɛ ga unfemai ta bɔɔlɔi,è ɓɔɠɔ maaɠili, è ɗa volo, è maayiki! 11 Ɗa-yiiɠaawana wolai ɠula ɠɔbu ga nuɓusɛiti,wɛlɛ nɔ ná ɠɛ ɠila kpe, è waso nuiti gaayei. 12 Waso nuiti kpein pɛtɛ, è ti ʋɛɛ ɠɔɠɔwu.Faa ɲɔu ɠɛ nuiti dɛɛvɛ gaamago nɔ. 13 Ti lɔɔɠu ʋɔɔma fufiligi wu.Daaɠulu ti pɛ ma, saai ma ɠasoi ɠa. 14 Názu, nà ɓɔɠɔi nà è maamusɛ,mazɔlɔɔ è-yeei ɠa a ɠɛ ga ɗa-zobo sɔlɔɔ fai. 15 «Wɛlɛ maalegi ʋa, nà ɠa gè ga kpɛtɛ nui,eɠɛʋelei gè ga è ɓɛtɛ nui la.Toɠa ga tufa mii zuai nɔ, eɠɛʋelei nikɛi la. 16 Wɛlɛ ba! Ná-zɛbɛi ɠa saamaʋɛ,ná-suɓaai ɠɛ koozuʋɛ ma ɲataiti zea. 17 Toɠa wɔɔngi maalesu, é kpa kpe, eɠɛ gului daa ga sɛdelegi.Kɔɠɔʋolu ɲataiti fɛlɛʋɛ, ti lɔ kpalai zu. 18 Kaeiti kpaaʋɛ eɠɛ kɔlu ɓɔi kalii maaɓiligi,kaka ɠaeiti kulaʋɛ ga kɔlu ɓiligiti. 19 Toɠa ga GALA ná-kpɛtɛanii ma ɓii golai,zɔi é kpɛtɛa, naa ɠila kpe ka zobogi bɛ ga é vɔni ma. 20 Gizeiti ka ta ɗa ná-daamiani tufai ve,ʋɛ dɔɓɔ zuaiti kpein ti ɠaɠosu ná. 21 Ná-dooɠo bosuʋɛ ɠa ga dɔɓɔ goi ma niinigiti bu,toɠa ɗa lɔɔɠu kpoigi laaʋɛ ma lufaiti su. 22 Maa ɠa ɗa lɔɔɠu ga dɔɓɔ goi ma niinigi,kɔtuɗɛi ma wulu wolaiti ti laa ga pepiliye, naati ta ɗa maaɠaku. 23 Ni ziɛi a vena, é la ɲiikpiga.Ni Zuludɛn a ʋuuna daaʋɛ, maaɠɛgɛ kpɔ, ziilɛi. 24 Nu ɠa zoo é so ɓaa, siɛgi zu é ɠaazuzeɠeai ma la?Nu ɠa zoo nɛi, é so ga balii ɓaa, é dakulugi ɓota? 25 «Ɗa li nɛi, è sua maayikiai ɠula ga kalagi ɓaa?Ɗa zoo è nɛgi ɠili ga galui? 26 Ɗa zoo è sokpayeɠei ɓota ga tɛmui,è kpalɔɠaei ɓota ga kalagi? 27 Toɠa è maanɛɛnɛ ga gola ɓaa?Toɠa woo ʋagɔa wo è ma nɛi ɓaa? 28 Toɠa minazeɠe bo è ʋɛ ɓaa?Ɗa so, é yɛ è ya ga duɔi eyɛsu ɠɔ ɓaa? 29 Ɗa ɠaɠo da nɛi, eɠɛ wɔni goi?Ɗa gili nɛi ɓaa, ga è-loun anzanu goiti ti ɗa ɠaɠo da? 30 Wa ɓɔna su, wa pɔdi nɛi ɓaa?Pɔdi loo nuiti ta zoo ti gaaɠwɛ ʋa ɓaa? 31 Ɗa zoo è ma ɠɔlɔi ɓota ga doɠai ɓaa,ɓaa nɔungi ga kale ɠula ɠalagi? 32 Yeeʋɛɛ lɛɛ ba, è la yeema naama ɲɛpii ma,è la mɔ ta ɠɛa, eyɛsu pɛ!»

Job 40 (TOMA)

In Other Versions