Joshua 13 (TOMA)
1 Zozuwe wɔlɔzaɠani niina. Ɠɔoɠɔ GALAGI ɠɛni ma: «Wɛlɛ, è wɔlɔzaɠaga, tama zooi wɔɔlɔʋɛ dɛ ná, nii é la dɛ zoni. 2 Zooi ʋɛtɛ, zɛgai ná: Filisiti nuiti ta-yooiti kpein, ta Gesuul nuiti ta-yooi kpein. 3 É zo Siɠɔɔl ɗɛi ma, é yeizu Ezipete yooi zu ʋele, Ekelɔn kwɛmaʋɛ lɛkpɛmaʋɛ nu ɠɔʋɛzuʋɛ, naama adaʋɛ pɛ ka levezu ga Kanaan nuiti ta-yooi. Miná ɠa Filisiti nuiti ta-masada lɔɔlugɔiti ma laa wolaiti ti ná, Gaza, Asadɔde, Asekalɔn, Gate, ta Ekelɔn, ta Ava nuiti ta-yooi lɛkpɛmaʋɛ nu yeezazuʋɛ. 4 Kanaan yooi pɛ ka dɛ ná ɓalaa, maanɛai é zo, é zo Meyala ma, nii é ga Sidɔn nuiti tɔnɔi, eyɛsu é zeeli Afɛke, Amool nuiti ta-ɠwɛpelemaʋɛ, 5 ta Geɓale nuiti ta-yooi, ta Liɓan kpein, folo ɠulazu ʋelei, é zo Ɓaale-Gade, Ɠɛɛlɛmɔn gizei ɠɔɠɔaʋɛ, eyɛsu é zeeli Leɓo-Ɠamate, 6 nuiti kpein ti zeini gize yooi zu, é zo Liɓan, é zeeli Miselefɔte-Mayime, Sidɔn nuiti kpein. Nà ti ɓɛɛzu Izilayɛle nuiti tuɠɔ. Naa ɠa é ba, naati kpein fe Izilayɛle ya ga kpakutoomai, eɠɛʋelei gè ma levei veeni la, 7 zooi tɛi gaaɠwɛɛna, è fe boloda taaʋuugɔiti zea, ta Manasé ná-bolodai ɠilazuʋɛ.» 8 Manasé ná-bolodai ɠilazuʋɛ zɔi ta Luɓɛn ná-bolodai, ta Gade nɔnɔi, naati ti ta-yooi zɔlɔɔni. Ɠɔoɠɔ GALA ná-botiɠɛ nui Moize feeni ti ya Zuludɛn folo ɠulazu ʋelei, 9 é zo Alowɛɛl, ziɛ wolai Aalanɔn laaʋɛ, eyɛsu é zeeli taa wolai ma, é pɛtugi zaamaʋɛ, é ɓɔ gize nɛmɛi kpein ba, é zo Medeɓa, eyɛsu é zeeli Diɓon, 10 ta Amool nuiti ta-masagi Siɠon, nii é ɠɛni masadai ɠɛɛzu Ɠɛsɛɓon, naa ná-taa wolaiti kpein, é zeeli Amɔn nuiti ta-ɠwɛpelemaʋɛ. 11 É ɓɔ Galaade yooi ɓalaagi ʋa, ta Gesuul nuiti ta-yooi, ta Maakate nuiti, ta Ɠɛɛlɛmɔn gizei, ta Ɓasan kpein é zeeli Saleka, 12 ta Wɔge ná-masadai kpein Ɓasan yooi zu, nii é ɠɛni ga Lefa mavofodai ma ɠaaɓelagi, é masadai ɠɛɛni Asatalɔte ta Edeleyi. Moize zobogi zɔlɔɔni niima masagiti ma, é ti ɓɛ ta-yooi ɠa. 13 Kɛlɛ Izilayɛle nuiti ti la ɠɛni Gesuul nuiti ta Maakate nuiti kpɛɛni, naa ɠa é kɛa ti zeini Izilayɛle nuiti saama, zaaɠaza. 14 Levi ná-bolodai ɠila kpe ka é la ɠɛni zou zɔlɔɔni ga nɔnɔ. Kɛlɛ gala zalaɠaiti, ti ga Ɠɔoɠɔ GALAGI Izilayɛle ná-GALAGI nɔnɔi, naa ɠa é ga tɔnɔi, eɠɛʋelei é woni la tɔun ma. 15 Moize Luɓɛn ná-bolodai nɔnɔi veeni zea, eɠɛʋelei ta-ʋɛlɛyeɠeiti ti la. 16 Zooi ti sɔlɔɔni, é zoni Alowɛɛl, ziɛ wolai Aalanɔn laaʋɛ, ta taa wolai é pɛtugi zaamaʋɛ, gize nɛmɛi kpein ma Medeɓa ɠobaʋɛ, 17 é li Ɠɛsɛɓon, ta ma laa wolai kpein ti gize nɛmɛi ma: Diɓon, Ɓamɔte-Ɓaale, Ɓɛte-Ɓaale-Meyon, 18 Yasa, Kedemɔte, Mefaate, 19 Kiliyatayime, Siɓima, Seelɛte-Ɠasaɠaal pɛtugi ma ɠizei ma, 20 Ɓɛte-Peyɔɔl, Pizega ɠizei ɠɔɠɔaʋɛ, ta Ɓɛte-Yesimɔte. 21 Gize nɛmɛi maaʋɛ laa wolai naati kpein poluma, ti Amool nuiti ta masagi Siɠon ná-masadai ma yooi kpein sɔlɔɔni, nii é ɠɛni masadai ɠɛɛzu Ɠɛsɛɓon. Moize zobogi zɔlɔɔni Siɠon ma, ta Madiyan ɠundiɠiiti, ti ɠoloni Siɠon ʋɛ, ti zeini zooi zu: Evi, Lekɛme, Suul, Ɠuul, ta Leɓa. 22 Ungaiziɛ nui Ɓalaame, Ɓeyɔɔl ná-doun zunui ɠɛni naati saama, niiti Izilayɛle nuiti ti ti ʋaani ga boɠa zɔkpɔi. 23 Luɓɛn mavofodaiti ta-ɠwɛpelemaʋɛ ɠɛni ga Zuludɛn, ta ziɛlaʋɛ.Luɓɛn mavofodaiti ta-wolodai nɔnɔi ɠana, eɠɛʋelei ta-ʋɛlɛyeɠeiti ti la, taa wolaiti ta ma laa goiti. 24 Moize Gade ná-bolodai nɔnɔi veeni zea, eɠɛʋelei ta-ʋɛlɛyeɠeiti ti la. 25 Nii ti sɔlɔɔni ga zooi ná ɠɛni ga: Yazɛɛl, ta Galaade laa wolaiti kpein, ta Amɔn nuiti ta-yooi ɠilazuʋɛ, é zeeli Alowɛɛl, Laɓa letemaʋɛ, 26 é zo Ɠɛsɛɓon, é zeeli Lamate-Misepé, ta Ɓetonime, é zo Maɠanayime, é zeeli Deɓiil ɠwɛpelemaʋɛ, 27 ta nɛmɛi zu, Ɓɛte-Ɠalame, Ɓɛte-Nimala, Sukɔte, ta Safon, Ɠɛsɛɓon masagi Siɠon ná-masadai ma yooi mɔtai. Naama yooi kpein é ɠɛni ziɛ wolai Zuludɛn ʋoluʋɛ. Zuludɛn ɠɛni zou ɠwɛpelemaʋɛ, nii é folo liizu ʋelei, eyɛsu é zeeli ziɛ wolai Zenezalɛte ɠaaɓelazuʋɛ, lɛkpɛmaʋɛ nu ɠɔʋɛzuʋɛ. 28 Gade mavofodaiti ta-wolodai nɔnɔi ɠana, eɠɛʋelei ta-ʋɛlɛyeɠeiti ti la, taa wolaiti ta ma laa goiti. 29 Naa ʋoluma, Moize Manasé ná-bolodai ɠilazuʋɛ nɔnɔi veeni zea, gaaɠwɛ ti ʋa, ʋelei ta-ʋɛlɛyeɠeiti ti la. 30 Zooi ti sɔlɔɔni, naa ɠɛni ga Ɓasan, é zo Maɠanayime, Ɓasan masagi Wɔge ná-masadai ma yooi kpein, ta Yayiil ná-taa go ʋuulɔzita (60), ti kpein ti ʋuuni ma yooi zu. 31 Naa ʋoluma, ti Galaade yooi ɠilazuʋɛ zɔlɔɔni, ta Asatalɔte ta Edeleyi, Ɓasan masagi Wɔge ná-masadai ma laa wolaiti. Ti ti pɛ gaaɠwɛ Makiil mavofodaiti ba, Manasé ná-doun zunui, ʋelei ta-ʋɛlɛyeɠeiti ti la. 32 Zooi ɠana, nii Moize feeni Moaɓe yooi ma nɛmɛiti su, Zuludɛn ʋoluʋelei, Zeliko letemaʋɛ, folo ɠulazu ʋelei. 33 Moize la ɠɛni zou veeni Levi mavofodaiti zea. Ɠɔoɠɔ GALAGI, Izilayɛle ná-GALAGI ɠa é ga tɔnɔi, eɠɛʋelei é boni la ti ma.