Leviticus 6 (TOMA)

1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Niima levei ve Aalɔn ta ná-doun zunuiti zea, è ɠɛ ti ma: Gala zalaɠai ma lɔgi ɠaa: Gala zalaɠai ɠa yɛ zalaɠa ɠulazuʋɛ ma lutui zu, kpidii ɲɛgɛlɛin eyɛsu sobui, zalaɠa ɠulazuʋɛ ma abui ɠa yɛ sosu. 3 Sobui, zalaɠa ɠula nui ɠa ná-seɠei loo ɠɔba, é ʋɛlɛ kpuɠagi lɛ ɓɔɠɔ ma, niiti ti ga gezei. Toɠa zuʋui ɠula, nii abui kulaai gala zalaɠai ɠalazuʋɛ, toɠa sei zalaɠa ɠulazuʋɛ ɠoba. 4 Naa ʋoluma toɠa ná-seɠeiti pu, é taɠiligaa loo, ga é li ga zuʋui ti-ʋuuzuʋɛ ʋoluʋɛ, ada ɲadegai ta zu. 5 Abui ɠa yɛ sosu zalaɠa ɠulazuʋɛ, é mina za ɲɛgɛlɛin. Sobu-o-sobu, zalaɠa ɠula nui ɠa abui lo koʋii ʋa, é gala zalaɠai ɓɛtɛ, é ziilɛi zalaɠaiti ma wulɔi ɠala. 6 Abui ɠa yɛ sosu ɠɔ zalaɠa ɠulazuʋɛ, é mina za. 7 «Vebɛ zalaɠai ma lɔgi ɠaa: Aalɔn ná-doun zunuiti ta kula Ɠɔoɠɔ GALAGI ɠaazu, zalaɠa ɠulazuʋɛ ɠakalaʋɛ. 8 Zalaɠa ɠula nui ɠa zeeɲɛ gila seɠe ani vukɔi zu, nii gulɔi ʋuai ma, é pɛɛ ansansegi kpein ba. Toɠa naa ɠala zalaɠa ɠulazuʋɛ ga ɠizɛsui, makugi nɛai Ɠɔoɠɔ GALAGI ʋɛ. 9 Aalɔn ta ná-doun zunuiti ta vebɛanii mɔtai mi. Ta mi ada ɲadegai ta, GALA daaɠomi seɠe ʋɛlɛi ma ɠoizuʋɛ, kɛlɛ lɛʋɛ mina ɠɛ ba. 10 Nu mina lɛʋɛ ʋu ma, é ʋa mɔ da. Tɔnɔi ɠana gè feai ti ʋɛ nà-vebɛaniiti su, ti ɠalazu abui ɠa. Ani ʋe gola ɲadegai, eɠɛ koto gba zalaɠai ɓaa faazuɓɛtɛ zalaɠai. 11 Zunui kpein ka ta mi, Aalɔn ná-doun zunuiti saama. Tɔgi ɠana wo-mavofodaiti kpein bɛ eyɛsu ɠɔ, é lo vebɛaniiti ba, ti ɠalazu Ɠɔoɠɔ GALAGI ʋɛ. Nu-o-nu a vɔɔɠu ba, naa ɠa ɲade.» 12 Ɠɔoɠɔ GALAGI ɓɔɛni Moize ʋɔ, é ɠɛ ma: 13 «Wɛlɛ vebɛanii ʋa, Aalɔn ta ná-doun zunuiti ta fe Ɠɔoɠɔ GALAGI ʋɛ, foloi ta gulɔ ɲadegai ziɛna la ti ma: kilo saʋagɔ ɓulu vukɔ ʋagɔi zu, gilazuʋɛ sobui, gilazuʋɛ kpɔkɔi, eɠɛ folo-o-folo vebɛ zalaɠai. 14 Ɓulu vukɔi ɠa ɠaayɔ ga gulɔi, é la gee kɔlui maazu. Ɗa geegai ta teʋeleʋeai ɠula ga vebɛ zalaɠai, makugi nɛai Ɠɔoɠɔ GALAGI ʋɛ. 15 Zalaɠa ɠula nui niigi, Aalɔn ná-doun zunuiti saama, gulɔ ɲadegai a ziɛ ma ga é zei potogi zu, naa ɓalaa ɠa vebɛanii naa ɠula. Ɠɔoɠɔ tɔgi ʋe. Toɠa ɠala ɲɛgɛlɛin Ɠɔoɠɔ GALAGI ɠaazu. 16 Zalaɠa ɠula nui ná-vebɛ zalaɠai kpein ka ɠala ɲɛgɛlɛin, tanɔpɛ ge la mia.» 17 Ɠɔoɠɔ GALAGI ɓɔɛni Moize ʋɔ, é ɠɛ ma: 18 «Ɓɔɛ Aalɔn ʋɔ ta ná-doun zunuiti, è ɠɛ ti ma: Koto gba zalaɠai ma lɔgi ʋɛtɛ. Adaʋɛ gala zalaɠai ɠɔdaaleʋezu ná, miná ɠa koto gba zalaɠa zuai ɠɔdaaleʋezu ná, Ɠɔoɠɔ GALAGI ɠaazu. Ani ʋe gola ɲadegai. 19 Zalaɠa ɠula nui é koto gba zalaɠai ɠulazu, naa ɠa mi. Toɠa mi ada ɲadegai ta, GALA daaɠomi seɠe ʋɛlɛi ma ɠoizuʋɛ. 20 Nu-o-nu a vɔɔɠu ma zuai ʋa, naa ɠa ɲade. Ni ma ɲamai a vazana seɠe ma, ʋɛ fazagai ná ma, miná ɠa gba ada ɲadegai ta. 21 Pɔlɔ liɠii a ɠili su, naa ɠa wolo. Ni kɔlu ɓɔi diɠii ɠa a ɠili su, su ɠa ɓale, é gba ziɛi wu. 22 Zunui kpein é ga zalaɠa ɠula nui, naa pɛ ka ta mi. Ani ʋe gola ɲadegai. 23 Kɛlɛ nu la zalaɠa zua nɔpɛ mia, nii ma ɲamai a ʋa GALA daaɠomi seɠe ʋɛlɛi wu, ga koto gba vai ʋa ɠɛ ada ɲadegai. Ma zuai ɠa ɠala.

Leviticus 6 (TOMA)

In Other Versions