Numbers 32 (TOMA)
1 Togani ɓulu golai ɠɛni Luɓɛn mavofodaiti ta Gade mavofodaiti zea. Ti kaani ga Yazɛɛl yooi ta Galaade yooi ta ga ada ʋagɔ toganiiti to fai zu. 2 Ti ʋaani, ti zeeli Moize ma, ta zalaɠa ɠula nui Eleazaal, ta nuɓusɛiti ta-ɠundiɠiiti, ti ɠɛ ti ma: 3 «Taaiti ti ga, Atalɔte, Diɓon, Yazɛɛl, Nimila, Ɠɛsɛɓon, Eleyalé, Seɓame, Neɓo ta Ɓeyon, 4 zooi nii Ɠɔoɠɔ GALAGI feai Izilayɛle nuɓusɛiti bɛ, toɠa ga zooi pagai togani lo fai ma. Tama, toganii wola mɔinʋɛ gi ya gɛi gi ga ɗa-wotiɠɛ nuiti.» 5 Ti ɠɛni ma: «Ni gi zaalai zɔlɔɔgɛ è ɠaazu, yeezei bu, è zooi nii ve gi ya, gɛi gi ga ɗa-wotiɠɛ nuiti. Mina gi ɓudɛ ga Zuludɛn ʋoluʋelei.» 6 Moize bolodama felegɔi niiti gooɠaaʋoteni, é ɠɛ ti ma: «Wa pɔ wo yɛ ʋɛ, wo-ɠɛɛlointi ta ɠɛɛna lia kɔɔmaʋɛ, naa ɠa ɠɛ ɠale? 7 Lee vaa zu wo pɔ Izilayɛle nuiti iɲɔteʋe ti lɛɛ vai zu zooi zu, nii Ɠɔoɠɔ GALAGI feezu ti ya? 8 Zekana kpein nɔ wo-ɠɛɛni ti kɛɛni la, siɛgi zu gè ti leʋeni la, ti zeɠe Kadɛse-Ɓaaleneya, ti li, ti zooi ʋɛtɛ. 9 Ti lɛɛni, ti zeeli Esekɔle nɛmɛi zu, ti ɓegai ma ga zooi ʋɛtɛ, ti Izilayɛle nuiti iɲɔteʋeni ga ti mina li zooi zu, nii Ɠɔoɠɔ GALAGI feezu ti ya. 10 Ɠɔoɠɔ GALAGI yiiɠaawanani naama voloi, é ɠona, é ɠɛ ma: 11 ‹Zunui niiti ti ɠulaai Ezipete yooi ʋa, é zo kona ʋuufelegɔ (20) ma, é lɛ zeemaazu, naati ti la ɠaazulaa zooi ma, nii gè ma ɠona woga ga nà feezu Abalaame ya, ta Izaake, ta Zakɔɓe, mazɔlɔɔ ti la ʋilɛni gòoi ʋolu, ti ʋa ɠolo bɛ̀, 12 é ɠula Kalɛɓe ʋolu, Yefuné ná-doun zunui, nii é ga Kenize nui, ta Nun ná-doun zunui Zozuwe, niiti ti ʋilɛni Ɠɔoɠɔ GALAGI laawooi ʋolu, ti ɠolo bɛ.› 13 «Ɠɔoɠɔ GALAGI yiiɠaawanani Izilayɛle nuiti ma, é ti leʋeteʋe teʋebai zu kona ʋuunaanigɔ (40) laawu, eyɛsu naama yamanii kpein ge zeɠe ná, niiti ti Ɠɔoɠɔ GALAGI wanama vai ɠɛɛni. 14 Wɛlɛ, wa ɠa wo wo-ɠɛɛni tosuʋɛ zeɠea, eɠɛʋelei wo la ga kotoba nuiti ti zɔlɔɔgai, wo Ɠɔoɠɔ GALAGI ná-ziiɠaawanai ɠaalɛɛzu ba Izilayɛle laalɔɠɔma. 15 Mazɔlɔɔ ni wo la ɠɛ kɛɛni, wo ʋa ɠolo tɔun bɛ, toɠa Izilayɛle yɛ nɔ teʋebai zu, wa ɠɛ ga zaɓui wo niima nuɓusɛi kpein undaaʋili.» 16 Ti Moize wooɠaaʋoteni, ti ɠɛ ma: «Ɓa-o, gá sasaiti nɔ losu ʋɛ, gá-logani ɓulugiti faa zu, gi taaiti to gá-ʋɛlɛyeɠeiti bɛ. 17 Gɔun gi letegi, gá ɓɔɠɔ maaɠili ga kɔɔɠɔ zɔɔlaiti gaazuvilɛi zu, gi lo Izilayɛle nuiti untuɠɔ, eyɛsu gi lɔ ga tiye naama adaʋɛ, ʋɛ ná veai ti ya. Gá-ʋɛlɛyeɠeiti gila nɔ ɠa ta ɠɛ yɛsu taaiti su, siɠigiti ti ti ma, nii a kɛ ti maalɔɔɠu zooi zu nuɓusɛiti ba. 18 Gi la ɠalega ma gá-ʋɛlɛiti bu, eyɛsu Izilayɛle nuiti gilagilagiti ti tɔnɔ ma yooiti sɔlɔɔ. 19 Kɛlɛ gi la mɔ zou zɔlɔɔga Zuludɛn ʋoluʋelei, anɛɛ ná maaɠooza ʋa, tɔɔzei gi gɔnɔ ma yooi zɔlɔɔga Zuludɛn ɠakamaʋɛ folo ɠulazu ʋelei.» 20 Moize ɠɛni ti ma: «Ni wa minazeɠe gooi naa laazeelina, ni wa ɓɔɠɔ maaɠilina ga wo kɔɔi ɠɔ Ɠɔoɠɔ GALAGI ɠaazu, 21 ni wa-ɠɔɔɠɔ nuiti kpein ta ɓɔɠɔ maaɠili, ti Zuludɛn ɓudɛ, Ɠɔoɠɔ GALAGI ɠaazu, eyɛsu é sili nuiti kpein kpɛ ɠaazu, 22 ni wa ɠale ma, siɛgi zu nɔ zooi maaɠolozu la Ɠɔoɠɔ GALAGI ɠaazu, faa la mɔ ɠɛa wo ʋa, wa vie naazu Ɠɔoɠɔ GALAGI ɠaazu, ta Izilayɛle letegi. Naazu, niima ada yɔɠɔzuʋɛ ɠa ɠɛ ga wɔnɔ Ɠɔoɠɔ GALAGI ɠaazu. 23 Kɛlɛ ni wo la ɠɛ kɛɛni ɠana, wo koto ɠɛa Ɠɔoɠɔ GALAGI laalɔɠɔma. À suɠwɛɛ ga wa-ɠotoi ɠa wo ɠɔɠɔzumɛɛn! 24 À taaiti to wa-ʋɛlɛyeɠeiti bɛ, wo sasaiti to wa-logani ɓulugiti bɛ. Nii é ɠulaa wo-la, wo bo, à ziɛ ga naa.» 25 Gade mavofodaiti ta Luɓɛn mavofodaiti ti ɠɛni Moize ma: «Ɗa-wotiɠɛ nuiti gá kɛ, eɠɛʋelei màliɠii devei wogai la. 26 Gi-lointi, gi-anzaiti, gá-loganiiti, ta gá-logani ɓulugiti ta yɛ Galaade taaiti su. 27 Gɛi gi ga ɗa-wotiɠɛ zunuiti, gi pɛ gi maaɠiliai ga kɔɔɠɔ zɔɔlaiti, gá Zuludɛn ɓudɛ, gi kɔɔi ɠɔ Ɠɔoɠɔ GALAGI ɠaazu, eɠɛʋelei màliɠii bosu da.» 28 Moize devei veeni ta-vaa zu zalaɠa ɠula nui Eleazaal ya, ta Nun ná-doun zunui Zozuwe ya, é ʋɛɛ Izilayɛle wolodama ʋɛlɛyeɠe ɠundiɠiiti ba. 29 É ɠɛni ti ma: «Ni wa Gade mavofodaiti ta Luɓɛn mavofodaiti, wa Zuludɛn maazuɓudɛna ʋɔɔma, ti maaɠiliai ga kɔɔɠɔ zɔɔlaiti, ti kɔɔi ɠɔ Ɠɔoɠɔ GALAGI ɠaazu, eyɛsu zooi maaɠolo wo ʋɛ, wa Galaade yooi ve ti ya ga tɔnɔ. 30 Kɛlɛ ni ti la Zuludɛn ɓudɛni, ti ɠɛʋele ɓɛtɛai ʋa ɠɛ de, ga wo kɔɔi ɠɔ ʋɔɔma, ta zei wo zaama Kanaan yooi zu.» 31 Gade mavofodaiti ta Luɓɛn mavofodaiti ti gooɠaaʋoteni, ti ɠɛ ma: «Gá naa ɠɛ, nii Ɠɔoɠɔ GALAGI bogai gi ma, gɛi gi ga ɗa-wotiɠɛ nuiti. 32 Gá ɓudɛ, gi maaɠiliai ga kɔɔɠɔ zɔɔlaiti, Ɠɔoɠɔ GALAGI ɠaazu, Kanaan yooi zu, kɛlɛ gá gɔnɔi ma yooi zɔlɔɔ Zuludɛn ɠakala ʋelei.» 33 Amool nuiti ta-masagi Siɠon, ta Ɓasan nuiti ta-masagi Wɔge, Moize naati ta-masadai ta ta-yooiti feeni Gade mavofodaiti zea, ta Luɓɛn mavofodaiti, é ʋɛɛ Manasé ná-bolodai ɠilazuʋɛ ʋa, nii é ga Zozɛfe ná-doun zunui, é ʋɛɛ ta-laaiti ba, ta ma yooiti ti ɠɛni ti ʋa. 34 Taai niiti Gade mavofodaiti ti ti loni, ti ɠɛni ga: Diɓon, Atalɔte, Alowɛɛl, 35 Atalɔte-Sofan, Yazɛɛl, Yogeɓeɠa, 36 Ɓɛte-Nimala, ta Ɓɛte-Ɠalan, taaiti siɠigi ti ma. Ti sasaiti toni togani ɓulugiti faa zu. 37 Taai niiti Luɓɛn mavofodaiti ti ti loni, ti ɠɛni ga: Ɠɛsɛɓon, Eleyalé, ta Kiliyatayime, 38 Neɓo, ta Ɓaale-Meyon, naati ti-laaseigi valiboni, ta Siɓima. Ti daaseigiti pɛɛni taaiti ba, niiti ti ti loni. 39 Makiil mavofodaiti, nii é ga Manasé ná-doun zunui, naati ti liini Galaade laalɔɠɔma, ti vɔni ma, ti zobo sɔlɔɔ Amool nuiti ma, ti ɠɛni zeini ná, ti ti zeɠe. 40 Moize Galaade yooi veeni ti ya, ti zeini ná. 41 Yayiil é ga Manasé ná-dounloin ta, naa wuzeɠeni, é li, é ɓalaɠaiti so, é ti-laasei pɛɛni ga Yayiil ná-taaiti. 42 Nɔɓa laalɛɛni Kenate wu, é so, ta taaiti ti ɠilini ba, é tɔ ɓɔɠɔi daaseigi ʋɛɛ ti ʋa.