Proverbs 25 (TOMA)

1 Wɛlɛ Salomɔn ná-tɛnɛ faalaalii tanigaani ba mɔnɔ, niiti Zuda masagi Ezekiase ná-nuiti ti ti ɠaalɛɛni ba. 2 Ada GALA dɛbizu tɔɔzei dɔɔɠuzu vaiti ba, é ti ɠɛɛzu,ada masagiti dɛbizu siɛgi zu ti ta-wotiiti kulazu la kɛlɛma. 3 Ade la kwɛɛ, geei wuzeɠeʋɛ é ɠwɛ mini, ɓaa mini ɠa zooi ɓomaʋɛ ɠwɛgai ná.Ade la zooga, de ʋa masagiti ta-ɠisiɛiti kwɛɛ ɓalaa. 4 Ni nu a wali ɠaei ma nɔɠɔiti kulana ba,ɠain bo nui ɠa kpɛtɛ ga aniɲaka. 5 Ni nu a faa ɲɔu ɠɛ nuiti kpɛɛna masagi maaɠoolii zu,toɠa ná-zobogi wɔɔlɔ, a ɠɛna telebodai ɠɛa. 6 Mina ɓɔɠɔ wɔɔlɔ masagi ɠaazu,mina zei nu wolaiti seizuʋɛ. 7 Mazɔlɔɔ fizɔgɛ ti ɠɛ ma: «Ʋa è zei unfema zeizuʋɛ,»ti ʋa li è unfesu nu wolaiti gaazu. 8 Nii ɗa ka, naa mina ɠɛ ga zaɓu, è ʋa suvilɛ ga nu loliga tukpɔɠaaleʋezu.Ni nui naa ɓɔɛ ʋelei a è unfena, leeni ɠa ɗa kɛ? 9 Ni kpɔɛ a ɠɛna wo yɔɠɔzu wa è-zeiɲɔɠɔi, a gaaɠula ba wa tɔ,kɛlɛ mina taɠili ná-dɔɔɠuzu vaa ɠula kɛlɛzu. 10 Tɔɔzei a mɛnina, toɠa è ʋoomu,è-lɔɠɔi ɠa ɠoloɠolo eyɛsu ɠɔ. 11 Kpɔɛi maaɓɛtɛai ga pagɔ, naa wola ʋagɛ,eɠɛ zanu sɔɔlai, maaɠiliai ga wali ɠaei. 12 Zɔi é woilosu ɠima nui ná-tɛnɛ gooi ma ga pagɔ,toɠa bɛ ga zanu balaɠaegi ɠɛʋele, ta zanu kitei ma ɠɔbu anigi. 13 Molo leʋe voloi ma liegi zu, ziɛ lɛi ɠa ɗa ɠɛ ga nu yiilɛi ganii.Zekana, gooɠɛɠila keelai a zeɠena ná-siɛi ma, toɠa ɗa maliɠii yiilɛi. 14 Nui é wasosu ga faanɛɛ ɠɛɛ vai, tama é la kɛɛzu,kulaʋɛ ga tonai, nii é maaluai, kɛlɛ é la ʋaazu. 15 Maaɓɔungi ɠa nu a ɗa vɔni da kundiɠii ma,woo nɛɛnɛgi ɓalaa ɠa ɗa nu ɠaei wolo. 16 Ɗa kɔin gulɔi ɠaana, kɔmɔ nɔ ga è-ma liegɔi,mazɔlɔɔ ni ɗa gola ɠɔmɔna, ɗa unpili da. 17 Mina ɗa ga laali è-zeiɲɔɠɔi ma valafala, ni naa laade,toɠa ɓɔlɔ ga ɗa-vai, è wɔinzeɠe ma. 18 Nui a zɛɛ zeele wooi wona, seiɲɔɠɔi laalɔɠɔma,gaawanaʋɛ gulu ɓakɔ wolai ná-doɠai ʋa, ta boɠa zɔkpɔi, ta mɛɛn ɠaazoɓagi. 19 È ɠito yaava nui ʋa, kidaaʋili foloi,kɛɛʋɛ eɠɛ ɗa ɠɛ daami wosu ga è-ɲiigai, é ɲiikpisu, ɓaa è zizi è-ɠɔɠɔi ma, é ɓalizu. 20 È guyei loo nui ʋɛ, nii ziizoolɛzu,kɛɛʋɛ eɠɛ ɗa ɠɛ ná-seɠei ɠulazu kɔba kɔɔlɛ voloi, ɓaa è ziɛ ɓodai ʋu sɛɠɛ ɠaei ma. 21 Ni pului ɠa è zili nui ma, daamianigi ve zea, é mi,ni kpɔɔle wɔin ɠa ma, ziɛi ve zea, é ɓɔɔle. 22 Mazɔlɔɔ abulekaiti kana è puuzu unmaʋɛ,Ɠɔoɠɔ GALAGI ɠa è ɠɔnɔ fe. 23 Lɛkpɛmaʋɛ nu ɠɔʋɛzu ʋele viilɛi ɠa ɗa ʋa ga tonai,kpɔɛzuɠula mɔinmɔingi ɠa ɗa ʋa ga zɔiti ta-yiiɠaawanai. 24 Fizɔgɛ nu zei fiilɛ zosuʋɛ sokogi zu pɛlɛ ɠɔmaʋɛ,wo ʋa li ɓɔsu zeizu ma, wa kpɔɛleʋe anzanui. 25 Keela woo ʋagɔi é ʋaazu, é zeɠe ɠoozama,naa ɠɛɛʋɛ eɠɛ ziɛ lɛi, nii ɗa fe nui ya, kpɔɔle wɔin ma gola. 26 Telebo nui é ɓɔɠɔ yɛsu ná, faa ɲɔu ɠɛ nui ɠaazumaayiki ma,naa ɠɛɛʋɛ eɠɛ ziɛungi kpɔlɔai, ɓaa zeiɗɛ goi kɔzɔai. 27 É la ʋani ga nu kɔin gulɔi ɠɔmɔ ga gola,ɓaa è ʋa lɛbiyai ɠaiziɛ ɓɔɠɔ ʋɛ ga gola. 28 Taa wolai maaɠɔkɔ zobo ge la ná,zekana zunui la, nii é la zooga vɔnisu ná-ziiɠaawanai ma.

Proverbs 25 (TOMA)

In Other Versions