Proverbs 26 (TOMA)

1 Lɛbiyai wola la zolooni ɠimalala nui ma,eɠɛʋelei kɔɔlɛ vukɔi, naa la zolooni da foɠoi ma, ta tonai nii é ʋaazu molo leʋe ziɛgi zu. 2 Foovooi nii un ge la ba, é la faa ʋaa,kɛɛʋɛ eɠɛ soologi é ɠoʋesu, ɓaa sɛʋɛzɛʋɛgoi é ɠoʋesu, ti la zeizu. 3 Kpakɔi ɓɛtɛʋɛ sooi laalɔɠɔma, kalafei ɠɛ ga soovalegi nɔnɔ,kpakɔi ɠɛ ga ɠimalala nui zaamaʋɛ nɔnɔ. 4 Mina ɠimalala nui wooɠaaʋote ga ná-ɠimalalai ɠɛʋele,è ʋa ɠɛ ga tɔun kɛʋele ɗa ɓɔɠɔi. 5 Ɠimalala nui wooɠaaʋote, é zoloo ná-ɠimalalai ma,a ʋa ɠisiɛ ga toɠa ga ɠima nu. 6 Zɔi é keela woo ɠalivaazu ɠimalala nui ma,naa ɠa ɠɔɠɔiti teʋezu ga, ta toɠa gaazuvilɛ vaa mɔinmɔin sei luɠɔ. 7 Ʋelei mɛɠɛlɛ nui ɠɔɠɔiti ti zu la yɔɔɠɛ,ʋele ɠana zɛbɛ la la faalaalii ya, nii ɠimalala nui bosu. 8 Ɠimalala nui maamusɛ vai ɠɛɛʋɛ eɠɛnu a ʋa li kɔtui ɠilizu fɛlɛvɛlɛgi ʋa. 9 Ɠaingi é zoni dɔɔzo nui ya,ʋele ɠana faalaalii la ɠimalala nui laaʋɛ. 10 Ʋelei kpɛɛin ʋili nui la, é nuɓusɛi kpein maawanazu,pele ɠana naama nui la, nii é ɠimalala nui zeɠezu botiɠɛ vai ma, ɓaa teʋeteʋe nuiti. 11 Eɠɛʋelei gilɛi a ɗa ɠale da ma, ná-unpiligi ma,zekana é la ga ɠimalala nui, é ɠalesu ma ná-ɠimalalai ma. 12 Ɗa nu ɠaana daai da ga gola ɠeleɠelegɛ,ɠimalala nui ná-fai ɠa vizɔ ná-fai ʋa. 13 Ɲaka nui ɠa ɗa ɠɛ ma: «Zalai ɠa pelei zu,sua ɲɔi ɠa ziɛzu taazuʋɛ pelei zu!» 14 Eɠɛʋelei kpogi a ɗa lati da ná-saniɛlɛiti ga,zekana ɲaka nui a ɗa lati da ná-betei zu. 15 Ɲaka nui ɠa ɗa yeelɔ daami aniɲakai zu,kɛlɛ toɠa ɗa ka ga kpɔlɔ vaa wola ʋɛ, é ʋa dɔ laaʋɛ. 16 Ɲaka nui laaʋɛ ɓɔɠɔ la ga ɠigi ɠa ma,é leʋe zunu lɔfela ʋa, niiti ta zoo ti gooɠaaʋote fe ga keleɠelegi. 17 È ɓɔɠɔ ʋili kpɔɛi ɠa, nii é la loni è ʋa,kɛɛʋɛ eɠɛ gilɛi a yɛ leʋesu, è so goii ʋa. 18 Eɠɛ titi nui é abuleʋegiti pilisu,ta mɛɛinti é ɗa nuiti paa ɓɔɠɔ maaɠoolii zu, 19 pele ɠana zunui naa la, nii é seiɲɔɠɔi yaavazu,naa ʋoluma, é ɠɛ ma: «Soleya vaa nɔ ʋe.» 20 Koʋi ʋalagi ɠa ɗa abui za,siɛgi zu nɛ fele ge la ná la, kpɔɛi ɠaa ɠa ɗa yei. 21 Tiɠii ɠa ɗa abulekai ve, koʋii abui ɠaazo,kpɔɛleʋe zunui ɠa ɗa kpɔɛi ɠaazulɛ. 22 Zɔɠɔzuziɛ nui ná-kpɔɛiti kɛɛʋɛ eɠɛ ani ɲɛmigiti,ta ɗa yei ti zeeli nu ɠoozuʋɛ. 23 Wali ɠaei pɛai penɛi maazu,ʋele ɠana kpɔɛ nɛɛnɛgiti ti la, ti nui yiimaʋɛ ma vaa ɲɔiti maalɔɔɠuzu. 24 Nui wɔinzeɠemai daavegai, toɠa ɗa maalɔɔɠu ga laawooiti,é ɗa yaavaiti kpɛtɛ ɠoozu. 25 Ni a ɠɛna kpɔɛ ʋagɔiti boga, mina la da,mazɔlɔɔ ná-kisiɛiti sulaavegɛ ga faa ɲɔi. 26 Keleɠelegɛ gola ná-wɔinzeɠemai lɔɔɠu vai zu,kɛlɛ nuɓusɛi pɛ ge ɓega ga ná-suɲɔi ɠwɛɛ. 27 Zɔi a zeɠei wɔ, tɔ ɓɔɠɔ ɠa loo su,zɔi a kɔtui ɠilikilina, toɠa loo tɔ ɓɔɠɔi nɔ ma ʋolu. 28 È nui ta maawana ga zɛɛʋɛɛmai, naa ɠa ga è zili la.Wooveledai ma ɓɔɛi wo fai ɠa ɗa ʋa ga faa zuɠoloɠologi.

Proverbs 26 (TOMA)

In Other Versions