Psalms 35 (TOMA)

1 Davide ná-guyei. Ɠɔoɠɔ GALAGI, naati sakpe, niiti ti sàkpesu,kɔɔi laalɛ naati bu, niiti ti kɔɔi laalɛɛzu bù! 2 Kɔɔɠɔ zɛpɛ koi ta ma wolaiti seɠe,è wuzeɠe, è ɓɔ bà! 3 Kpɛɛn goiti ta kɔɔɠɔ yoovɛiti seɠe,è tɛ ga naati daalɔɠɔma niiti ti wɔ̀inzeɠezu!È ɠɛ zɛ̀nvui ma:«Nà ɠa gè ga è ɠizo nui!» 4 Naati ti unfe, ɓaaɠula ti ma,niiti ti wɔinɗai ga ti zɛ̀nvui ɠula zèa!Ti ɠula ʋolu, ti unfe,tɛiti ti ɠisiɛzu nà-maanɔɠɔ vai zu! 5 Ti ɠɛ ga daazaɠagi ɠɛʋele, nii fiilɛi liizu la,Ɠɔoɠɔ GALAGI ná-geezuɠeelai ti ɓɛ! 6 Ta-ʋelei ti ziɛzu la suɓidi, suɲa,Ɠɔoɠɔ GALAGI ná-geezuɠeelai ʋilɛ ti ʋolu ga ti ɓɛa! 7 Mazɔlɔɔ ti zeɠei wɔɔʋɛ, ti tumɔi zei su,ma un ge la ba, ti naa wɔɔʋɛ nɔ̀un bɛ. 8 Ziizoolɛi zeeli ti ma, ti yeemazu,ta-lumɔi ti dɔɔɠuai tùɠɔ, naa ti zo,ti loo naama undaaʋiligi zu! 9 Koozunɛɛi ɠa ɠɛ zìimaʋɛ Ɠɔoɠɔ GALAGI ʋɔ,toɠa ɠoozunɛ ná-kizo fai zu. 10 Mà ɠaeiti kpein ta ɠɛ ma:«Ee, Ɠɔoɠɔ GALAGI, ɓɛ ɠa é ga è ɠɛʋele?Ɗa maanɔɠɔ nui unmɔɔsu, è kula naa yeezu, nii sɛbɛi wɔɔlɔai tɔun nɔnɔi ʋa.Maanɔɠɔ nui ta bala nui ɓalaa, ɗa ti ɠulazu tooma nui ya.» 11 Zɛɛ zeeleiti ta wuzeɠezu,ti ʋa, ti ɗa gàazaɠa faiti ma, niiti gè la ti zuɠwɛɛ. 12 Nà-faa ʋagɔi gè kɛɛni,ti ɗa naa zala mà ga faa ɲɔi.Ti zɛ̀ gilɛlai zu. 13 Nɔ̀un nà, siɛgi zu ti ɠɛni zeeɓɛzu la,gè ɓena saa wɔlɔ wo seɠei loo ɠɔba,gè ɠaalɛi, gè ɓɔɠɔmaayei, gè zugi zo.Gè la ɠɛni ɓeni GALA falii ʋa ti ʋɛ ɠɔ, 14 eɠɛ nà ɠɛ kɛɛzu bɔɔla ʋɛ, ɓaa kɛ̀ɛloun.Gè maaʋɛ, gè ɗa ziɛ gaazuɠiliai,gàalɛi, eɠɛ nu dee a za. 15 Naa ʋolu, siɛgi zu gè ɲiikpisu da,ta ɠaalɛɛzu ba, ti ɗa ɲɛɛɠula sù,gè la dòɠa nuiti kwɛɛ, ti ɠaalɛɛzu ba dàalɔɠɔma,ti ɗa dàazuɠɔli, ti la looɠosu. 16 Eɠɛ nuiti ti ɲɛɛɠulazu nɛɛʋuzu ba nuiti su,ta ɲiigai ziɛzu ga dàalɔɠɔma. 17 Màliɠii, ɗa yɛsu niima vaiti pɛtɛsu nɔ ɓaa?Zɛ̀nvui ɠula ta-wɔinzeɠemai laawu,zɛ̀nvui wola vizɔgɛ, é mina yɛ zalaiti zea. 18 Nà è maamusɛ maaɓɔ golai zu,nà è mama nuɓusɛ mɔinmɔingiti saama. 19 Niiti ti ga sìli nuiti, ti ɓaaɠosu mà, naati ti mina ɲɛɛɠula sù.Niiti ti wɔ̀inzeɠezu un ge la ba, naati ti mina pòomu ga ɠaazuɠɛzɛi. 20 Mazɔlɔɔ ti la ziilɛi kpɔɛ wosu,yaavai ɠa ti kpɛtɛzu nu ʋagɔiti daalɔɠɔma,ti zeini zooi zu. 21 Ta laalaosu dàalɔɠɔma,ti ɗa ɠɛ ma: «Ee, gi-ɠaazuɠɛzɛi ɠa wozaɠaazu!» 22 Ɠɔoɠɔ GALAGI, ɗa wozaɠaazu, mina maaɠɛ kpɔ!Màliɠii, mina maaɠooza bà! 23 Wuzeɠe, ɠaazuzeɠe ma, è màalobo!Nà-GALAGI, Màliɠii, lo bɛ̀! 24 Tukpɔi lo bɛ̀, eɠɛʋelei ɗa-zɔledai la, Ɠɔoɠɔ GALAGI, nà-GALAGI!Ti mina ɠoozunɛ, ti ʋa ɲɛɛɠula sù! 25 Ti mina ɠɛ ma ti-yiimaʋɛ:«Ee, nii ɠa ade ɠɛa pɔ!»Ti mina ɠɛ ma: «Ade kpɔlea!» 26 Ti pɛ ti unfe ʋɔɔma, ti ʋɛlɛʋɛlɛ ɓɔɠɔ ma,tɛiti ti ɠoozunɛɛzu nà-maanɔɠɔ vai zu!Unfegi loo ti ɠɔba ta faazupui,niiti dɔin ti ɓɔɠɔ wɔɔlɔzu dàalɔɠɔma! 27 Naati ti maamusɛi wo, ti ɠoozunɛ,niiti ti yiilɛiɗai nà-telebo fai zu,ti ɗa ɠɛ ma yeenɔpɛ: «Lɛbiyai ɠa Ɠɔoɠɔ GALAGI ʋɛ,nii é ná-botiɠɛ nui ná-ziilɛigi ʋɔ!» 28 Nɛ̀gi ɠa ɗa-lelebo fai wo,ta ɗa-maamusɛi, folo-o-folo.

Psalms 35 (TOMA)

In Other Versions