1 Kings 17 (YAPE)

1 Elijah ni fare profet ni be’ u Tishbe u lan yu Gilead e ga’ar ngak Ahab ni Pilung nu Israel, “U fithingan SOMOL ni fare Got nu Israel ni be par nib fos, ni gag e tapigpig rok, e nggog ngom ni bayi par ndakuriy e wa’angachal nge n’uw u lan l’agruw fa dalip e duw, nge mada’ ko ngiyal’ ni bay fin gog.” 2 Me ga’ar SOMOL ngak Elijah, 3 “Mu chuw u roy ngam man ko ngek ngam mith nga to’oben fare lul’ ni Kerith fithingan u ba’ ni ngek e lul’ ni Jordan. 4 Ran ni ngam unum e bay um fek ko re lul’ nem, ma kugog ngak e arche’ ni gapl’uw ni ngu’ur feked e ggan i yib ngom.” 5 Me fol Elijah ko tin keyog SOMOL ngak ni nge rin’, me milekag nge yan i par nga to’oben fare lul’ ni Kerith fithingan. 6 Mi i unum e ran ko re lul’ nem, mi i fek e arche’ ni gapl’uw e flowa nge ufin i yib ngak ni gubin e kadbul nge blayal’. 7 Me munmun me m’ay e ran ko fare lul’ ni bochan e dakir aw e n’uw. 8 Me ga’ar SOMOL ngak Elijah, 9 “Mman ko binaw nu Zarefath nib chugur nga Sidon ngam par u rom. Kugog ngak be’ ni bpin u rom nike yim’ figirngin ni ngi i pi’ ganam.” 10 Me yan Elijah nga Zarefath, ma fa’ani yib ko garog ko binaw me guy be’ ni bpin nike yim’ e pumo’on rok ni be mogow l’ud. Me ga’ar Elijah ngak, “Wenig ngom, mfek e ran i yib nggu unum.” 11 Ma nap’an ni yan ni nge fek me ga’ar ngak, “Wenig ngom, ku mfek e flowa nggu way.” 12 Me fulweg ni ga’ar, “U fithingan SOMOL ni be par nib fos ni ir e Got rom e nggu micheg ngay ndariy e flowa rog. Kemus ni ta’ab gogow e flowa ni bay u lan baraba’ i ban’en nge buchu’uw i gapgep ko olive ni bay u lan ba rume’. Kugub ngaray ni gu be mogow l’ud ni nggu fek nga tabinaw rog ni nggu lith e chu’uw i flowa nem nggu wew ba pagel ni fakag. Kemus e chu’uw i ggan ni nggu wew, nge mu’ ma aram e nggu m’ow.” 13 Me ga’ar Elijah ngak, “Dab mu rus, mman ngam ngongliy e ggan romew, machane som’on e ngam fek e chu’uw i flowa ni bay rom ngam ngongliy ba flowa riy nib achig ma ga fek i yib ngog, ma tin ke magey riy e ngam ngongliy rogon ngam kew fakam. 14 Ya SOMOL ni Got rok piyu Israel e ke ga’ar, ‘Re raba’ i n’em e dabi m’ay e flowa riy, ma re rume’ nem e dabi m’ay e gapgep riy u m’on ko rofen ni gag SOMOL e bay gu pi’ e n’uw nge yib’.” 15 Me yan fare pin nge rin’ ni bod nike yog Elijah ngak, miyad par ni gubin e rran ni ba gaman garad. 16 De m’ay e flowa u lan fare raba’ i n’em, ma de m’ay e gapgep u lan fare rume’, ni bod ni micheg SOMOL ngak fare pin u l’ugun Elijah. 17 Me munmun me yib e m’ar ngak fare pagel ni fak fare pin; mi i ubchiya’ i yan, me munmun ma daki pogofan. 18 Me ga’ar ngak Elijah, “Gur e girdi’ rok Got, mang ni kam rin’ e biney e pa’ ngog? Mog, mub ngaray ni ngam puguran e denen rog ngak Got ya nge yim’ fakag?” 19 Me ga’ar Elijah, “Mpi’ fakam ngog.” Me fek fare pagel u pa’ fare pin me fek i yan ko thal ni lang e naun ko re senggil ni be par riy, me yan i tay nga daken e chob. 20 Me meybil ni ba ga’ laman ni ga’ar, “SOMOL ni Got rog, mangfan ni kam pi’ e biney e gafgow ni ba ga’ ngak e re pin ney nike yim’ e pumo’on rok? Ya rib gol nga rogon ni be ayuwegneg, ma kam thang e pogofan rok fak!” 21 Me yan Elijah i palpal nga daken fachi pagel ni dalip yay nge meybil ni ga’ar, “SOMOL ni Got rog, mfulweg e pogofan rok e re tir ney!” 22 Me fulweg SOMOL taban e meybil rok Elijah; me pogofan fare tir bayay nike fos. 23 Me fek Elijah fare tir ko thal ni but’ nge pi’ ngak e chitiningin, me ga’ar ngak, “Mu sap, ke fos fakam!” 24 Me fulweg fare pin ni ga’ar, “Chiney e kug nang ni gur be’ ni girdi’ rok Got, ma riyul’ nma non SOMOL u l’ugunam!”

1 Kings 17 (YAPE)

In Other Versions