2 Corinthians 3 (YAPE)

1 Gimed be finey ma ka gamad be weliy murung’agmad bayay ni gamad e soromad? Gimed be finey ma gamad bod boch e girdi’ ni dabisiy ni ngan pi’ e babyor ngomad nggu pi’ed ngomed ni bay riy ni be yog murung’agmad ni gamad bfel’? Fa reb e ngam pi’ed ngomad? 2 Gimed e kam manged babyor romad ni kan yoloy nga lanin’mad, ni fan e nge nang urngin e girdi’ miyad poy. 3 Rib tamilang ni Kristus e ir e ke yoloy e re babyor ney ke pi’ ngomad ni nggu feked i yan. Gathi ni yoloy ko tinta, machane Kan Nthothup rok Got ni be par nib fos e yoloy, ma da ni yoloy nga daken e malang ni tafel, ya ni yoloy nga laniyan’ e girdi’. 4 Gamad be yog e re bugithin ney ni bochan e ba pagan’mad ngak Got u daken Kristus. 5 Ya dariy rogomad ni nggogned nrayag ni gu ngongliyed e re maruwel ney. Ya gelngimad ni nggu muruwliyed ngay e Got e ke pi’ ngomad: 6 ya ir e ke pi’ gelngimad ni nggu pigpiggad ko fa bin nib be’ech e m’ag, ni gathi ni ngongliy ko motochiyel ni kan yoloy, machane yib rok fare Kan Nthothup. Fare motochiyel ni kan yoloy e ma fek e yam’ i yib, machane fare Kan Nthothup e ma pi’ e yafos. 7 Fare Motochiyel e ni yoloy nni ker nga daken ruw raba’ i malang ni tafel, ma ram’en Got e yib i m’ug ko ngiyal’ nni pi’ e re Motochiyel nem riy. Yugu aram rogon ni ki m’ay nge da ku ni guy, machane ram’en ni gal owchen Moses e rib gel ndakiyag ni nge changar piyu Israel ngak. Fa’anra re Motochiyel nem ni maruwel rok e nge fek e yam’ i yib, e yib nib cheag ram’en Got ngay, 8 me ere ri kab gel feni galgal ram’en e ayuw ni be tay fare Kan Nthothup ngak e girdi’! 9 Fa’anra ba galgal ram’en e ren’em ni ban’en ni leamnag Got ni nge turguy e gechig rok e girdi’, me ere kab gel feni galgal ram’en e ren’en ni leamnag Got ni ir e nge mat’awnag e girdi’ ngak Got! 10 Rayag ni ngdogned ni bin chiney i ram’en Got e ka ba ga’ ram’en ko bin kakrom i ram’en Got ni i gal’, ma aram fan ni kem’ay e bin kakrom. 11 Fa’anra immoy ram’en Got nib cheag ko ren’em ni par nib ngoch nap’an, me ere ri ka ba ga’ ram’en Got ni bay ko bin ni nge par ndariy n’umngin nap’an! 12 Ri darid tamdaggad, ni bochan e ke l’agan’dad ko ren’ey. 13 Gathi gadad bod Moses ni bayi n’en ma nge upunguy bangi mad nga owchen, ni fan e nge dabi guy piyu Israel ram’en Got ni be gal u owchen ni nge waer ram’en i yan me m’ay. 14 Ma rib man lanin’rad; ke mada’ ko bin daba’ e rran ma kab upong lan owcherad ko gi mad nem ko ngiyal’ ni yad be poy fapi babyor ni babyoren e bin kakrom e m’ag. Re gi mad nem e ra nchuweg u owchen be’ ni kemus ni fa’anra mang fa’anem reb i girdi’en Kristus. 15 Mus ko daba’ ni yad ra be’eg fare Motochiyel rok Moses, ma kabay e gi mad nem nike upunguy lanin’rad. 16 Machane ra nchuweg, ni bod rogon nike yog e babyor nib thothup ni be ga’ar: “Nchuweg e mad u mit Moses ko ngiyal’ ni cheal nge sap ngak Somol.” 17 Re bugithin nem ni “Somol” ko re thaliyol nem e ireram fare Kan Nthothup rok Somol; ma pi’in bay fare Kan Nthothup rok Somol rorad e kar chuwgad u tan e bin kakrom e m’ag. 18 Ma gadad ndawor ni upunguy ban’en nga owchedad e be gal ram’en Somol rodad nike af rok ngodad, ni gadad gubin ma be ga’ ram’en rodad i yan ma gadad be pig i yan nga ya’an e ren’en ni be gal ram’en rodad, ni fare Kan Nthothup rok Somol e be muruwliy e ren’ey.

2 Corinthians 3 (YAPE)

In Other Versions