2 Kings 22 (YAPE)

1 I Josiah e meruk e duw yangren me pilung, me yog e thin u Jerusalem ni guyey e duw. Chitiningin e Jedidah ni fak Adayah nu Bozkath. 2 Josiah e i rin’ e tin nib m’agan’ SOMOL ngay; ya i folwok rok David ni ga’ rok kakrom, ri i par ni be fol ko urngin e motochiyel rok Got. 3 U lan e bin ragag nge meruk e duw ni Pilung Josiah, me l’oeg Josiah Shafan ni tayol rok, nib mo’on ni fak Azaliah nib mo’on ni fak Meshullam, nge yan nga tempel ni ga’ar ngak, 4 “Mman ngak Hilkiah ni prist ni th’abi tolang ma ga fith ngak babyoren e salpiy nike kunuy e prist ni yad ma kunuy e salpiy u pa’ e girdi’ u langan e mab ko Tempel. 5 Ma gog ngak ni nge pi’ e re salpiy nem ngak e pi pumo’on nike milfan ngorad e yungi n’en nike kireb ko Tempel ni ngan fal’eg rogon. Ya ngar pi’ed puluwon 6 e pi’in nma maruwel ko ren, nge pi’in yad ma dimow naun, nge pi’in yad ba salap i gad e malang ko naun, nge puluwon e ren nge malang ni ngan fal’eg rogon e Tempel ngay. 7 Pi’in nike milfan e re maruwel nem ngorad e ri yad ba yul’yul’, ere dariy fan ni ngar ted nga babyor urngin e salpiy ni yad be pi’ nga puluwon e maruwel.” 8 Me yan i yog Shafan ngak Hilkiah e thin nike yog e en ni pilung, me yog Hilkiah ngak nike pir’eg fare Ke Babyor ko Motochiyel u lan e Tempel. Me pi’ Hilkiah fare ke babyor ngak Shafan, me be’eg Shafan. 9 Me sul ko en ni pilung me yog ngak ni ga’ar, “Pi tapigpig rom e kar feked fapi salpiy ni bay u Tempel kar pi’ed ngak e pi pumo’on nike mil fan ngorad e yungi n’en nike kireb ko tempel ni ngan fal’eg rogon.” 10 Ma aram e ga’ar, “Ba’aray ba ke babyor nike pi’ Hilkiah ngog.” Me be’eg nge rung’ag fa en ni pilung. 11 Ma faani rung’ag me guchthuy e mad rok nike rus. 12 Me pi’ e thin ni nge yib Hilkiah, nge Shafan, nge Ahikam nib mo’on ni fak Shafan, nge Achbor nib mo’on ni fak Mikayah, nge Asayah nma ayuweg e en ni pilung, me ga’ar ngorad: 13 “Marod ni gimed owcheg nge owchen yu Judah ni yad gubin ngam fithed SOMOL u murung’agen e motochiyel ni bay ko re ke babyor ney. Ke damumuw SOMOL ngodad, ni bochan e pi ga’ rodad kakrom nda ur folgad ko pin’en ni be yog e re ke babyor ney ni ngan rin’.” 14 Me yan Hilkiah, nge Shafan, nge Ahikam, nge Achbor, nge Asayah ni ngar guyed Huldah, ni be’ ni bpin nib profet nma par ko gin ni ka fin ni uneg ko binaw nu Jerusalem. (Ma pumo’on rok e Shallum, nib mo’on ni fak Tikvah nib mo’on ni fak Harhas, mi Shallum e bmil fan e mad ko tempel ngak.) Miyad weliy fare bugithin ngak Huldah, 15 me yog ngorad ni ngar sulod ngak fa en ni pilung ngar weliyed ngak e thin nike yog SOMOL 16 ni be ga’ar, “Bay gu kirebnag e binaw nu Jerusalem mu gechignag e girdi’ riy, ni bod ni ka ni yoloy ko fare ke babyor nike be’eg e pilung nu Judah. 17 Ya kar pi’ed keru’rad ngog yad be pi’ e maligach ngak yugu boch e got, ere kar k’aringed e damumuw ngog ko urngin e tin yad be rin’ nib kireb. Damumuw nike yib ngog nib togopluw ngak yu Jerusalem e bod ba nifiy ni be daramram nib gel ni dabiyag ni ngan thang. 18 Ba’aray e thin rog i gag SOMOL ni Got nu Israel ngak e en ni pilung nu Judah: Kam motoyil ko thin rog ni ka ni yoloy ko fare ke babyor, 19 ma fa’an mu rung’ag rogon ni kug leamnag ni nggu gechignag yu Jerusalem, ma ga kolngan’um me sobutan’um u p’eowcheg, ma ga guchthuy e mad rom ma ga yor. Bay gu kirebnag yu Jerusalem nge yan i par nra yib e girdi’ miyad da’da’ ngay, me yan i aw nike tabanathin, ni fa’anra nge buchwa’athan be’ minog ni nge buch wa’athan fa’anem ni bod nike buch wa’athan yu Jerusalem. Machane kug rung’ag e meybil rom, 20 ngiyal’ ni ka gab fos e dab gu gechignag yu Jerusalem, ya nga mum’ u fithik’ e gapas.”Me sul fapi pumo’on ngar weliyed e pi thin ney ngak Josiah ni Pilung.

2 Kings 22 (YAPE)

In Other Versions