2 Samuel 7 (YAPE)
1 Re ngiyal’ i n’ey e ke par David ni Pilung ni ir e be gagiyegnag girdi’en e nam rok, me par SOMOL nike yororiy David rok urngin e pi to’ogor rok. 2 Ma aram me ga’ar David ni Pilung ngak Nathan ni profet, “Mu sap! Gu be par ko naun ni ren ni cedar e ni fanay ngay, machane fare Kahol ko M’ag rok Got e bay u lan ba tent!” 3 Me fulweg Nathan ni ga’ar, “Mu rin’ e tin ni ga ba’adag, ya SOMOL e bay rom.” 4 Machane re nep’ i n’em me ga’ar SOMOL ngak Nathan, 5 “Mman ngam weliy ngak e tapigpig rog i David ni be lungug ngak, ‘Gathi gur e ngam toy ba tempel nggu par ngay. 6 Nap’an fa ngiyal’nem ni gu fek e girdi’ nu Israel nga wuru’ yu Egypt nge yib i mada’ ko bin daba’ e rran ma dawor gu par u lan ba tempel; ya ug milekag i yan ni lan ba tent e gu be par riy. 7 N’umngin nap’an ni ug un ngak piyu Israel ngu’ug milekaggad i yan ma dawor gu fith ngak e pi’in ni gag e gu duwgiliyrad ni ngu u rogned e thin rok piyu Israel ko mangfan ndawor rtoyed ba tempel ko ren ni cedar ni fanag.’ 8 “Ere mog ngak e tapigpig rog i David, ni SOMOL ni Gubin ma Rayag Rok e be ga’ar ngak, ‘Ga be gafaliy e saf u daken e yungi ted i yan mu gu fekem nggu tem ni gur e ngu’um gagiyegnag piyu Israel ni girdi’ rog. 9 Gubin yang ni um man riy i yan ma gu bay rom, me gag e kug li’ urngin e pi to’ogor rom u fithik’ e mael. Bay gu gagiyeg nigem ngam gilbugwan ni bod e pi’in yad ma yog e thin ni yad e ba ga’ lungrad u fayleng. 10 10-11 Bay gu duwgiliy bang ni nge par piyu Israel ni girdi’ rog riy, mu gu tayrad ngu’ur pired riy ndakuriy be’ nra pigi cham ngorad. Nap’an nrabad ngalan e re nam ney ma be yib e girdi’ ni kireb i cham ngorad, machane biney e pa’ e bayi tal. Bay gu yororiyem rok urngin e pi to’ogor rom, mug gagiyegnag nge yib e pi’in owchem. 12 Nap’an ni ga ra yim’ mi ni yan ni k’eygem ngak pi chitamam, mu gu turguy reb i owchem nge mang pilung, ma bay gu tay e nam rok nib gel. 13 Bayi toy ba tempel ni fan ngog, ma bay gu gagiyegnag nge par e pi’in ni owchen ngu’ur gagiyeggad ndariy n’umngin nap’an. 14 Bay gu par ni gag e chitamngin, me par ni ir fakag. Ra ngongliy e kireb, mu gu gechignag ni bod ba matam ni gechignag be’ nib mo’on ni fak. 15 Machane gathi bay gu par ndab kug ayuweg ni bod ni gu rin’ ngak Saul, ni gag e gu chuweg ni fan e nge mang gur e mpilung. 16 Gubin ngiyal’ ni bay um par ni be yib e girdi’ ni owchem, ma bay gu tay e gagiyeg rom ngi i par ndariy n’umngin nap’an. Rogom ni gab pilung ni ga be gagiyeg e dabi m’ay.’” 17 Me weliy Nathan ngak David urngin e tin ke dag Got ngak. 18 Me yan David ni Pilung ngalan fare tent u p’eowchen SOMOL, me yan i par nga but’ nge meybil ni be ga’ar, “SOMOL ni Th’abi Tolang, urngin e tin kam rin’ ni fan ngog e dariy rogog nga bang ni ngam rin’ ngog, ara ngam rin’ ngak e tabinaw rog. 19 Machane chiney e ka ba yo’or e tin kam rin’ ni fan ngomad, I gur SOMOL ni Th’abi Tolang; ya kamog ngog e tin ni bay mu rin’ ngak e pi’in owcheg ko tin ni bayib e duw nga m’on. SOMOL ni Th’abi Tolang kam gagiyegnag ba girdi’ ke guy e ran’ey!. 20 Ere mang e kabay ni gu ra yog ngom! Ya gur e ga manangeg ni tapigpig rom. 21 Ya gur e kam leamnag kam turguy ni nge yodorom; gur e kam gagiyegnag ni nggu nang urngin e pin’ey nib sorom riy. 22 SOMOL ni Got, rib sorom! Dariy be’ ni bod gur; dakuriy yugu reb e Got nga bang, ya kemus ni gur, ni bod ni kug rung’aged. 23 Dakuriy reb e nam ngabang u fayleng ni bod e yu Israel, ni gur e mu lufrad ko sib ngam mang nagrad girdi’ rom. Pin’en ni ba sorom riy nge pi ma’ang’ag ni mu rin’ ngorad e wear murung’agem riy u roy u fayleng. I gur e mu tuluf e pi nam nge pi got rorad u nap’an ni be yan e girdi’ rom i yan nga m’on, fapi girdi’ ni gur e mu pithigrad u Egypt ni ngar manged girdi rom. 24 Kam tay yu Israel ni ngar pired ni yad e girdi’ rom ndariy n’umngin nap’an, me gur, SOMOL, e kam mang Got rorad. 25 “SOMOL ni Got, mu tay nga tagil’ ni gubin ngiyal’ e tin kamog ni murung’ageg nge murung’agen e pi’in owcheg, ma ga rin’ e tin ni kamog ni bay mu rin’. 26 Bay um par nib gilbuguwam ndariy n’umngin nap’an, ma girdi’ e bay i lungurad, ‘I SOMOL ni Gubin ma Rayag Rok e ir e Got rok piyu Israel.’ Ma bay um gagiyegnag ngi i par ni pi’in ni owcheg e gubin ngiyal’ ni yad be pilung. 27 SOMOL ni Gubin ma Rayag Rom, ni gur e Got rok piyu Israel! Bochan e kam gagiyegnag kug nang e pin’ey, ni gag e tapigpig rom, ya kam weliy ngog ni bay um gagiyegnag ngi i par e pi’in owcheg ni yad e bay ur pilunggad, ma aram fan nda gur tamdag ni nggu meybil ngom ni aray rogon. 28 “SOMOL nib Th’abi Tolang, ni gur e Got; gubin ngiyal’ ni ga ma tay nga tagil’ e tin ni kamog ni bay mu rin’, me gur e kam weliy e tiney e thin ni bfel’ ni ngam rin’ ngog. 29 Wenig ngom, mu ayuweg e pi’in ni owcheg e chiney ngu’ur pired ni yad bfel’ u wun’um. Gur SOMOL ni Got e kamog ni bay mu rin’ e re bugithin ney, me gur e ngu’um par ni ga be ayuweg e pi’in ni owcheg ndariy n’umngin nap’an.”