Deuteronomy 26 (YAPE)

1 “Gimed ra yan mpired ngalan fare nam ni SOMOL ni Got romed e bayi pi’ ngomed, 2 mra bigimed ma thangri dugnag e tin som’on nike yib u bmit e woldug nge bmit ngam feked i yib ko ta’gin’en tagil’ e liyor. 3 Marod ko re prist ni ir e be maruwel e ngiyal’nem ngam ga’argad ngak, ‘Chiney e nggu pininged e magaer ngak SOMOL ni Got romad ya kug thapgad ngalan fare nam ni micheg ngak pi chitamangimad ni kakrom ni bayi pi’ ngomad.’ 4 “Ma bayi fek fare prist fare dug rom nge tay nga m’on ko altar rok SOMOL ni Got rom. 5 Ma aram e ngamog e pi thin ni ba’aray u p’eowchen SOMOL: ‘Ga’ rog kakrom e be’ u Aramea, ni be’ ndariy tafen me fek chongin e tabnaw rok nga Egypt ni ngar pired u rom. Ranod ngaram ni yad ba lich, machane miyad yo’or ngar pired ni yad ba nam nib ga’ ma ba gel. 6 Piyu Egypt e ba gel e gafgow nra ted ngomad miyad yargel ngomad ni nggu maruwelgad ni sib. 7 Ma gamad wenig ngak SOMOL ni Got rok epi chitamangimad ni kakrom ni nge ayuwegmad. Me rung’ag lammad, me guy e gafgow ni yibe tay ngomad, nge pin’en nib mo’maw’ ni be yib ngomad, nge maruwel nib gel ni yibe pi’ ngomad gamad be gafgow riy. 8 Gelngin nib gel e maruwel ngay nge chuwegmad u pa’ yu Egypt. I ngongliy bogi maang’ang nge bogi n’en ni un ngat ngay me gagiyegnag bogi n’en nge yib nib gel e marus ni un tay riy. 9 Me fekmad i yib ngaray me pi’ e re nam ney ngomad, nib nam ni bfel’ rogon ma ba yong’ol e but’ riy. 10 Ere chiney e kug fek i yib ngak SOMOL e tin som’on e ggan nike yib ko woldug rog ni ir e ke pi’ ngog.’“Ma ga tay fare dug rom nga but’ u p’eowchen SOMOL ma ga paraw nga but’ u p’eowchen ngam pining e magaer ngak. 11 Ma ga felfelan’ ni bochan e pin’en ni bfel’ ni SOMOL ni Got rom e ke pi’ ngom nge girdi’en e tabinaw rom; ma ga pining e pi Levi nge girdi’ u yugu boch e nam ni yad be par u fithik’med ngar uned ngomed ko mur nge felfelan’. 12 “Gubin e yu dadalip e duw ma ga pi’ ragag e pasent ko ggan nike yib ko woldug rom ngak e pi Levi, nge pi milekag, nge pi bitir ni kanim’ rorad, nge ppin nike yim’ figirngirad, ya nge urngin e girdi’ miyad gaman ko ggan. Nap’an ni ga ra mu’ i rin’ e biney, 13 ma nge lungum ngak SOMOL, ‘Dariy reb fa pin’en ni nggu pi’ ngom nike magey u naun rog; ya kug pi’ ngak e pi Levi, nge milekag, nge pi bitir ni kanim’ rorad, nge ppin nike yim’ figirngirad, ni bod ni mog ngog ni nggu rin’. Dawor gu pag ma ku dawor gu pag talin e tin mog ni murung’agen ragag e pasent ko ggan nike yag ko woldug rog. 14 Dawor gu fek boch riy gu way ko ngiyal’ ni gu be yornag be’ nike yim’, dawor gu fek boch riy nga wuru’ e naun rog ko ngiyal’ ni gomanga gub taay; ma dawor gu fek boch riy nggu pi’ ni fan ngak be’ nike yim’. Kug fol rom, i gur Got SOMOL rog; kug rin’ urngin e tin kamog u murung’agen ragag e pasent ko ggan nike yib ko woldug rog. 15 Mu sap nga but’ ko gin ba thothup ni ga be par riy u tharmiy ma ga fal’eg wa’athan piyu Israel, ni girdi’ rom; mu kum fal’eg rogon e re nam ney ni bfel’ rogon ma ba yong’ol e but’ riy ni kam pi’ ngomad, ni bod ni kam micheg ngak pi chitamangimad ni kakrom.’ 16 “I SOMOL ni Got romed e be yog ngomed ni ngu’um folgad u urngin e pi motochiyel rok; ere um folgad riy u fithik’ e yul’yul’ u polo’ i gum’ircha’med nge lanin’med. 17 Daba’ e kam micheged ni SOMOL e ir e Got romed, ma kam micheged ngak ni bay um folgad rok ma gimed be fol u urngin fapi motochiyel rok ma gimed be rin’ urngin e tin keyog ngomed ni ngu’um rin’ed. 18 Daba’ e ke taymed SOMOL ni kam manged girdi’ rok, ni bod nike micheg ngomed; ma be yog ngomed ni ngu’um folgad u urngin fapi motochiyel rok. 19 Bayi gagiyeg nagmed nge gilbuguwmed ngak urngin e pi nam ni ir e sunumiy. Ma bay um pired ni gimed e girdi’ rok nib thothup ni bod ni micheg ngomed, ma bay um pininged e sorok ngak mi gimed be mathangeluwolnag fithingan.”

Deuteronomy 26 (YAPE)

In Other Versions