Ezekiel 10 (YAPE)

1 Gu sap nga ban’en ni bod ya’an e th’ib u daken lolugen fa pin’en nib fos ma puluwon fa pin’em ngalang e ba’ ban’en riy ni tagil’ be’ nib pilung nni ngongliy u mmit i malang ni sapphire. 2 Me ga’ar Got ngak fare pumo’on nike yon’ bmad nib wech, “Mman nga thilin e tayapyap u tanggin fa pin’em nib fos ngam suguy lan pa’am ko koal ni be yik’. Ngam wereg nga daken fare binaw.”Mug yaliy nike yan. 3 Ma fa pin’em nib fos e yad basak’iy ko yimuch ko fare Tempel ma nap’an ni yan nga naun, me suguy bang i manilang lan e yoror. 4 Fare tamilang nib maluplup’ u tagil’ SOMOL e yan ngalang u daken fa pin’en nib fos nge yan ko gin yima yan riy ngalan e Tempel. Ma fare gi manileng e sugnag lan fare Tempel, ma lan e yoror ko fare Tempel e ke gal ra’en. 5 Lingan pon fa pin’em nib fos e mus nga wuru’ e yoror min rung’ag lingan ngay. Ni lingan e bod lungun Got ni Gubin ma Rayag Rok. 6 Nap’an ni yog SOMOL ko fare mo’on nike yon’ e mad nib wechwech ni nge fek boch e nifiy u thilin e tayapyap u tan fa pin’em nib fos, ma aram me yan fare mo’on i sak’iy nga charen reb fapi tayapyap. 7 Reb fa pin’em nib fos e chultheg pa’ nga fithik’ fare nifiy ni bay u rom u fithik’rad, nge fek boch e achaffin, nge tay ngalan pa’ fare mo’on nike yon’ e mad nib wech. Ma aram me fek fapi achaffin me yan. 8 Gguy nra reb fa pin’em nib fos ma bay pa’ ni bod pa’ e girdi’ u tan reb fapi pon. 9 9-10 Mu kug guy ni aningeg e tayapyap riy e go’ ta’ab rogon, ra reb fa pin’en nib fos ma bay reb e tayapyap riy. Fapi tayapyap e be gal ra’en ni bod e malang nib totolang puluwon, ra reb fapi tayapyap ma keb reb e tayapyap i th’ab lukngun. 11 Nap’an nra bitbit fa pin’en nib fos ni nge yan, ma demturug e gin yad ra sor ngay ma dab ra chealgad u but’. Yad ma yan ko gin yad be finey, ni dab ra chealgad. 12 Ma downginrad ni keru’rad, pa’rad, porad, nge fapi tayapyap e go’ ba tafach e lanmit riy. 13 Mug rung’ag ba lam ni be ga’ar, “Pi tayapyap nma chealcheal.” 14 Ra reb e pin’em nib fos ma aningeg owchen. Bin m’on e owchen e garbaw, ma bin nib migid e owchen e girdi’, ma bin ni dalip e owchen e layon, ma bin ni anngeg ngay e owchen e eagle. 15 (Ireram fa pin’en nib fos nug guy u charen e lul’ ni Kebar.) Nap’an nra yan fa pin’en nib fos ngalang u fithik’ e nifeng 16 ni yad ra mithmith, ma fapi tayapyap e be un ngorad. Ngiyal ni yad ra pithig porad ni ngar changag gad, ma fapi tayapyap e ka be un ngorad. 17 Na’pan nra tal fa pin’em nib fos, me tal fapi tayapyap; ma nap’an nra changeg fa pin’en nib fos, me un fapi tayapyap ngorad, ni bochan e fa pin’em nib fos e be gagiyegnag fapi tayapyap. 18 Ma aram e fare tamilang nib malup’lup’ nib ing SOMOL e chuw ko gin yima yan riy ngalan e Tempel nge yan i tal u puluwon fa pin’en nib fos ngalang. 19 Miyad pithig porad ngar changaggad ngalang ko fayleng ni kug be yaliyrad, ma fapi tayapyap e be un ngorad. Marbad ra gifgad ko bin ngek e garog ko fare Tempel, ma fare tamilang nib maluplup’ e bay nga dakenrad. 20 Mug poy ni yad fa pin’en nib fos ni gguy u tan Got rok yu Israel ko Lul’ ni Kebar. 21 Ra bagyad ma anngeg owchen, ma aningeg pon, ma tan fapi pon e bay ban’en riy ni bod ya’an pa’ ba girdi’. 22 Pi owchef rorad nem e ri ta’reb rogon ko pi owchef ni ba’ram nug guy u charen e Lul’ ni Kebar. Ra reb fa pin’em nib fos ma be yan u puluwon nga m’on.

Ezekiel 10 (YAPE)

In Other Versions