Proverbs 13 (YAPE)

1 Bitir nib gonop e ma motoyil ko fanow ko gallabthir, ma be’ nib tolngan’ e dabun ni nge dag ni ir e ba oloboch. 2 Girdi’ ni bfel’ e yira pi’ puluwrad ko tin yad be yog, ma pi’in yad ma ban e yad be yim’ ni bochan e modyargel. 3 Ngam kol’ayuw ko thin ni ngamog ngam ayuweg e pogofan rom. Be’ nma non nder kol’ayuw e ir e yib e gafgow riy ngak. 4 Demutrug feni t’uf ban’en rok be’ nib gamead ma dabiyag ngak. Ma en nib pasig mab gel ko maruwel e rayag ngak oren e tin ba’adag. 5 Girdi’ nib yul’yul’ e ba fanenikay e malulifith l’ugun, ma thin ko girdi’ ni kireb laniyan’ e ba k’artamra’ ma ba m’ayfan. 6 Ngongol nib mat’aw e yoror rok e pi’in yad ba yal’uw; ma pangin nib kireb e aram e mul nma tay e pi’in tadenen. 7 Bay boch e girdi’ ni yad ma dake bpire’ ban’en rorad, machane dariy ban’en rorad. Ma boch e girdi’ e yad ma dake gafgow, machane pire’ ban’en rorad. 8 Be’ ni bo’or salpiyen e rayag i liyabnag ni nge pi’ e salpiy ya ra dangay min li’ nge yim’, machane be’ nib gafgow e dariy e biney e magawon u puluwon. 9 Pi’in nib mat’aw e yad bod ba magal ni ba ga’ ram’en; ma pi’in kireb e yad bod ba magal ni be n’en ni nge math. 10 Tolngan’ e go’ oloboch e ma fek i yib. Kab gonop e en ma fith e fnow. 11 Feni mom nrayag e salpiy ngom, e aram feni mom nra thay u pa’am. Feni mo’maw’ ni mu yagnag, aram feni ra yo’or rom. 12 Nap’an nra mulan’uy, me mo’och’och lanin’uy, ma fa’anra yag e n’en ni un finey me sug nigey e felfelan’. 13 Fa’an ga ra siyeg e fonow ni bfel’, ma aram e ga be gay e oloboch; mu fol riy ma dabi buch ban’en rom. 14 Machib ko pi’in gonop e ba athang’el ko yafos, ra ayuwegnem ngam thay ko ngiyal’ ni ga be yan u thathren e riya’. 15 Tamilangan’ e yima tayfan, machane pi’in ndabiyag ni ngan pagan’uy ngorad e yad bay u daken e wo’ ni sor ko gafgow. 16 Girdi’ nib sul lanyan’ ngak e ma tafnay nge mu’ mfini ngongol, ma girdi’ ni pinat e yad ma dag farad balyang. 17 Pi tamal’og ni dabi pagan’uy ngorad e yad ra k’aring e oloboch, ma pi’in yima pagan’uy ngorad e yad ma fek e gapas i yib. 18 Be’ ni der ma mit ban’en ngak e ra gafgow me par nib m’ayfan, machane en nra fol ko fonow e yira tayfan. 19 Uw feni fel’ ni nge yag ngom e tin ga ba’adag! Girdi’ ni pinat e daburad ni ngar pi’ed keru’rad ko kireb. 20 Mu pachegem ngak e pi’in yad ba gonop me yag e gonop ngom. Fa’an ga ra m’agem ngak e girdi’ ni pinat, ma gur e ga ra gafgow. 21 Oloboch e ma lek e pi tadenen u gubin yang, machane girdi’ nib mat’aw e ra fel’ wa’athrad ko tin ni bfel’ ban’en. 22 Girdi’ nib manigil e ra pi’ e gayog rok nga pa’ pifak e pi’in pifak, machane gayog rok e pi tadenen e ra yan ngak e pi’in nib mat’aw. 23 Yung i flang ni dawor ni milay’nag bayay e rayag ni ngan milay’nag nge yib e ggan riy nib yo’or ni fan ko pi’in gafgow, machane pi’in nib buchan’ e yad be taleg ni dab ni milay’nag. 24 Fa’anra dab mu gechignag fakam, ma de t’uf rom. Fa’anra bt’uf rom, ma ga ra yal’uweg. 25 Pi’in nib mat’aw e ba gaman garad, machane pi’in kireb e gubin ngiyal’ ni yad be yim’ ko bilig.

Proverbs 13 (YAPE)

In Other Versions