Psalms 119 (BBPNG)
1 Nowa dunu ilia da giadofasu mae hamone,Hina Gode Ea Hamoma:ne sia:i nabawane hamonanea,ilia da hahawane bagade. 2 Nowa da ilia asigi dawa:su huluane amoga Hina Gode Ea hamoma:ne sia:iamoma noga:le fa:no bobogesea, ilia da hahawane bagade. 3 Ilia da giadofasu hame dawa:.Ilia da Hina Gode Ea logodafa, amoga ahoa. 4 Hina Gode! Di da Diahamoma:ne sia:i ninima ianu,amo mae yolele nabawane hamoma:ne sia:i dagoi. 5 Na da Dia hamoma:ne sia:iamo defele hamomusa: bagadewane hanai gala. 6 Na da Dia sema amo noga:le nabawane hamosea,na da gogosiasu hame ba:mu. 7 Na da Dia moloidafa fofada:su hou noga:le ado boba:lalea,na dogo da fofoloiba:le, na da Dima nodomu. 8 Na da Dia hamoma:ne sia:i nabawane hamomu.Na maedafa yolesima! 9 Ayeligi da habodane ea esalusu fofoloiwane ouligima:bela:?E da Dia hamoma:ne sia:i amo nabawane hamosea,ea esalusu da fofoloi ba:mu. 10 Na dogoga huluane, na da Dima fa:no bobogemusa: dawa:.Na da Dia hamoma:ne sia:i amo na da giadofasa:besa:le, Dia na fidima. 11 Na da Dia hamoma:ne sia:i amo na dogo ganodini dawa:i diala,amasea na da Dia hamoma:ne sia:i hame giadofale hamomu. 12 Hina Gode! Na da Dima nodone sia:sa.Dia noga:idafa hou nama olelema. 13 Na da Dia hamoma:ne sia:i huluane nama i,amo eso huluane bu ha:giwane dabuasili adolalumu. 14 Dia hamoma:ne sia:i amo na da nodone amo fawane baligili fa:no bobogesa.Na liligi bagade amo gagumusa: hame dawa:sa. 15 Na da Dia hamoma:ne sia:i amo dadawa:le bai hogosa.Na da Dia olelesu hou amo abodesa. 16 Na da Dia sema hamoi amoma bagadewane nodonana,amola Dia hamoma:ne sia:i, amo na hamedafa gogolemu. 17 Na da Dia hawa: hamosu dunu.Nama nodone ba:ma.Amasea na da esalawane Dia hamoma:ne olelei amo hamonanumu. 18 Na si Dia fadegalesima,amasea na da Dia sema hamoi moloidafa amo ba:mu. 19 Na da eso bagahame fawane osobo bagadega esalumu.Amaiba:le, Dia hamoma:ne sia:i amo nama mae wamolegema. 20 Na da eso huluane Dia moloidafa fofada:su hou dawa:ma:ne bagadewanehanaiba:le, na dogo ganodini se naba. 21 Di da hidale gasa fibi dunuma gagabole sia:sa.Nowa da Dia hamoma:ne sia:i hame nabasea, gagabusu da ilima aligisa. 22 Na da ilia gadesu amola higasu hou bu mae ba:ma:ne, Dia na fidima.Bai na da Dia sema huluane nabawane hamonanu. 23 Ouligisu dunu da gilisili, na wadela:ma:ne ilegelala.Be na da Dia olelesu amo dawa:digima:ne bai hogosa. 24 Na da Dia hamoma:ne sia:i hahawane ba:sa.Dia hamoma:ne sia:i liligi huluane da nama fada:i sia:su dunu agoane gala. 25 Na da hasalasiba:le, gulu dabolei diala.Na da Dia ilegele sia:i defele, Dia na esaloma:ne bu uhinisima. 26 Na da na wadela:i hou hamoi huluane sisane fofada:i.Amola Di da amo nabawane bu dabe adole i.Dia moloidafa hou nama olelema. 27 Dia sema hamoi na noga:le dawa:digima:ne, na fidima.Amola na da Dia noga:idafa olelebe noga:le dadawa:lalumu. 28 Na da bagadedafa fofagiba:le, hasalasi dagoi ba:sa.Dia ilegei sia:i defele, nama gasa ima. 29 Na giadofale ahoasa:besa:le, noga:le ouligima.Dia fidimusa: ilegele sia:i defele, nama gasa ima. 30 Na da Dia hou noga:le nabawane hamomusa: ilegei.Na da Dia moloidafa fofada:su noga:le nabawane dadawa:i galu. 31 Hina Gode! Na da Dia hamoma:ne sia:i, amoma noga:le fa:no bobogei.Na gogosiama:ne mae hamoma. 32 Na da Dia hamoma:ne sia:ne iasu hanaiwane nabawane hamomu.Bai Di da nama fada:ne dawa:su bagade imunu. 33 Hina Gode! Dia sema ea bai dawa:loma:ne nama olelema.Amola na da Dia sema amoga eso huluane fa:no bobogemu. 34 Dia sema ea bai nama noga:le olelema.Amasea, na da na gasa huluaneamoga Dia hamoma:ne sia:i fa:no bobogelalumu. 35 Dia hamoma:ne sia:i na noga:le fa:no bobogelaloma:ne, Dia ouligima.Bai amo hamoma:ne sia:i da nama hahawane hou iaha. 36 Di da nama bagade gagumusa: hanasu mae iawane,Dia sema amoma fa:no bobogema:ne hanai fawane nama ima. 37 Na da hamedei liligi amoma bagadewane dawa:sa:besa:le,na amo mae hamoma:ne fidima.Dia ilegele sia:i defele, nama noga:idafa hou hamoma. 38 Di da nowa dunu da Dia sia: nabawane hamosea,ema hahawane hamomusa: ilegele sia:i.Amo na da Dia hawa: hamosu dunuba:le,Dia ilegele sia:i amo nama hamoma. 39 Na da nama ha lai dunu ilia nama gadesu, amoga beda:sa.Dia na gaga:ma.Dia moloidafa fofada:su hou da noga:idafa. 40 Na da Dia hamoma:ne sia:i amo nabawane hamomu hanai gala.Esalusu gaheabolo nama ima.Bai Di da moloidafaba:le. 41 Hina Gode! Dia nama asigi hou da habowaliyale amo nama olelema!Dia ilegele sia:i defele, na gaga:ma! 42 Amasea, na da dunu amo da nama gadebe, ilima dabe sia:musa: dawa:mu.Bai na Dia sia: dafawaneyale dawa:sa. 43 Na da eso huluane moloidafa sia: amo sia:noma:ne, Di hamoma.Bai na dafawane hamoma:beyale dawa:suda Dia fofada:su hou amo ganodini diala. 44 Na da Dia sema huluane, mae fisili,eso huluane nabawane hahamona ahoanumu. 45 Na da halegale noga:ledafa lalalumu.Bai na da Dia olelesu adoba:le fa:no bobogele ba:sa. 46 Na da Dia hamoma:ne sia:be, amo hina bagade ilia odagiaba olelemu.Na da hame gogosiamu. 47 Na da Dia hamoma:ne sia:i nabawane hamonanebeba:le, hahawane ba:sa.Bai na da amo bagade hanasa. 48 Na da Dia hamoma:ne sia:i amo gaguia gadosa, amola amoma hanasa.Na da Dia: hamoma:ne sia:i amo dadawa:lalumu. 49 Na da Dia hawa: hamosu dunu, amola Di da nama hahawane ilegele sia:beba:le,na da dafawane hamoma:beyale dawa:lusu lai dagoi.Amo ilegele sia:i bu dawa:ma. 50 Na se nabasu ganodini amolawane, na dogo da denesi.Bai Dia ilegele sia:i da nama fifi ahoanusu i dagoi. 51 Hidale gasa fi dunu da eso huluane nama higale ba:sa.Be na Dia sema amo fa:no bobogebe hame yolesi. 52 Dia musa: hemonega fofada:su hou, na da dawa:lala.Hina Gode! Amo da na dogo denesisa. 53 Wadela:idafa dunu da Dia sema wadela:lesilalebe na ba:sea,na da ougi bagadewane ba:sa. 54 Na da osobo bagadega ode bagahame esalu.Be na da Dia sema olelema:ne, gesami hea:su hahamosa. 55 Hina Gode! Na da gasia Di fofagini dadawa:lala.Amola na da Dia sema dadawa:lala. 56 Na da Dia hamoma:ne sia:i nabawane hamobeba:le,hahawane bagade ba:sa. 57 Hina Gode! Na da Dima fawane hanai.Na da Dia sema fa:no bobogemusa: ilegele sia:sa. 58 Na Dima ha:giwane edegesa!Dia ilegele sia:i defele, na wadela:i hou gogolema:ne olofole, nama asigima. 59 Na da nina: hou abodele,Dia hamoma:ne sia:i amoma fa:no bobogemusa:, ilegele sia:sa. 60 Mae oualigili, na da hedolowaneDia hamoma:ne sia:i nabawane hamomusa: ahoa. 61 Wadela:i hamosu dunu da na sa:ima:ne sanenesi.Be na da Dia sema hame gogolesa. 62 Gasi dogoa, na da nedigili,Dia moloidafa fofada:su hou amoma nodosa. 63 Na da dunu huluane ilia da Dima hawa: hamosaamola Dia sema nabawane hamosa,ili huluane na dogolegei na:iyado agoane ba:sa. 64 Hina Gode! Osobo bagade da Dia mae fisili asigidafa hou amoga nabai gala.Dia hamoma:ne sia:i, amo nama olelema. 65 Hina Gode! Di da Dia ilegele sia:i didili hamoi dagoi.Na da Dia hawa: hamosu dunu,amola Di da nama noga:le hamosa. 66 Nama bagade dawa:su amola hamoma:ne dawa:su ima.Bai na da Dia hamoma:ne sia:i amo dafawaneyale dawa:sa. 67 Musa:, Di da nama se bidi hame i amogalu, na da giadofale ahoasu.Be wali, na da Dia sia: amo nabawane hamosa. 68 Di da noga:idafa amola asigidafa.Dia hamoma:ne sia:i, amo nama olelema. 69 Hidale gasa fi dunu da na hou ogogole olelei.Be na da na dogo huluane amogaDia hamoma:ne sia:i amo nabawane hamonana. 70 Ilia da asigi dawa:su hame gala.Be na da Dia sema hamonanebeba:le, hahawane ba:sa. 71 Nama se bidi iasu da na hou noga:le fidi.Bai amoga na da Dia hamoma:ne sia:i noga:le dadawa: ahoasu. 72 Na ba:loba, sema amo Dia nama i,da osobo bagade su huluanedafa baligisa. 73 Hina Gode! Di da na hahamoi,amola Di da na gaga:lala.Na da Dia sema huluane dadawa:musa:asigi dawa:su noga:i nama ima. 74 Nowa dunu da Dima nodone dawa:sea, ilia da na ba:sea, nodomu.Bai na da Dia ilegele sia:su amo dafawaneyale dawa:sa. 75 Hina Gode! Dia fofada:su hou da moloidafa, amo na dawa:.Amola dia nama se bidi iasu, bai da Dia mae fisili asigidafa hou olelesa. 76 Dia mae fisili asigidafa hou da na dogo denesimu da defea.Bai na da Dia hawa: hamosu dunu,amola Di da amo nama defele hamoma:ne sia:i. 77 Na esaloma:ne, Dia nama asigima!Bai na da Dia sema hahawane hamonana. 78 Hidale gasa fibi dunu da ogogole nama diwaneya udidiba:le,ilia gogosiamu da defea.Be na da Dia hamoma:ne sia:suamo na asigi dawa:su ganodini dadawa:lalumu. 79 Nowa dunu da Dima nodosaamola Dia hamoma:ne sia:i noga:le dawa:sa, ilia da nama misunu da defea. 80 Na da Dia hamoma:ne sia:i noga:ledafa nabawane hamomu da defea.Amasea, na da hame hasalasiba:le, hame gogosiamu. 81 Na da Dia gaga:su hou ba:musa: ouesalebeba:le, na da gufia:i dagoi.Na da Dia sia: fawane dafawaneyale dawa:sa. 82 Na da Dia ilegele sia:i hou doaga:ma:ne sosodo aligibiba:le, na da si sebe.Na da amane adole ba:sa, “Di da habogala na fidima:bela:?” 83 Na da ohe gadofoga waini hano disu ha:digi dagoi defele ba:sa.Be na da Dia hamoma:ne sia:i hame gogolei. 84 Na da habowali seda ouesaloma:bela:?Dia da habogala nama se iabe dunu, ilima se dabe ima:bela:? 85 Hidale gasa fibi dunu amo da Dia sema nabawane hame hamosa,ilia da na sa:ima:ne uli dogonesi. 86 Dia hamoma:ne sia:i huluane da dafawaneyale dawa:mu defele gala.Dunu eno ilia da na hou ogogole sia:beba:le, nama se bagade iaha.Dia na fidima! 87 Ilia da na gadenenewane fane legei dagoi.Be na da Dia hamoma:ne sia:su amo hame fisiagai. 88 Di da eso huluane mae fisili asigidafa hou hamonana.Amaiba:le, Dia nama asigidafa hou hamoma.Amasea, na da Dia sema nabawane hamomu. 89 Hina Gode! Dia Sia: da eso huluane dialumu.Dia Sia: da Hebene ganodini, eso huluane dialumu. 90 Dia mae fisili, asigidafa hou da eso huluane dialumu.Di da osobo bagade ea dialoba amogai ligisi.E da amogaiwane diala. 91 Di da liligi huluane ouligisa.Di da amo hamoma:ne sia:beba:le,liligi huluanedafa da ilia dialoba amogaiwane diala. 92 Na da se nabawane esalu.Be Dia sema da nama hahawane hou ea bai hame ganiaba,na da se nabawane bogola:loba. 93 Na da Dia hamoma:ne sia:su amo mae fisili noga:ledafa ouligimu.Bai amoga Di da na esaloma:ne fidi. 94 Na da Dia:! Na fidima!Na da Dia hamoma:ne sia:i amo adoba:le fa:no bobogei. 95 Wadela:i hamosu dunu da na fane legema:ne ouesala.Be na da Dia sema amo na asigi dawa:su ganodini dawa:lalumu. 96 Na da ba:loba, liligi huluane da dagomu bidi gala.Be Dia hamoma:ne sia:i da noga:idafa. 97 Na da Dia sema amoma bagadewane asigisa.Na da hahabe asili daeya, eso huluane amoga Dia sema dadawa:lala. 98 Dia hamoma:ne sia:i da eso huluane nama gilisisa.Dia hamoma:ne sia:i da na dawa:su houamo nama ha lai dunu ilia dawa:su hou baligima:ne hamosa. 99 Na dawa:su da nama olelesu dunu ilia dawa:su amo baligisa.Bai na da Dia hamoma:ne sia:su amo na asigi dawa:su ganodini dadawa:lala. 100 Na asigi dawa:su da da:i hamoi dunu ilia asigi dawa:su baligisa.Bai na da Dia hamoma:ne sia:su amo nabawane hamosa. 101 Na da wadela:i hou hamosu amoma hame gilisi.Bai na da Dia sia: nabawane hamomusa: hanai gala. 102 Na da Dia hamoma:ne sia:su hame fisiagasu.Bai Dia Disu da na Olelesu Dunu. 103 Dia hamoma:ne sia:su da hedai bagade.Ilia hedai da agime hano ea hedai baligisa. 104 Dia sema da bagade dawa:su nama iaha.Amaiba:le, na da wadela:i hou hamobe huluane higasa. 105 Dia sia: da nama logo olelesu gamali defele gala.Dia sia: da na logo ba:ma:ne hadigi digagala:sa 106 Na da Dia moloidafa hamoma:ne sia:iamo nabawane hamomusa: ilegele sia:i dagoi.Amo ilegele sia:i, na da hame gogolemu. 107 Hina Gode! Na da baligiliwane se naba.Dia musa: ilegele sia:i defele, na mae bogole esaloma:ne fidima. 108 Hina Gode! Na Dima nodone sia:ne gadosu amo nabima.Dia hamoma:ne sia:su amo nama olelema. 109 Na Dima fa:no bobogemusa:, na esalusu fisimusa: momagele esala.Na da Dia sema hame gogolei. 110 Wadela:i hamosu dunu da na sa:ima:ne sanenesisa.Be na da Dia hamoma:ne sia:i mae fisili nabawane hamonana. 111 Na da Dia hamoma:ne sia:su mae fisili, eso huluane gagui dialebe ba:mu.Dia hamoma:ne sia:i da nama hahawane hou iaha. 112 Na da agoane ilegei dagoi.Na da Dia sema amo fa:no bobogelaleawane,na bogomu eso doaga:mu. 113 Dunu amo da Dima noga:le hame fa:no bobogebe, na da higasa.Be na da Dia sema amoma asigisa. 114 Di da na gesu amola na gaga:su.Na dafawane hamoma:beyale dawa:su ea bai da Dia ilegele sia:su. 115 Dili wadela:i hamosu dunu! Gasigama!Na da na Gode Ea hamoma:ne sia:i nabawane hamomu. 116 Hina Gode! Dia ilegele sia:i defele, nama gasa ima!Amasea, na da esalumu.Na dafawane hamoma:beyale dawa:su fisisa:besa:le, Dia fidima. 117 Na dafasa:besa:le, na gaguma.Amasea, na da gaga:i dagoi ba:mu.Amola na da mae fisili,Dia hamoma:ne sia:i dadawa:lalu, nabawane hamomu. 118 Di da nowa dunu da Dia sema nabawane hame hamosea,Di da ili higale fisiagasa.Ilia ogogole ilegesu da hamedei liligi. 119 Di da wadela:i hamosu dunu huluane isu agoane ha:digisa.Amaiba:le, na da Dia hamoma:ne sia:i amoma nodosa. 120 Na da Diba:le beda:sa.Dia moloidafa fofada:su houba:le, na da bagadewane beda:sa. 121 Na da hou noga:idafa amola moloidafa hamoi dagoi.Na ha lai dunu da na hasalasisa:besa:le, na mae yolesima. 122 Na da Dia hawa: hamosu dunuba:le, Dia na fidima:ne ilegele sia:ma.Hidale gasa fifi dunu da na banenesisa:besa:le, Dia na fidima. 123 Na da Dia gaga:musa: ilegele sia:i amo nama doaga:ma:ne,sosodo ouesalebeba:le, na da si sebe. 124 Dia mae fisili asigidafa hou defele, Dia na fidima.Amola Dia hamoma:ne sia:su nama olelema. 125 Na da Dia hawa: hamosu dunu.Na da Dia olelesu noga:le dawa:musa:, asigi dawa:su bagade nama ima. 126 Hina Gode! Dia hawa: hamomu eso da doaga:i dagoi.Bai dunu ilia da Dia sema nabawane hame hamosa. 127 Na da Dia hamoma:ne sia:su amoma hanai houda gouli noga:idafa amoma hanai hou bagadewane baligisa. 128 Amaiba:le, na da Dia hamoma:ne sia:su huluane amoma fa:no bobogesa.Na da wadela:i hamosu logo amoga masunu higasa. 129 Dia olelesu da noga:idafa.Na da na dogoa asigi dawa:su huluane amoga Dia olelesu nabawane hamosa. 130 Dunu ilia da Dia olelesu liligi amo dawa:loma:ne olelesea, hadigi da mahaamola hame dawa:su dunu da asigi dawa:su laha. 131 Na da Dia hamoma:ne sia:su dawa:musa: bagadewane hanaiba:le,na da helega ha:ha:sa. 132 Dia da Dima asigi dunu huluane ilima hamobe defele,nama ba:leguda:le, asigima. 133 Dia ilegele sia:i defele, na dafasa:besa:le,amola wadela:i houga hasalasisa:besa:le, na fidima. 134 Na da Dia hamoma:ne sia:i noga:le nabawane hamomusa:,nama ha lai dunu da na mae banenesima:ne, Dia na gaga:ma. 135 Na hahawane ganoma:ne, Di nama misini,amola Dia sema nama olelema. 136 Na si hano da hano yogo agoane daha.Bai dunu eno ilia Dia sema nabawane hame hamosa. 137 Hina Gode! Di da moloidafa,amola Dia sema da moloidafa fofada:musa: defele gala. 138 Hamoma:ne sia:i Dia i da dafawane moloidafaamola moloidafa fofada:musa: defele gala. 139 Na ougi hou da na dogo ganodini lalu agoane nenana.Bai na ha lai dunu ilia da Dia hamoma:ne sia:suda hamedei liligi agoai ba:sa. 140 Dia ilegele sia:i da dafawanedafa dialumu.Na da Dia ilegele sia:i bagadewane hanasa. 141 Na da hamedei dunu agoai,amola eno dunu ilia da na higasa.Be na da Dia olelesu liligi hame fisiagasa. 142 Dia moloidafa hou da mae fisili eso huluane dialumu.Dia sema da eso huluane dafawanedafa diala. 143 Na da da:i dioi bagadeamola bidi hamosu bagade ba:sa.Be Dia hamoma:ne sia:su da nama hahawane hou iaha. 144 Dia hamoma:ne sia:su da eso huluane moloidafa fofada:su defele gala.Na esaloma:ne, asigi dawa:su noga:i amo nama ima. 145 Na asigi dawa:su huluane amoga na dima wele sia:sa.Hina Gode! Na sia:be amo dabe adole ima.Amasea, na da Dia hamoma:ne sia:su amo nabawane hamomu. 146 Na Dima wele sia:sa.Na gaga:ma! Amasea, na da Dia sema didili hamomu. 147 Eso da hame misia, na da Dia na fidima:ne wele sia:sa.Na da Dia ilegele sia:i nababeba:le,na da dafawane hamoma:beyale dawa:lusu lai dagoi. 148 Daeya ganini hadigibi galu, na da mae golale si dagane esala,Dia hamoma:ne sia:su dadawa:sa esala. 149 Hina Gode! Dia asigidafa hou da mae fisili dialebeba:le, na sia: nabima.Na esaloma:ne, Dia gogolema:ne olofole asigidafa hou nama olelema. 150 Nama se iabe dunu da dodona:gi,amola Dia sema hamedafa fa:no bobogesa.Ilia nama gadenena maha. 151 Be Hina Gode! Di da na gadenene lela,amola Dia hamoma:ne sia:su da eso huluane dialumu. 152 Musa:ganiniwane, na da Dia hamoma:ne sia:i amoga dawa: lai.Dia hamoma:ne sia:i da eso huluane dialoma:ne hahamoi. 153 Na se nabasu ba:ma! Amola na gaga:ma!Bai na da Dia sema noga:le ouligi. 154 Na hamobe hou amo gaga:ma,amola na halegale esaloma:ne hamoma.Dia ilegele sia:i defele, na gaga:ma. 155 Wadela:i hamosu dunu da gaga:su hame ba:mu.Bai ilia da Dia sema nabawane hame hamosa. 156 Be Hina Gode! Di hahanibi dunuma bagadedafa asigisa.Dia gogolema:ne olofole asigi hou nama olelema, amola na gaga:ma. 157 Nama ha lai dunu amola nama banenesisu dunu da bagohame esafula.Be na da Dia sema fa:no bobogesu hame fisisa. 158 Na da amo hohonosu dunu ba:sea, na da bagadewane higale ba:sa.Bai ilia da Dia hamoma:ne sia:i amoma hame fa:no bobogesa. 159 Hina Gode! Ba:ma! Na da Dia hamoma:ne sia:su bagadewane hanasa.Dia asigidafa hou da afadenesu hame dawa:.Amaiba:le, na gaga:ma! 160 Dia sema bai da dafawanedafa hou.Amola Dia moloidafa fofada:su huluane da eso huluane dialumu. 161 Gasa bagade dunu da bai hamedene, udigili nama doagala:sa.Be na da Dia sema amo fa:no bobogesa. 162 Dunu amo da gobolo liligi bagadedafa hahawane hogole ba:sea,amo defele na da Dia ilegele sia:su ba:sea, hahawane bagade gala. 163 Na da ogogosu hou huluane bagade higasa.Be na da Dia sema bagade hanasa. 164 Di da moloidafa fofada:su hou hamonanebeba:le,na da eso huluane amoga, fesuale agoane Dima nodone sia:sa. 165 Nowa da Dia sema hamoma:ne hanaiwane esalea,ilia da gaga:iwane esala.Ilia da dafasu hame dawa:. 166 Hina Gode! Dia na gaga:ma:ne, na da ouesala.Amola na da Dia hamoma:ne sia:be defele hamonana. 167 Na da Dia olelesu nabawane hamonana.Na da na dogo huluane amoga Dia olelesu hanasa. 168 Na da Dia hamoma:ne sia:su amo nabawane hamosa.Dia da na hamobe huluane ba:lala. 169 Hina Gode! Na fidima:ne digini wele sia:suamo Dima doaga:ma:ne, logo doasima.Dia ilegele sia:i defele, dawa: lama:ne asigi dawa:su nama ima. 170 Na sia:ne gadobe nabima.Amola Dia hamomusa: ilegei defele, na gaga:ma! 171 Na da eso huluane Dima nodone sia:nanumu.Bai Di da nama, Dia sema amo olelesa. 172 Na da Dia sema amoga gesami lale hea:mu.Bai Dia hamoma:ne sia:su da moloi fofada:musa: defele gala. 173 Di eso huluane, na fidimusa:, momagele ouesaloma.Bai na da Dia hamoma:ne sia:su amoma fa:no bobogelala. 174 Hina Gode! Dia fidima:ne gaga:su hou nama doaga:ma:ne,na da bagadewane hanasa.Na da Dia sema amo ganodini hahawane hou ba:sa. 175 Na da Dima nodone sia:nanumusa:, esalusu nama ima.Dia hamoma:ne sia:su na fidimu da defea. 176 Na da sibi fisi defele, doulalala.Na da Dia hawa: hamosu dunu.Amaiba:le, Dia na hogomusa: misa!Bai na da Dia hamoma:ne sia:i noga:le ouligi.