1 Corinthians 11 (BBT1E)

1 Chiihphado, gu è Masi shii nui pha duiine, gu shii nui bo. 2 Gu nathek shii chiong nyieliieshii nathek è idang gu shii now chiih-è gu nathek shii phi muii pha muyuathek ji shii lua. 3 Jishii gu nathek shii thieg yi pha yang ro Masi ne zab pha bran è boh ro, gey ne yiy è boh ro, chiih-è Hamangkhung-aphuii ne Masi è boh ro. 4 Ji-è bran hanyie è hong ne misiasia shii Hamangkhung-aphuii ro mua yao ne zab shii airo khrug chaig pha ji ne Masi shii makhak-riing ro. 5 Chiih-è hò-amuii hanyie è hong ne misiasia shii nane Hamangkhung-aphuii mua yao shii khrug achaig pha ji ne awai gey shii makhak-riing rek; bimi nane hò-amuii ne khaziang laig pho è nyie yo asi ro. 6 Hò-amuii è awaithek khrug shii achiiag arone, ai ne awai khaziang laig liak ji wie ro. Chiih-è hò-amuiithek ne gadong khli magunde khaziang laig magunde biwo pha miyao ro, ji-è hò-amuiithek ne khrug chiiag chid phro. 7 Bufuiithek ne awaithek khrug achiiag chid, nyieliieshii bufuiithek ne Hamangkhung-aphuii ro biisiie pha nane ò mia pha jangbangthek doh yi phro. Jishii hò-amuiithek ne hò-aphuiithek ro biisiie doh yi, 8 Hò-amuii ne hò-amuii è arey ro, jishii hò-amuii ne hò-aphuii è rey. 9 Chiih-è hò-aphuiithek ne hò-amuiithek pha arab ro, jishii hò-amuiithek ne hò-aphuiithek pha rab phi ro. 10 Chiihphado, hamangkhliiethek pha chiang è, hò-amuiithek ne awaithek gey ro riichai pha iliing shii um rone doh yi pha awaithek khrug chaig chid. 11 Ithong lakhung shii gethek ro chai, hò-amuiithek ne hò-aphuiithek è ichad asi ro, ji duiine hò-aphuiithek de hò-amuiithek è ichad asi ro. 12 Hò-amuii ne hò-aphuii è rab pha duiine ro, ji duiine hò-aphuii de hò-amuii è giak ro; chiih-è hì ne zab Hamangkhung-aphuii è rey ro. 13 Hò-amuiithek ne Hamangkhung-aphuii shii hong ne misia shii khrug achaig pha sia pha ji ne wie pha asi pha awie pha nawaithek shii chua bo. 14 Bufuiithek ne khaziang phiang ruii arone biwo ro, 15 jishii hò-amuii khrug shii khaziang phiang ruii arone ai ne khie ro. Bimi shii khaziang phiang phi pha ji ne awai khrug shii chaig bo ne phi ro. 16 Jishii hanyie magungde hì pha chiang shii khiinaing yang arone, gune nyie yao pha um pha ji ne hì ne gethek shii oi ro chiih-è hì ne charchthek pha Hamangkhung-aphuii shii de gai misia pha Iphey oi ro. 17 Chiihphado, muyuathek duiine, gu nathek shii achiong, nyieliieshii nathek ro malethek pha misia ne nyayaochak arone wie è bajo awie pha rek ro. 18 Zab è igobi, gu nathek shii yao nathek ro maley shii ne yoh yoh ibrogthek pho de um ro; chiih-è ìujia ne miyao ne gu migi rek. 19 (Nathek duchoi shii yo che pha ji ne athan chid rabo hanyie magungde rangsua shii arone sang è doh yi phro.) 20 Nathek ibrog è ò shii si mage shii, nathek è chie pha ji ne Ithong ro michie asi ro. 21 Na è chie mage shii, zab ne hanyie è chie pha jao, ji-è giak ne chi-iyiy bamuii shii, giakthek ne phuiithiigdun. 22 Nathek ne chie niing pha nawaithek ro hò oi bey? Din ne nathek ne Hamangkhung-aphuii pha charch shii awie pha rek ne chid pha branthek shii biwo rey yi ne bey? Nathek è gu shii hì pha chiang shii nyie yao bo è now lei? Gu ne nathek shii chiong habey? Khuchunde gune arek ro! 23 Gu Ithong è mua pha muyua ji ne gu nathek shii phi: aishii zum pha habiu Ithong Isu iweb dum jia yie srane, 24 Hamangkhung-aphuii shii laso phi, ne ji ne yao, “Hì ne guro siu ro, nyie ji ne nathek ro ro. Hì ne gu shii now pha rek bo.” 25 Hì duiine, dinne Ithong iweb pha idoh shii gog chiing srane yao, “Hì pha gog ne Hamangkhung-aphuii ro iwo sbang ne gu ifai è phiing ne ruii. Khuchung magungde na hì niing shii gu shii now pha hì rek bo.” 26 Hì pha miyao è ne zab pha ishak nane hì pha iweb nane gog è niing shii ai awuii sapho shii Ithong iy pha ji khagi rek ro. 27 Hì ne hì duiine ro nathek zea è aishii ilab arek pha Ithong ro iweb dinne gog ji è niing arone, ai ne Ithong ro siu nane ifai shii layog ichiig rek ne suang rey dun. 28 Ji-è, chiihphado, igobi nawai shii chai bo, chiih-è iweb ji nane gog ji è niing bo. 29 Jishii na Ithong ro iweb nane gog ji è niing shii nyie athieg arone chie niing pha ji è nawai shii chua pha hà noh ro. 30 Ji-è nathek bajo ne zia nane rad pha um ro, chiih-è bajothek ne iy dun ro. 31 Gethek è igobi gethek shii chua bi arone, gethek ne Hamangkhung-aphuii ro chua shii awuii phro. 32 Ji-è gethek ne sohjambling rog shii athey yi pha Ithong è gethek shii chua ne lago phi ro. 33 Ji-è chiihphado, gu ijakthek, nathek Ithong ro iweb chie pha ò shii khrab mage shii, nawaithek chung khan rai bo. 34 Chiih-è hanyie magunde chi-iyiy arone, nane nawai hò hà chie bo, chiihphado nathek ò si rai pha ji shii ne Hamangkhung-aphuii ro chua pha shii asi phro. Chiih-è gai pha miyao ne, gu wuii ruii shii khriig rek phi pha ro.

1 Corinthians 11 (BBT1E)

In Other Versions