James 4 (BBT1E)

1 Nathek duchoi shii mak nane guithek ne khi-è thog phlei? Nyie nathek iliing shii sangmiie chid pha ji è athog bey? 2 Nathek ne manathek ne chid, jishii nathek shii ne jithek oi, ji-è nathek ne ua pha saro; nathek manathek shii ne bajo chid, jishii nathek jithek amua, ji-è nathek gui ne mak rek ro. Nathek nyie chiid pha ji ne nathek shii oi, nyieliieshii nathek Hamangkhung-aphuii shii alia. 3 Chiih-è nathek lia mage shii, nathek ne amua, nyieliieshii nathek ro now pha ji ne awie; nathek è lia pha mana ne nawaithek è sang pha ji bohkhoh pha lia. 4 Migi oi pha bran! Nathek ne ji athieg bey sohjambling shii ijak rek pha ji ne Hamangkhung-aphuii shii suang rek ro? Nathek sohjambling shii ijak rek yang pha now arone, nathek ne nawaithek shii Hamangkhung-aphuii ro suang rab phro. 5 Jigigam shii yao pha ji izai asi rone nathek ne anow rabo, “Hamangkhung-aphuii è gethek shii ragung phi pha ji bajo chid pha ji shii zan phi ro.” 6 Jimagunde Hamangkhung-aphuii è phi pha bushun din nede bajo gang ro. Jigigam shii de yao, “wiangwe pho shii ne Hamangkhung-aphuii è suang rek ruii, jishii jum shii ne bushun phi ro.” 7 Ji-è chiihphado, nawai shii Hamangkhung-aphuii shii phi muii bo. Ibuii shii gak bo, chiih-è ai ne nathek è ruang randun phro. 8 Hamangkhung-aphuii moe shii wuii bo, chiih-è ai de nathek moe shii wuii ruii phro. Layogpho nathek, nawaithek wadthek sud bo! Lawasdai nathek, nawaithek lubutheg shii gang rab bo! 9 Duhug rek bo, ziak bo, chiih-è choh bo; nathek è siak pha ji ne choh bsa hà lai bo, nathek ro lubo ji ne duhug rek bo! 10 Ithong moe shii nawaithek ne jum rek bo, chiih-è ai nathek shii lakhung shii chiing ruii phro. 11 Gu ijakthek, gai shii makhak-ariing rabo. Nathek è gai Masipho shii suanghàw ne chua arone, nathek ne Iphey shii suanghàw ne chua phro. Nathek è Iphey shii chua arone, nathek ne Iphey shii anuii pha, Iphey shii chuapho ro. 12 Iphey phi pha nane chua pha ne Hamangkhung-aphuii bie ro. Ai ne ragia rek mua chiih-è srobro rek mua ro. Nawaithek shii hanyie rone now gai shii chua phlei? 13 Nathek ji è yao, “sudoh thimiang gethek ne gai thiig hà wuii ne, gethek idam rai srane bang bajo wiang pha chong rek pha wuii phro ne yao pha nathek zab thuh gu shii nuii bo.” 14 Thimiang shii nathek ro chai nyie rey ramuii pha ji de athieg ro! Nathek ne mukham pha bamun duiine ro, ìujia khia srane chiihphado san din dun. 15 Hì ne nathek è yao chid: “Ithong è yang arone, gethek ne rai ne jithek rek.” 16 Jishii thuh nathek ne nyigodog rek, chiih-è nathek nyigodog rek; hìtheg zab nyigodog ne ichiig ro. 17 Ji-è chiihphado, gethek ne wie rek chid phro ne thieg srane gethek arek arone, gethek ne layog shii ichiig rey dun.

James 4 (BBT1E)

In Other Versions