John 8 (BBT1E)

1 Chiihphado, zab pha bran awai hò hà dun ched dun, chiih-è Isu yi sumaro pha phiing hà wuii dun. 2 Ji pha thimiang pha hamiang shii ai idoh Hamangkhung-aphuii Misiahò hà wuii dun. Zab branthek ne aishii shan ne khrab, chiih-è ai de dug srane ithek shii jao ne yua. 3 Iphey yua pha Masdo nane Pharisithek è hò-amuii jia shii siulua pha doh ne zum ne thiichiih noh ne ai moe shii riu ba yi. 4 Ai è Isu shii yao, “Masdo,” Gathek è hì pha hò-amuii shii siulua rek pha ishak shii zum phro. 5 Moses è phi pha gethek ro Iphey shii de yung hì è rek pha hò-amuii shii ne lubao rek ne chao ne ua chid phro, Thuh na ne nyie yao phlei? 6 Aishii nin mua pha ithek è aishii ichiig sow srane yao. Jishii Isu è nyak hà bam srane awai wad bieng rek ne zey. 7 Thiichiih shii riu pho è aishii musai sai, jishii ai è miang riu srane ithek shii yao, “Ichiih shii ithek è khuchung de layog arek ba pha um arone igobi ai è hò-amuii shii lubao rek ne chao bo. 8 Chiihphado dinne ai buzam bam srane nyak shii zey. 9 Ithek ji pha miyao yoi srane weg è yi ne filiao de ji jia rek ne Isu shii thoh ne dun ched dun, Jishii ji pha hò-amuii yi Isu moe shii nyariu bamuii. 10 Ai è miang riu srane ji pha hò-amuii shii yao, ai ne giisa hà lai? Ichiih na shii nin pho ne hanyie de aled sha bey?” 11 Ji pha hò-amuii è chang, Masdo hanyie de oi ro. “Chiihphado Isu è yao ji-arone wie ro,” Gu de nathek shii anin phro. Jishii na de dun bo chiih-è dinne hì è rek pha layog arek sha rabo. 12 Isu è Pharisithek shii yao din. Ai è yao, “Gune sohjambling pha muchuang ro,” Ji-è hanyie è gu ro shii luagieng arone ai ne ji pha chai muchuang mua ruii phro, chiih-è ai ne khuchung de igiia hà alua din sha phro. 13 Pharisithek è aishii yao, na ne thuh shii nawai haro han ne yao ara, ithek è nyie yao pha miyao jine nyie arey ro. 14 Asi, Isu è aishii chang, gui è gui chiang haro yao magungde, gu miyao jine izai chak ro, nyieliieshii gune khi è wuii chiih-è gu khi hà dun din ramuii pha ji ne gui thieg chak ro. Nathek ne gu khi è wuii pha ji nane gu khi hà dun ramuii pha ji ne athieg ro. 15 Nathek ne gang tharothamang lumuii duiine ne chua ara, chiih-è gune hanyie shii de achua phro. 16 Jishii gu è chua magunde gu ne izai chua ruii phro, nyieliieshii hì pha blia hì ne gui jijia asi ro, chiih-è gu shii thoh ge pha Aphuii de gu rog shii um ro. 17 Nawaithek ro Iphey shii de zey ne um, khuchung magungde bran nyi è khagi rek arone isa è nyie yao pha ji ne izai rey dun phro. 18 Gune gui khagi rek phro, chiih-è gu shii thoh ge pha gu Aphuii de gu chiang shii khagi rek ruii phro. 19 Ithek è aishii sai, na Aphuii ne giisa lei? Ai è ithek shii chang nathek gu shii de athieg ba ro chiih-è nathek gu Aphuii shii de athieg mua ba ro. Nathek è gu shii thieg arone gu Aphuii shii de thieg jong phro. 20 Isu è Hamangkhung-aphuii ro Misiahò hà yua shii bang zid pha japhothek ruii pha ùgud ji hà yao phro. Chiih-è thiichiih shii hanyie è de aishii azum, nyieliieshii airo ishak ne athog ba. 21 Din ne Isu è aishii yao, “Gune dun dun phro; nathek ne gu shii sow ruii phro, jimagungde nathek ne nawai layog hà iy dun phro. Nathek ne gu khi hà dun pha ji hà ne adun mua phro.” 22 Ji-è Jewthek pha rangsuathek è yao, “Ai è gethek shii ne ai khi hà dun pha ji shii ne adun mua phro ne yao dun, jine awai è awaishii ua pha miyao bey?” 23 Isu è chang, Nathek ne ichiih sohjambling luii pha ro, jimagungde gune lakhung è wuii pha ro, chiih-è nathek ne sohjambling pha ro, jimagungde gune sohjambling pha asi ro. 24 Ji-è gu nathek shii yao nathek ne Nawai layog è iy ruii phro. Chiih-è nathek ne Gune hanyie gu ji rone migi anow arone Nawai layog è iy ruii phro. 25 Ai è aishii sai, “Nane hanyie lai?” Isu è chang gune igobi è yaojong pha ji ro. 26 Gu ithek shii bajo yao pha de um ro, chiih-è gune ithek shii bajo nin pha miyao de um ro. Gu shii thoh ge pha ji ai ne izai chak ro, gune sohjambling shii nyie yao pha ji ne ai è yoi ne yao bie phro. 27 Ithek è Isu ne Aphuii pha miyao yao muii rone agao ba ro. 28 Ji-è ai ithek shii yao, na è Bran Dufuii shii lakhung chiing mage shii, ithek de gune ji ro thieg ruii phro; chiihphado gune gui blu è nyie arek rone thieg ruii phro, jishii gune gu Aphuii nyie yua pha ji rek bie phro. 29 Chiihphado hanyie gu shii thoh ge pha ji ne gu rog shii um ro; ai ne gu shii ji atho marui phro, nyieliieshii ai è nyie wie now pha ji ne gu è idang rek phro. 30 Bajo bran è Isu miyao yoi ne migi rek. 31 Ji-è Isu hanyie è aishii migi now pho shii yao, na gu miyao ji nuii arone, ithek ne gu ro izai samoythek chak ro; 32 Na ne izai shii thieg iwa, chiih-è izai ji è ithek shii sey ne thoh phi phro. 33 Ithek è aishii chang, “Gathek ne Abraham pha riingthek ro,” “Ji-è gathek ne khuchung de gairo khiao arek ba ro, chiihphado khiao akhui phro ne yao pha miyao ne nyie yao phlei?” 34 Isu è aishii chang, gu nathek shii izai yao dang phro: hanyie è layog rek pho ne layog pha khiao reyjong dun ro. 35 Khiao ne haliing jia shii idang arai phro, jimagungde dufuii ne idang haliing hà rai phro. 36 Dufuii è nathek shii khiao rek pha ji è lam mua arone izai è nathek ichad ro. 37 Gune ithek shii thieg ithek ne Abraham ro riingthek chak ro, jimagungde ithek ne gu shii ua pha suruii ramuii ro, nyieliieshii ithek ne gu miyao ji anuii ro. 38 Gune Aphuii chiang è nyie gu shii doh yi pha ji yao bie phro, Chiih-è nathek ne nawaithek Aphuii è nyie yao pha ji rek ara. 39 Ithek è aishii chang, “Abraham ne gathek ro aphuii ro.”“Isu è aishii chang, nathek ne Abraham ro izai ani chak arone,” na de ai mirek ji duiine rek phro. 40 Zab gu è nyie rek pha ji ne gune Hamangkhung-aphuii è nyie izai yoi pha ji nathek shii de yao pha rek phro. Jishii nathek ne gu shii ne ua pha suruii muii ro, Abraham ne ji arek marui ro! 41 Na ne nawaithek Aphuii è rek marui pha ji duiine rek ara ro.Chiih-è gune airo izai dufuii chak ro. “Ai è chang gu Aphuii ne Hamangkhung-aphuii awai bie ro.” 42 Isu è ithek shii yao, Hamangkhung-aphuii ne izai nathek ro Aphuii chak arone, nathek ne gu shii miie phro, nyieliieshii gune Hamangkhung-aphuii è wuii phro, chiih-è thuh gune ichiih shii um ro. Chiih-è gune gui lum ne awuii ro, jishii gu shii ne ai mutho ge ro. 43 Na ne guro miyao nyie rek ne agao lei? Nyieliieshii ithek ne guro mua ji zud ne ayoi mua ro. 44 Na ne nawairo aphuii ibuii pha ani ro, chiih-è ithek ne nawairo aphuii munow ji rek ara ro. Chiih-è ai ne igobi è sgohpho ro chiih-è ai ne izai hà khuchung de alua ro, nyieliieshii aishii ne izai de oi ro. Ithek khlam shii, ai ne awai lum ne rek bie phro, nyieliieshii ai ne khlam pho ro, chiih-è ai ne khlam pha aphuii. 45 Jishii gune nathek izai yao dang phro, ji-è nathek ne gu shii migi arek ro. 46 Nathek hanyie è gune layog rek rone khagi rek mua ne bey? Gune izai yao shii, ithek ne gu shii nyie rek ne migi anow lai? 47 Hanyie yi Hamangkhung-aphuii è wuii pha ji ne Hamangkhung-aphuii ro miyaogamthek nuii phro. Nathek ne Hamangkhung-aphuii è asi ara ro, chiih-è ji-è ithek ne anuii ro. 48 Ithek è Isu shii sai, “Nane Samarithan rone chiih-è na shii ne ibuii um rone gathek shii yao pha rangsua oi bey?” 49 Isu è ithek shii chang “Gu shii ne ibuii oi ro,” “Chiih-è gune Aphuii shii ilab rek phi” Jishii ithek ne gu shii ne ilab arek phi. 50 Gu ne gui shii ilab rek pha asow ro, jimagungde lasa hà jia um ro ai ne ilab chid phro chiih-è gu haro rek ne chua phi ro. 51 Gune ithek shii izai yao dang phro: Hanyie è gu muyua ji nuii pho ne khuchung de a-iy phro. 52 Ai è aishii yao, “Gathek ne thieg jong na shii ne ibuii um! Abraham de iyjong, chiih-è chaig pho de iyjong, Jishii ithek è yao hanyie è ithek muyua nuii arone khuchung de a-iy phro.” 53 Gathek ro aphuii Abraham ne iyjong dun, chiih-è na ne Abraham è de bo rone ayao mua phro, chiih-è chaig pho de iyjong dun, ji-è nawaishii hanyie ro è now phlei? 54 Isu è aishii chang, “Gu è gui shii ilab phi arone, ji pha ilab ne nyie adunmey phro. Nathek è Nawai Hamangkhung-aphuii ro è yao mua ne gu shii ilab phi muii pha Aphuii ji ro. 55 Na ne aishii athieg ba ro, jimagungde gune aishii thieg ro, gu de aishii athieg ro è yao arone ithek duiine khlam thek rey dun phro, jimagungde gune aishii thieg, chiih-è gune ai miyaogam nuii ro. 56 Nathek ro aphuii Abraham de gu wuii ruii pha ishak riig ne lubo rek ne rai iang phro; ai è doh mage shii bajo sang rek. 57 Ai è aishii yao, na ne idam saguii de arey ba shii na ne Abraham shii doh ne bey?” 58 Isu è aishii chang, “Gu nathek shii izai yao dang phro,” “Gu ne Abraham agiak ba pha ibi è gu ro.” 59 Chiihphado ai è lubao chiing srane aishii chao pha rek, jimagungde ai è ug srane Hamangkhung-aphuii Misiahò thoh ne dun marui.

John 8 (BBT1E)

In Other Versions