Matthew 4 (BBT1E)

1 Chiihphado Ibuii è chuajan yi pha Ragung è Isu shii balimuang hà noh dun. 2 Sawi Inaithek nane ibiuthek nyie de achie pha rai ne, Isu ne chi-iyiy dun. 3 Chiihphado Ibuii è aishii wuii srane yao, “Na Hamangkhung-aphuii pha Dufuii arone, hì pha lubao shii yung mage srane iweb rey yi bo.” 4 Jishii Isu è chang, “Jigigam shii yao, ‘Tharothamang ne iweb ji è asieng bie, jishii Hamangkhung-aphuii ro zab miyaothek pha miyaogam de chiid ro.’” 5 Chiihphado Ibuii è Isu shii So Rajan pha Jerusalem hà noh dun, aishii Misiahò pha zab è giu shii riu yi, 6 chiih-è aishii yao, “Na Hamangkhung-aphuii pha Dufuii arone, nawai shii buzam chiih mage bo,” Jigigam shii yao,Hamangkhung-aphuii è na chiang shii awai hamangkhliiethek shii yung ruii phro,ithek è nashii awaithek wadthek è khoh ruii phro,ji-è naro laikham shii de lubaothek shii akham yi phro. 7 Isu è chang, “Jishii jigigam shii de yao, ‘Nawai Hamangkhung-aphuii Ithong shii achai rabo.’” 8 Chiihphado ibuii è Isu shii bajo giu phiing hà noh srane ithek ro bajobothek nane sohjambling pha zab nuruiithek riig yi. 9 Ibuii è yao, “Na è gu shii lagiungniing ne misiasia arone.” “Zab hìthek gu na shii phi ruii phro.” 10 Chiihphado Isu è chang, “Dun dun bo, Sakhathong! Jigigam shii yao, ‘Nawai Ithong, Hamangkhung-aphuii shii ilab rek ne misiasia bie bo!’” 11 Chiihphado ibuii è Isu shii thoh marui; chiih-è hamangkhliiethek wuii srane aishii nong phi. 12 Isu è Jon ne phatheg hà chab muii rone yoi mage shii, ai Galili hà wuii dun. 13 Ai Nazareth hà arai, jimagunde, Zebulun nane Naphthali pha soh Galili khabang pha Khaphernaum thawun hà rai pha wuii dun. 14 Ji ne chaig Aijaya miyao marui pha ji izai rey yi pha rek ro: 15 “Zebulun pha soh nane Naphthali pha soh,khamuii pha lumuii hà, gai ithua pha Jordan pha,Gaibranthek pha soh, Galili! 16 Igiia hà rai pha bran debajobo muchuang ji doh ruii phro.Hanyie yi iy pha igiia soh shii rai pho shii nemuchuang khilieng ruii phro.” 17 Jipha ishak è Isu awai mua ji jao ne yua: “Nawaithek layog re-è khed bo, nyieliieshii hamangkhung pha Sajathua ne inui sha ro!” 18 Isu è Galili pha khabang ring shii lua mage shii, ai è ù uapho khuiinothek nyi shii doh, Simon (Phithar rone ho) chiih-è ai ikhuii Andrew yi, chiug re-è ù zum ramuii. 19 Isu è ithek shii yao, “Gu rog shii wuii bo, gu è nasa shii bran zum pha yua phi pha ro.” 20 Khthiie isa de awai sa ro chiugthek thiichiih thoh marui srane ai idoh wuii dun. 21 Ai ji è wuii dun shii Zebedi ro dufuiithek Jems nane Jon khuiinothek nyi shii doh. Ai de run shii awai sha aphuii Zebedi rog shii chiugthek saro ne rai iang. Isu è ithek shii de ho, 22 chiih-è khthiie ithek de awai sa ro run nane aphuii shii thoh marui, chiih-è ai rog shii wuii dun. 23 Isu è zab pha Galili hà wuii ne, Jewish misiahòthek shii yua, Sajathua pha chiang re-è Mua Wie ji yao, ne hanyie shii miiriie nane radthek um pha bran shii gang rek phi. 24 Ji è rek phi pha airo muathek chiang ne Syria pha zab soh shii yoi dun. Ji-è hanyie radpho, zab pha miiriie è diigpho nane nyie arek muluii pho shii: Ibuiithek um pha bran; chiih-è lai khi-ègthek, chiih-è siugpho zab aishii nohthog, chiih-è ai è ithek shii gang phi. 25 Galili re-è chiih-è thawunthek sua re-è, chiih-è Jerusalem, Juda, Jordan pha gai soh phothek de bajo ibrogthek de idoh luagieng.

Matthew 4 (BBT1E)

In Other Versions