Revelation 13 (BBT1E)

1 Chiihphado buii ibeymuthung yi khamuii re-è wuii ruii pha gu è doh. Ji ne sua iriangthek nane miley khrugthek um ro; zab jijia pha iriangthek shii rago um ro, chiih-è zab pha jiajia khrugthek shii Hamangkhung-aphuii shii makhak-riing pha ibeng um ro. 2 Buii ibeymuthung ji ne bachaing duiine mia, chiih-è lai yi sthumthek mia chiih-è sem yi bargi sem duiine mia ro. Hakhliingmuii è awairo blu nane biang, chiih-è awairo boh riichai buii ibeymuthung shii phi muii. 3 Buii ibeymuthung ro khrug jia shii ne awie pha saduii thoh dun pha duiine doh, jishii saduii ji ne gang ge. Zab pha sohnyiak ne anomuluii pha rey dun, chiih-è buii ibeymuthung rog shii luagieng dun ro. 4 Zab ne hakhliingmuii shii misiasia dun nyieliieshii ai è awairo riichai ne buii ibeymuthung shii phi muii. Ithek ne buii ibeymuthung shii de misiasia ne, yao, “Hanyie ne buii ibeymuthung mia lei? Hanyie è aishii gidieg mak rek mua mage phlei?” 5 Buii ibeymuthung shii wiangwe yao yi srane Hamangkhung-aphuii shii makhak-riing rek yi, chiih-è riichai ne habie sawi nyi ne ai wad shii um yi pha phi muii. 6 Ji ne Hamangkhung-aphuii shii, ai beng shii, ai khi hà rai pha ithuathek shii chiih-è zab hanyie yi hamangkhung hà rai pho shii ne jao ne thamai ro. 7 Chiih-è Hamangkhung-aphuii bran gidieg shii mak rek ne ithek shii yang pha phijong ro, chiih-è zab pha jad, sohthek, nyuak, nane log lakhung shii riichai rek pha phijong ro. 8 Hanyie ro ibeng yi isieng jigigam shii sohjambling azen ba pha ibi shii zey ne, ua muii pha shiishaiduii ro rey pho asi bie pha zab sohnyiak shii rai pha branthek ne aishii misiasia. 9 “Yoi bo, chiihphado, nathek shii khohthek um arone! 10 Hanyie shii zum sbo shii ne zum ruii phro; hanyie shii khamriie re-è ua sbo ne khamriie re-è ua ruii phro. Jine Hamangkhung-aphuii ro branthek chiang shii ne zud nane migi ji um chid ro.” 11 Chiihphado gu gai buii ibeymuthung shii doh, hanyie ne sohnyiak re-è wuiithok ro. Jine shiishaiduii iriangthek duiine nyi iriang um ro, chiih-è ji ne hakhliingmuii duiine yao ro. 12 Ji è igobi pha buii ibeymuthung moe shii ai è airo boh riichai ji kho ro. Ji è sohnyiak nane zab hanyie jishii rai pho shii de saduii gangjong pha igobi pha buii ibeymuthung shii misiasia yie pha bangchiie rek. 13 Nyichiieng pha buii ibeymuthung è boh buangthek rek; ji ne zab ro mieg moe shii ai è hamangkhung re-è bai shii sohnyiak hà wuii yi ro. 14 Chiih-è buangthek ne igobi pha buii ibeymuthung moe shii rek srane ai è sohnyiak shii rai pha zab branthek shii khinrin rek. Buii ibeymuthung chiih-è khamriie re-è saduii rek muii pha ji ne thuh de isieng ro ai beng shii ilab rek pha ibeymuthung è ithek shii jangbang rab bone yung ro. 15 Nyichiieng pha buii ibeymuthung è igobi pha buii ibeymuthung pha jangbang shii misey phi ne yao, ji è jangbang yao mua chiih-è hanyie è aishii misiasia asia pho shii ua muii. 16 Buii ibeymuthung è zab ìu nane boh, bukho nane dusho, khiao nane ichad bran shii ithek ro phazoi wadthek nane khuwuangthek shii cheb rab pha bangchiie rek. 17 Hanyiejia è de buii ibeymuthung beng chiih-è izey ai beng rey pha cheb oi pho ne apheg mua aliu mua phro. 18 Hì ne khani pha mugak ro. Hanyie ìdpho ne ji pha buii ibeymuthung ro izey pha miyaosiu shii nyayao mua, nyieliieshii izey ji ne tharohthamang ro beng rey ro. Ji pha izey ne 666 ro.

Revelation 13 (BBT1E)

In Other Versions